សិល្បៈ ៖ ថ្មីៗកន្លងទៅនេះ ក្រោយការប្រកួតបាល់ទាត់ របស់ក្រុមជម្រើសជាតិកម្ពុជា រួចមក គេឃើញ តារាសម្តែងលោក ម៉ៃ សុគន្ធ បានបង្ហោះសាររិះគន់ទៅលើសម្លៀកបំពាក់ របស់លោកគ្រូហុងដា ដែលជាគ្រូបង្វឹកបាល់ទាត់ របស់ក្រុមជម្រើសជាតិកម្ពុជា ដោយប្រើពាក្យធ្ងន់ធ្ងរមិនអាចទទួលយកបាន ដែលបានសរសេរថា « យើងជាម្ចាស់ផ្ទះ ពាក់អាវដេក ពាក់អាវនៅផ្ទះ ពាក់អាវកាន់ទុក្ខក៏បាន គ្មានទើសក្បាលអ្នកណាទេ ជ្រុលតែទៅស្រុកវិញហើយ ចាំកាល ទៅអោយឆាប់ទៅ ខ្ញុំសែនមាន់១០ » ជុំវិញសំណេរ នេះការបង្ហោះនេះ ត្រូវបានអ្នកលេងបណ្តាញសង្គមជាច្រើន បង្ហាញការមិនពេញចិត្តយ៉ាងខ្លាំង ។

ក្នុងនោះ នៅថ្ងៃទី១ ខែឧសភា ឆ្នាំ២០២៣ យោងតាមប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ថ្លែងក្នុងពិធីអញ្ជើញជួបសំណេះសំណាលជាមួយគណៈប្រតិភូកីឡារបស់កម្ពុជា មុននឹងពួកគាត់ចូលរួមប្រកួតកីឡាស៊ីហ្គេមលើកទី៣២ សម្តេចតេជោ ហ៊ុន សែន បានណែនាំឲ្យ លោក ម៉ៃ សុគន្ធ ធ្វើការសុំទោសគ្រូបង្វឹកបាល់ទាត់ជម្រើសជាតិកម្ពុជា Keisuke Honda នូវពាក្យប៉ុន្មានម៉ាត់ដែលបានប្រើ គឺធ្ងន់ធ្ងរហួសសម្រាប់ការទ្រាំទ្ររបស់ លោកគ្រូហុងដា ដែលបានធ្វើជាគ្រូបង្វឹកបាល់ទាត់កម្ពុជា អស់រយៈពេលប៉ុន្មានឆ្នាំនេះ ។

ក្រោយមក គេក៏ឃើញ លោកម៉ៃ សុគន្ធ បានចេញវីដេអូសុំទោស ជាសាធារណៈជាបន្តបន្ទាប់ ដោយភ្ជាប់នឹងសំណេរថា « ខ្ញុំបាទ ម៉ៃ សុគន្ធ សូមគោរពតាមអនុសាសន៍ដ៏ខ្ពង់ខ្ពស់ របស់ សម្តេចពុក សម្តេចម៉ែ កូនសុំ ចេញ វីដេអូទី២

សុំទោសជាសាធារណៈទៅកាន់លោកគ្រូ ហុង ដា ខ្ញុំបាទមានកំហុសឆ្គាំឆ្គង សូមអោយលោកគ្រូហុង ដា អភ័យទោសនូវកំហុសនេះផងនិងសូមទោសសាធារណៈជនទាំងអស់ មេត្តា អធ្យាស្រ័យ និងអភ័យទោស ដល់ខ្ញុំបាទផង

ខ្ញុំបាទមានចិត្តរំភើបខ្លាំងណាស់នៅពេលដែលឮប្រសាសន៍សម្ដេចពុកណែនាំអប់រំខ្ញុំបាទ ជាកូនប្រុសឱ្យធ្វើអំពើល្អក្នុងសង្គម ដោយខ្ញុំបាទជាកូនកំព្រា ពាក្យនេះជាពាក្យទីមួយក្នុងឆាកជីវិតហើយ ដែលបានស្តាប់ ព្រោះលោកឪពុកខ្ញុំបាទបានពលីជីវិតក្នុងសមរភូមិ កាលពីខ្ញុំបាទមានអាយុទើបតែ ៥ ឆ្នាំ ហើយអ្នកម្ដាយខ្ញុំបាទបានទទួលមរណភាព ក្នុងកំឡុង ពេលកូវីត ១៩ជិតបានបញ្ចប់ (ដោយជរាភាពនិងជំងឺលើសឈាម) ជាពិសេសផងនោះ អនុសាសន៍ដ៏មានតម្លៃមិនអាចកាត់ថ្លៃបាន កូនប្រុសនិងខិតខំធ្វើខ្លួនឱ្យបានល្អដើម្បីរស់នៅក្រោមម្លប់ដ៏ត្រជាក់ របស់សម្ដេចពុកនិងសម្ដេចម៉ែជាទីគោរពដ៏ខ្ពង់ខ្ពស់បំផុត» ៕