រាជធានីភ្នំពេញ ៖ ពិតជារន្ធត់ណាស់ នារីកម្មកររោងចក្រ២នាក់បងប្អូន ជិះម៉ូតូឌុបគ្នាទៅធ្វើការរោងចក្រ មិនទាន់ដល់ផង ត្រូវរថយន្តមិនចាំម៉ាក បុកពីក្រោយលាន់ដូចរន្ទះ ស្លាប់ម្នាក់យ៉ាងរន្ធត់ ចំណែកម្នាក់ទៀតរងរបួសធ្ងន់ ។

ហេតុការណ៍នេះបានកើតឡើងកាលពីវេលាម៉ោង ៥និង៥០នាទី​ព្រឹក ថ្ងៃទី១៣ ខែកក្កដា ឆ្នាំ២០២៤ ត្រង់ចំណុចស្តុបវិមានឈ្នះឈ្នះ កែងផ្លូវហាណូយ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។

សមត្ថកិច្ចបានឲ្យដឹង ជនរងគ្រោះដែលស្លាប់មានឈ្មោះ ឃឿន ធីប អាយុ ២៨ឆ្នាំ ភេទស្រី រស់នៅភូមិតាព្រហ្ម ឃុំកំពង់អុក ស្រុកពញាឮ ខេត្តកណ្ដាល ។ ចំណែកម្នាក់ទៀតរបួសធ្ងន់មានឈ្មោះ ឃឿន សុធីម ភេទស្រី អាយុ៣៨ឆ្នាំ ជាអ្នកជិះពីក្រោយ។

តាមប្រភពពីក្រុមគ្រួសារសាច់ញាតិ បានឲ្យដឹងថា មុនពេលកើតហេតុ គេបានឃើញ ជនរងគ្រោះទាំង២នាក់បងប្អូន ជិះម៉ូតូម៉ាកHonda Dream ពណ៌ខ្មៅ ពាក់ស្លាកលេខ ភ្នំពេញ 1KG-8807 ចេញពីផ្ទះ ទៅធើ្វការរោងចក្រនៅម្ដុំស្ទឹងមានជ័យ ដល់ចំណុចកើតហេតុ ម៉ូតូឈប់រង់ចាំភ្លើងស្តុប ស្រាប់តែមានរថយន្តប្រភេទដឹកទំនិញធុនធំ បើកបរក្នុងល្បឿនលឿន បុកពីក្រោយលាន់ដូចរន្ទះ ស្លាប់ស្ត្រីអ្នកបើកម៉ូតូយ៉ាងរន្ធត់ ចំណែកអ្នកជិះពីក្រោយ រងរបួសធ្ងន់ រួចហើយរថយន្តបង្ក ក៏បានបើករត់គេចខ្លួនបាត់ស្រមោល ។

ក្រោយកើតហេតុសមត្ថកិច្ចជំនាញនៃអធិការនគរបាលខាងព្រែកព្នៅ ចុះទៅដល់ទីតាំងកើតហេតុ បានធ្វើការទំនាក់ទំនងទៅក្រុមគ្រួសារសាច់ញាតិមកទទួលយកសពជនរងគ្រោះយកទៅធ្វើបុណ្យតាមប្រពៃណី និងបើកការស្រាវជ្រាវតាមចាប់រថយន្តបង្កខាងលើ យកមកផ្តន្ទាទោសតាមច្បាប់ ៕ មេសា