រាជធានីភ្នំពេញ ៖ បុរសម្នាក់ បានរងរបួសធ្ងន់ ត្រូវបាន កងសង្រ្គោះបន្ទាន់៧១១កងពលតូចលេខ៧០ ជួយសង្គ្រោះបញ្ជូនទៅកាន់មន្ទីរពេទ្យ ព្រះកុសុមៈ ខណៈកំពុងជិះម៉ូតូ ហើយត្រូវបានរថយន្ត បុកម៉ូតូពីក្រោយពេញទំហឹង ផ្លោងទាំងមនុស្ស ទាំងម៉ូតូធ្លាក់ពីលើផ្លូវ រួចបន្តល្បឿនបើករត់គេចខ្លួនបាត់ ។
ហេតុការណ៍នេះបានកើតឡើងកាលពីវេលាម៉ោង ៦:៤០នាទី ថ្ងៃទី ២៧ ខែឧសភា ឆ្នាំ២០២៤ ត្រង់ចំណុចលើផ្លូវក្រវ៉ាត់ក្រុងទី៣ ក្នុងភូមិសាក់សំពៅ សង្កាត់សាក់សំពៅ ខណ្ឌដង្កោ រាជធានីភ្នំពេញ ។
សមត្ថកិច្ចបានឲ្យដឹងថា ជនរងគ្រោះដែលរបួសធ្ងន់មានឈ្មោះ នី ស៊ីធួន ភេទប្រុស អាយុ២១ឆ្នាំ របួសបែកក្បាល ។ ដោយករណីនេះ ម៉ូតូម៉ាក HONDA C125 ពណ៌ខ្មៅ ពាក់ផ្លាកលេខ ព្រៃវែង 1Y.5255 បើកបរដោយជនរងគ្រោះ និងរថយន្តមិនចាំម៉ាកនិងស្លាកលេខ បើកបរស្របទិសគ្នា ពីកើតទៅលិច លុះដល់ចំណុចកើតហេតុ រថយន្តបានបុកម៉ូតូពីក្រោយតែម្តង ផ្លោងទាំងមនុស្ស ទាំងម៉ូតូធ្លាក់ពីលើផ្លូវ រួចបន្តល្បឿនបើករត់គេចខ្លួនបាត់ ។
ទោះបីជាយ៉ាងណា ក្រោយកើតហេតុ សមត្ថកិច្ចបានយកម៉ូតូរបស់ជនរងគ្រោះ ទៅរក្សាទុកនៅ អធិការដ្ឋាននគរបាលខណ្ឌដង្កោ រង់ចាំស្រាវជ្រាវ រករថយន្តបង្ក មកដោះស្រាយគ្នាតាមច្បាប់ ៕ អែល វិចិត្រ
