ថ្មីៗនេះ អ្នកលេងបណ្តាញសង្គមទាំងក្នុងTikTok និងក្នុង Youtube បានធ្វើការរិះគន់ទៅលើខ្សែភាពយន្តខ្លី បែបអប់រំ ដែលមានចំណងជើងថា «ស៊ីប្តី» រឿងនេះ ត្បិតថាដាក់ថា ជារឿងអប់រំ ប៉ុន្តែទាំងរូបភាព ទាំងខ្លឹមសារ ហាក់បញ្ចេញមក បែបគ្មានសីលធម៌ ស្រើបស្រាល បូករួមទាំងការនិយាយស្តី ជេរបញ្ចោរ អសុរស ដែលអាចបង្ហាញគំរូមិនល្អខ្លាំងក្នុងបណ្តាញសង្គម ។

ក្នុងនោះ សូម្បីលោកជំទាវ ហ៊ុន ស៊ីណាត ក៏បានស៊ែរបន្ត និងបានបញ្ចេញយោបល់ ក្នុងបណ្តាញសង្គម ទាំងស្រុងថា «

ខ្ញុំស្ដាប់មិនចូលត្រចៀកសោះ មិនដឹងជារឿងអប់រំមនុស្ស ឬបង្រៀនក្មេងៗអោយធ្វើតាមយ៉ាប់ណាស់អ្នកដឹកនាំរឿង អញ្ចឹងសុទ្ធតែពាក្យអសុរោះ កូនខ្មែរអើយ កុំធ្វើតាម ហើយក្រសួងណាអ្នកឲ្យចេញផ្សាយ វប្បធម៌ខ្មែរធ្លាក់ចុះក៏ដោយសារអ្នកដឹកនាំរឿងខ្លះៗមិនបានគិតនេះឯង»។

ជុំវិញការលើកឡើងរបស់លោកជំទាវ ហ៊ុន ស៊ីណាត នេះដែរ គេឃើញមានមហាជនជាច្រើន ចូលទៅខមមិន ដោយខ្លះបានលើកឡើងថា « អនិច្ចាសីលធម៌ ចុងភ្ជាប់ពាក្យថាអប់រំ ប្រហែលអ្នកនិពន្ធនិងអ្នកដឹកនាំរឿង មិនដែលចូលរៀនម៉ោងសីលធម៌» និងខ្លះទៀតបានលើកឡើងថា « ក្រសួងគួរមានចំណាត់ការអោយបានច្បាស់លាស់ ងើបមួយ វាយមួយ លើវីឌីអូដែលធ្វើការផ្សព្វផ្សាយអប់រំមិនត្រឹមត្រូវ » និងខ្លះទៀត កំពុងរង់ចាំមើលចំណាត់ការរបស់ក្រសួងវប្បធម៌ ជុំវិញរឿង មួយនេះផងដែរ ៕