រាជធានីភ្នំពេញ ៖ បុរសជនបរទេសម្នាក់ ធ្លាក់ពីលើអាគារមួយកន្លែង ស្លាប់យ៉ាងរន្ធត់ទាំងព្រឹកព្រលឹម ផ្អើលសមត្ថកិច្ចមូលដ្ឋាន និងសមត្ថកិច្ចជំនាញផ្នែកកោសល្យវិច័យក្រុង ចុះមកធ្វើការពិនិត្យស្រាវជ្រាវ ។

ហេតុការណ៍នេះបានកើតឡើង នៅវេលាម៉ោង ៨ព្រឹក ថ្ងៃទី១២ ខែមិថុនា ឆ្នាំ២០២៤ នៅចំណុចអាគារ SKY 31 តាមបណ្តោយផ្លូវលេខ ២៨៧ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ។

តាមប្រភពព័ត៌មាន ពីសន្តិសុខនៅទីតាំងកើតហេតុ បានឲ្យដឹងថា មុនពេលកើតហេតុ គាត់មិនបានចាប់អារម្មណ៍នោះទេ ស្មានតែខោអាវដែលគេហាលនៅខាងលើធ្លាក់មក លុះទៅមើលឲ្យជិត ទើបដឹងថា ជាបុរសជនបរទេសម្នាក់ អាយុខ្ទង់៣០ឆ្នាំ បានធ្លាក់ពីខាងលើនៃអាគារមក ស្លាប់ទៅហើយ ទើបប្រញាប់រាយការណ៍ជូនសមត្ថកិច្ច ។

ភ្លាមៗគេឃើញសមត្ថកិច្ចមូលដ្ឋាន រួមទាំងនគរបាលជំនាញផ្នែកកោលស្យវិច័យក្រុង បានចុះមកធ្វើការពិនិត្យស្រាវជ្រាវ និងឡើងទៅជាន់ខាងលើ បើកកាមេរ៉ាសុវត្ថិភាពមើល ថាតើជនរងគ្រោះស្លាប់ដោយសារការធ្វើអត្តឃាត លោតពីលើអាគារនេះស្លាប់ដោយខ្លួនឯង ឬជាករណីអ្វីឲ្យប្រាកដ និងដឹកសពយកទៅតម្កល់ទុក រង់ចាំជំនាញចាត់ការបន្ត ៕អែលមេសា