ខេត្តកណ្តាល ៖ នាព្រឹកថ្ងៃទី២៥ ខែធ្នូ ឆ្នាំ២០២២ ម្សិលមិញនេះ សាលាបណ្ឌិតពាន់ បានរៀបចំពិធី ប្រគល់វិញ្ញាបនប័ត្របញ្ជាក់ការសិក្សា ភាសាអង់គ្លេស ដល់សិស្សជ័យលាភីជិត ៤០០នាក់ ប្រកាសលទ្ធផលបញ្ជាក់សមត្ថភាពសម្តែងរបស់សិស្ស ផ្តល់រង្វាន់លើកទឹកចិត្ត និងមានការតាំងពិព័រណ៍អាហារសម្រន់ ដែលមានការរៀបចំ និងចំអិនដោយសិស្សនៃ សាលាបណ្ឌិតពាន់ផងដែរ ។

ពិធីនេះ បានធ្វើឡើងក្រោមអធិបតីភាពលោកបណ្ឌិត ទួត លុច ប្រធានក្រុមប្រឹក្សាភិបាលសាលាបណ្ឌិតពាន់ និងកូនស្រី កញ្ញា ទួត កែវវិមាន និងមានការចូលរួមពីសិស្សជាង ៤០០នាក់ និងអាណាព្យាបាល មាតា បិតា សិស្សានុសិស្ស ជាច្រើនរូបផងដែរ ដែលមានទីតាំងចូលតាមក្លោងទ្វារវត្តបទុមសត្ថាចម្ងាយ១០ម៉ែត្រ ស្ថិតក្នុងភូមិគគីរ ឃុំគគីរ ស្រុកកៀនស្វាយ ខេត្តកណ្តាល ។

ក្នុងពិធីនេះដែរ លោកបណ្ឌិត ទួត លុច ប្រធានក្រុមប្រឹក្សាភិបាលសាលាបណ្ឌិតពាន់ ក៏បានឡើងមានប្រសាសន៍សំណេះសំណាលជាមួយអាណាព្យាបាល មាតិបិតាសិស្ស និងបានឡើងថ្លែងរបាយការណ៍បូកសរុបការសិក្សាសិស្សភាសាអង់គ្លេសឆ្នាំ២០២២ និងបានផ្តល់កិត្តិយស ជាមួយ កូនស្រី កញ្ញា ទួត កែវវិមាន ក៏ដូចជាអ្នកគ្រូ-លោកគ្រូ ធ្វើការប្រគល់វិញ្ញាបនប័ត្របញ្ជាក់ការសិក្សាថ្នាក់ភាសាអង់គ្លេស ដល់សិស្សជ័យលាភីចំនួន ៣៦០នាក់ ក្នុងចំណោមសិស្សប្រឡងចំនួន ៤៥៥នាក់ និងមានការ ប្រកាសលទ្ធផលបញ្ជាក់សមត្ថភាពសម្តែងរបស់សិស្ស ផ្តល់រង្វាន់លើកទឹកចិត្ត និងមានការតាំងពិព័រណ៍អាហារសម្រន់ ដែលមានការរៀបចំ និងចំអិនដោយសិស្សនៃ សាលាបណ្ឌិតពាន់ និងមានការចែករំលែកបទពិសោធន៍ គន្លឹះនៃការសិក្សា វិធីសាស្ត្រល្អៗពី កញ្ញា ទួត កែវវិមាន ជូនទៅកាន់ប្អូនៗសិស្សានុសិស្ស យកទៅអនុវត្តន៍ដើម្បីទទួលបានជោគជ័យក្នុងសិក្សាផងដែរ ៕