រាជធានីភ្នំពេញ ៖ ពិតជារន្ធត់ណាស់លោកអើយ ទាំងព្រឹកព្រលឹមតែម្តង ខួរខ្ចាយពេញនៅលើផ្លូវ ខណៈរថយន្តដឹកអ្នកដំណើរ មួយគ្រឿង មិនដឹងប្រញាប់ទៅណាទេ បានបើកបុរករះរថយន្ត និងម៉ូតូជាច្រើនគ្រឿងដែលកំពុងឈប់ស្តុប បណ្តាលឲ្យមានអ្នករងរបួស និងកិននារីម្នាក់ស្លាប់ម្នាក់យ៉ាងរន្ធត់ភ្លាមៗ ។

ហេតុការណ៍នេះបានកើតឡើងនៅវេលាម៉ោង ៩និង៣០នាទីព្រឹក ថ្ងៃសៅរ៍ទី២២ ខែមិថុនា ឆ្នាំ២០២៤ ដែលស្ថិតនៅតាមបណ្តោយផ្លូវជាតិលេខ៦អា ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញ រថយន្តនិងម៉ូតូជាច្រើនគ្រឿងកំពុងឈប់ស្តុបក្រហម នៅចំណុចស្តុបរង្វង់មូលនាងមច្ឆា ពេលនោះ ស្រាប់តែមានរថយន្តបង្ក ប្រភេទរថយន្តដឹកអ្នកដំណើរ ដែលបិទផ្លាក ម៉េង លី ដឹកអ្នកដំណើរ ពាក់ស្លាកលេខ សៀមរាប 3A-1552 ដែលធ្វើដំណើរពីខេត្តឆ្ពោះមកកាន់រាជធានីភ្នំពេញ បានបើកយ៉ាងលឿន មិនដឹងប្រញាប់ទៅណាទេ មកបុករះ ម៉ូតូ រថយន្ត និងរម៉កកំពុងឈប់ស្តុប ជាច្រើនគ្រឿង ចំពីក្រោយពេញទំហឹង បណ្តាលឲ្យខ្លះរបួស និងបានកិននារីម្នាក់ស្លាប់ម្នាក់យ៉ាងរន្ធត់ភ្លាមៗ ។ ចំណែកតៃកុងរថយន្តបង្កវិញ ភ្លាមៗត្រូវប្រជាពលរដ្ឋឃាត់ខ្លួនបាន បញ្ជូនតាមរថយន្តសមត្ថកិច្ច ដឹកយកទៅកាន់ប៉ុស្តិ៍ដើម្បីសាកសួរភ្លាមៗ ។

ក្រោយកើតហេតុ កម្លាំងសមត្ថកិច្ចជំនាញប៉ុស្តិ៍ និងខណ្ឌ សហការជាមួយនគរបាលចរាចរណ៍ក្រុង ចុះមកធ្វើការវាស់វែងយករថយន្តបង្ក ព្រមទាំងរថយន្ត និង ម៉ូតូរងគ្រោះ រួមទាំងរម៉ក ទៅរក្សាទុក រង់ចាំការដោះស្រាយគ្នាតាមច្បាប់ និងប្រគល់សពឲ្យក្រុមគ្រួសារសាច់ញាតិធ្វើបុណ្យតាមប្រពៃណី ៕ អែល មេសា