យោងតាមការចេញផ្សាយរបស់ក្រសួងព័ត៌មាន បានឲ្យដឹងថា ឯកឧត្តម ពៅ សុខ សមាជិកក្រុមប្រឹក្សាភិបាលសមាគមអ្នកនិពន្ធខ្មែរ ដែលជាអ្នករៀបរៀងសៀវភៅ (កម្ពុជាសម័យតេជោ) បានឱ្យដឹងនៅថ្ងៃនេះថា សៀវភៅដែលមានកម្រាស់ជិត៧០០ទំព័រនេះ ឯកឧត្តមបានបញ្ចប់ការរៀបរៀងជំហានបឋមរួចរាល់ជាស្ថាពរហើយ ហើយនឹងត្រូវបញ្ចូលទៅកាន់រោងពុម្ពក្នុងពេលឆាប់ៗនេះ បន្ទាប់ពីឯកឧត្តមចំណាយពេលរៀបរៀងប្រមាណជាង៦ខែដើម្បីរៀបរៀងរួចមក។
ឯកឧត្តម ពៅ សុខ បញ្ជាក់ថា សៀវភៅ កម្ពុជាសម័យតេជោ ពុំមែនជាសៀវភៅប្រវត្តិសាស្ត្រនោះទេ តែជាកម្រងឯកសារដែលឯកឧត្តមចងក្រងរៀបរាប់ពីសមិទ្ធផលដ៏ធំធេងមហាសាលនានាក្រោមម្លប់សន្តិភាព នៃសម្តេចតេជោ បិតាសន្តិភាពរបស់កម្ពុជា ដែលព្យាយាមធ្វើឱ្យមានឡើងវិញពីកម្ពុជាគ្មានអ្វីសោះ ឬអាចហៅថា កម្ពុជា នៃការកើតឡើងវិញពីគំនរផេះផង់ពីចំណុចសូន្យរហូតមានអ្វីៗគ្រប់យ៉ាង រាប់ចាប់ពីសេរីភាព នៃជំនឿសាសនា ការជ្រើសរើសគូស្រករ ការនិយាយស្តី ឬហៅថា សេរីភាព នៃការបញ្ចេញមតិ និងលទ្ធិប្រជាធិបតេយ្យដូចបណ្តាប្រទេសនានានៅលើលោកដែរ។
ឯកឧត្តម អះអាងថា ប្រសិនបើមានចម្ងល់ ឬចង់ដឹងថា រាជរដ្ឋាភិបាលកម្ពុជាបច្ចុប្បន្ន ក្រោមការដឹកនាំរបស់សម្តេចតេជោបិតាសន្តិភាពបានធ្វើអ្វីខ្លះ ឬថា តើកម្ពុជាសម័យតេជោ ឬតាមបណ្តាខេត្តមមួយចំនួនមានអ្វីខ្លះ សៀវភៅ (កម្ពុជាសម័យតេជោ )អាចពន្យល់ និងលាតត្រដាងបានគ្រប់ជំពូក។
សមាជិកក្រុមប្រឹក្សាភិបាលសមាគមអ្នកនិពន្ធខ្មែររូបនេះ បញ្ជាក់ទៀតថា ក្រោយពីការបោះពុម្ពរួចរាល់សៀវភៅ កម្ពុជាសម័យតេជោ នឹងមានដាក់លក់នៅតាមបណ្ណាគារនានា ក្នុងរាជធា នីភ្នំពេញ និងក៏មានការប្រគេន ឬចែកជូនដោយឥតគិតថ្លៃចំពោះមិត្តអ្នកអានទាំងឡាយដែលនិយមការអាន ការស្រាវជ្រាវ ហើយពុំមានលទ្ធភាពជាវ៕
