រាជធានីភ្នំពេញ ៖ នារីម្នាក់ បានស្លាប់បាត់បង់ជីវិតយ៉ាងរន្ធត់ និងម្នាក់ទៀតរងរបួសស្រាល ក្រោយជួបគ្រោះថ្នាក់ចរាចរណ៍ ទើបតែជិះម៉ូតូមកពីទិញខោអាវនៅផ្សារ ។

ហេតុការណ៍នេះបានកើតឡើងនៅថ្ងៃត្រង់ទី១១ ខែកក្កដា ឆ្នាំ២០២៤ នៅតាមបណ្តោយផ្លូវ មហាវិថីឈ្នះៗ ក្នុងសង្កាត់ចោមចៅទៅ៣ ខណ្ឌពោធិ៍សែនជ័យ រាជធានីភ្នំពេញ ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញ ម៉ូតូខាងលើម៉ាក ប៊ីត ពណ៌ស លាយក្រហម ពាក់ស្លាកលេខ តាកែវ 1N-6431 ជិះដោយនារី០២នាក់ តាមបណ្តោយផ្លូវខាងលើ លុះដល់ចំណុចកើតហេតុ មិនដឹងថាជនរងគ្រោះចាប់ហ្វ្រាំងដួលបោកចូលរថយន្ត ឬក៏ទាក់ដៃចង្កូតជាមួយរថយន្តនោះទេ គ្រាន់តែឃើញជនរងគ្រោះដួលម៉ូតូ ខ្ទាតចូលក្រោមរថយន្ត កិនស្លាប់ម្នាក់ភ្លាមៗតែម្តង ។ ចំណែកម្នាក់ទៀតរបួសស្រាល ត្រូវបានបញ្ជូនទៅមន្ទីរពេទ្យ ។រីឯរថយន្តនោះមិនចាំម៉ាកនោះទេ បានបន្តល្បឿនទៅមុខបាត់ ។

ភ្លាមៗគេឃើញសមត្ថកិច្ចជំនាញមូលដ្ឋាន រួមជាមួយនគរបាលចរាចរណ៍ខណ្ឌ និងនគរបាលចរាចរណ៍ក្រុង ចុះមកធ្វើការវាស់វែង ទាក់ទងទៅសាច់ញាតិ មកកាន់ទីតាំងកើតហេតុ ទ្រហ៊ោយំបោកខ្លួន អោបត្រកងសពប្អូនមិនអាចទទួលយកបាន ត្រូវមកស្លាប់ចោលកូនតូចនៅឯស្រុក ដែលរស់នៅជាមួយម្តាយឪពុកចាស់ៗ នៅឯខេត្តកំពត ទាំងជីវភាពគ្រួសារក្រលំបាក ដូច្នេះបើបងប្អូនអាណិត ចង់ចូលបុណ្យសព ឬជួយដល់ក្រុមគ្រួសារជនរងគ្រោះ សូមទាក់ទងតាមរយៈលេខទូរសព្ទ 096 475 1818 របស់សាច់ញាតិបាន ។

ក្រោយកើតហេតុ សមត្ថកិច្ចបានធ្វើកំណត់ហេតុប្រគល់សពឲ្យសាច់ញាតិយកទៅធ្វើបុណ្យតាមប្រពៃណី និងបើកការស្រាវជ្រាវតាមរយៈកាមេរ៉ាសុវត្ថិភាព តាមរករថយន្តដែលពាក់ព័ន្ធ ចូលខ្លួនមកដោះស្រាយគ្នាតាមច្បាប់បន្តទៀត ៕ អែលមេសា