រាជធានីភ្នំពេញ ៖  បុរសម្នាក់ ជិះម៉ូតូតាមដងផ្លូវ ក្នុងល្បឿនលឿន មិនដឹងយ៉ាងម៉េច បែរជាដួលម៉ូតូ បោកក្បាលនឹងផ្លូវស្លាប់យ៉ាងរន្ធត់ ។

ហេតុការណ៍នេះបានកើតឡើងកាលពីវេលាម៉ោង៤និង៣០នាទីល្ងាច ថ្ងៃទី២៦ ខែឧសភា ឆ្នាំ២០២៤  ត្រង់ចំណុចស្ពាន២៤ម៉ោងប៉ុស្តិ៍៦៣ លើផ្លូវមហាវិថី មហាឧបាសិកា ឌី ប៉ុក(១៩១៨) ស្ថិតនៅភូមិព្រៃមូល សង្កាត់ក្រំាងធ្នង់ ខណ្ឌសែនសុខ រាជធានីភ្នំពេញ។

តាមរបាយការណ៍ពីសមត្ថកិច្ចបានឲ្យដឹងថា មុនពេលកើតហេតុ គេបានឃើញម៉ូតូមួយគ្រឿងម៉ាក ហុងដាសេ១២៥  ពណ៌ ខ្មៅ  ពាក់ស្លាកលេខ កណ្តាល1AH 8193 អ្នកបើកឈ្មោះ ជួន ណារិទ្ធ ភេទប្រុស អាយុ២៩ឆ្នាំ ភូមិ អណ្តូងស្នាយ ឃុំ អណ្តូងស្នាយ ស្រុករលាប្អៀ ខេត្តកំពង់ឆ្នំាង  មុខរបរ កម្មករ ធ្វើដំណើរតាមផ្លូវមហាវិថី មហាឧបាសិកា ឌី ប៉ុក ក្នុងទិសដៅពីលិចទៅកើត នៅលើម៉ូតូជិះតែម្នាក់ឯង លុះមកដល់ចំណុចកើតហេតុបានដួលខ្លួនឯង ស្លាប់នៅកន្លែងកើតហេតុតែម្តង ខណៈសមត្ថកិច្ចបញ្ជាក់ថា បណ្តាលមកពី ម៉ូតូបើកបរលឿន។

ក្រោយកើតហេតុ សមត្ថកិច្ចជំនាញបានធ្វើការវាស់វែងនិងប្រគល់សពឲ្យសាច់ញាតិធ្វើបុណ្យតាមប្រពៃណី ៕ អែល វិចិត្រ