យោងតាមការចេញផ្សាយរបស់ ក្រសួងព័ត៌មាន បានឲ្យដឹងថា នៅរសៀលថ្ងៃទី៦ ខែកក្កដា ឆ្នាំ២០២៣ នាសាលសន្និសីទជាន់ទី១ នៃទីស្តីការគណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) បានរៀបចំកម្មវិធីអញ្ជើញតំណាងគណបក្ស នយោបាយដែលចូលរួមក្នុងការបោះឆ្នោតទាំងអស់ ធ្វើការចាប់ឆ្នោតកំណត់យកពណ៍នៃសសរក្រាបលទ្ធផលបឋមនៃការបោះឆ្នោតជ្រើសតាំងតំណាងរាស្ត្រនីតិកាលទី ៧ ឆ្នាំ២០២៣ តំណាងឱ្យគណបក្សនយោបាយនីមួយៗ សម្រាប់កម្មវិធីផ្សព្វផ្សាយលទ្ធផលបឋមតាមទូរទស្សន៍។

កម្មវិធីនេះនឹងប្រព្រឹត្តទៅក្រោមការដឹកនាំសម្របសម្រួលដោយឯកឧត្តម តុប ឫទ្ធី អគ្គនាយកនៃអគ្គនាយកដ្ឋានសេវាកម្មច្បាប់ និងបច្ចេកទេស ព្រមទាំងមានការចូលរួមពីតំណាងគណបក្សនយោបាយ និងអង្គភាពស្ថាប័នពាក់ព័ន្ធជាច្រើនទៀត។ ឯកឧត្តម តុប ឫទ្ធី មានប្រសាសន៍ថា ការចាប់ឆ្នោតកំណត់យកពណ៌នៃសសរក្រាបលទ្ធផលបឋមនៃការបោះឆ្នោតជ្រើសតាំងតំណាងរាស្ត្រនីតិកាលទី ៧ ឆ្នាំ២០២៣ តំណាងឱ្យគណបក្សនយោបាយនីមួយៗ សម្រាប់កម្មវិធីផ្សព្វផ្សាយលទ្ធផលបឋមតាមទូរទស្សន៍ ធ្វើឡើងដើម្បីឲ្យដំណើរការនៃការប្រកាសលទ្ធផលបឋមប្រព្រឹត្តទៅដោយរលូន និងដើម្បីបង្ហាញឲ្យមានតម្លាភាព ក្នុងការកំណត់ពណ៌ទៅលើសសរក្រាបរបស់គណបក្សនីមួយៗដែលទទួលបានសំឡេងឆ្នោត ហើយលទ្ធផលបឋមដែលធ្វើការផ្សព្វផ្សាយតាមទូរទស្សន៍ គឺ (គជប) សហការជាមួយទូរទស្សន៍ជាតិកម្ពុជា វិទ្យុជាតិកម្ពុជា នៅមានការផ្សព្វផ្សាយតាមប្រព័ន្ធព័ត៌មានវិទ្យារបស់គជប មានដូចជាគេហទំព័រ និងបណ្ដាញសង្គមផ្លូវការរបស់គជប។

ឯកឧត្តម បញ្ជាក់ថា កម្ពុជាប្រកាន់ភ្ជាប់នូវលទ្ធិប្រជាធិបតេយ្យ ដូច្នេះការរៀបចំនីតិវិធីនីមួយៗគឺស្ថិតក្នុងបរិបទលទ្ធិប្រជាធិបតេយ្យផងដែរគឺតម្រូវឲ្យមានការចាប់ឆ្នោត ជៀសវាងមានការមិនពេញចិត្តឬអាអន់ស្រពន់ចិត្ត និងករណីណាមួយកើតឡើងជាយថាហេតុ។

សូមជម្រាបជូនថា សសរក្រាបសម្រាប់កម្មវិធីផ្សព្វផ្សាយលទ្ធផលបឋមតាមទូរទស្សន៍មានចំនួន ១៨ ពណ៌ដែលតម្រូវឲ្យតំណាងគណបក្សនីមួយៗធ្វើការចាប់ឆ្នោតម្ដងម្នាក់ៗ ក្នុងនោះគណបក្ស ៖

-សំបុកឃ្មុំសង្គមប្រជាធិបតេយ្យ ចាប់បាន កូដពណ៌លេខ 5

-ខ្មែរតែមួយ ចាប់បាន កូដពណ៌លេខ១៧

-សញ្ជាតិកម្ពុជា ចាប់បាន កូដពណ៌៧

-ខ្មែររួបរួមជាតិ ចាប់បាន កូដពណ៌២

-កម្លាំងប្រជាធិបតេយ្យ ចាប់បាន កូដពណ៌១៤

-កសិករ ចាប់បាន កូដពណ៌៨

-ស្ត្រីដើម្បីស្ត្រី ចាប់បាន កូដពណ៌៤

-ខ្មែរឈប់ក្រ ចាប់បាន កូដពណ៌១៥

-ហ៊ុនស៊ិនប៉ិច ចាប់បាន កូដពណ៌១៦

-ធម្មាធិបតេយ្យ ចាប់បាន កូដពណ៌១១

-ប្រជាធិបតេយ្យមូលដ្ឋាន ចាប់បាន កូដពណ៌៦

-បំណងពលរដ្ឋ ចាប់បាន កូដពណ៌៣

-ខ្មែរអភិវឌ្ឍន៍សេដ្ឋកិច្ច ចាប់បាន កូដពណ៌១០

-ឯកភាពជាតិខ្មែរ ចាប់បាន កូដពណ៌៩

-ខ្មែរអភិរក្ស ចាប់បាន កូដពណ៌១២

-យុវជនកម្ពុជា ចាប់បាន កូដពណ៌១៣ ជ

-នជាតិដើមប្រជាធិបតេយ្យកម្ពុជា ចាប់បាន កូដពណ៌១

- ប្រជាជនកម្ពុជា ចាប់បាន កូដពណ៌១៨៕ ដោយ៖ ទទក, សម្រួលផ្សាយ៖ កន ចំណាន