ខេត្តព្រៃវែង ៖ ព្រះគ្រូចៅអធិការវត្តត្រូវបានសមត្ថកិច្ចឃាត់ខ្លួន រួចចាប់ផ្សឹក ព្រោះតែធ្វើទារុណកម្មចាប់ក្មេងវត្តម្នាក់ និងនេនតូចមួយអង្គកាត់ម្រាមដៃ ដោយសារខឹងអ្នកទាំងពីរលួចទ្រព្យសម្បត្តិក្នុងវត្តជាច្រើនដងអប់រំមិនស្តាប់ ។

ហេតុការណ៍នេះបានកើតឡើងកាលពីថ្ងៃទី១៣ ខែមករា ឆ្នាំ២០២៥ នៅក្នុងទីអារាមវត្តទួលអង្គុញ ស្ថិតក្នុងឃុំព្នៅ១ ស្រុកស៊ីធរកណ្ដាល ខេត្តព្រៃវែង។

ព្រះសង្ឃដែលត្រូវសមត្ថកិច្ចឃាត់ខ្លួនព្រះនាម ម៉ៅ វិបុល ព្រះជន្ម ៣៧ វស្សា មានទីលំនៅក្នុងភូមិអន្លង់អក ឃុំសង្គម ស្រុកកងមាស ខេត្តកំពង់ចាម និងមានតួនាទីជាព្រះគ្រូចៅអធិការវត្តទួលអង្គុញ។

ចំណែកជនរងគ្រោះដែលត្រូវបានព្រះសង្ឃខាងលើធ្វើទារុណកម្មដោយកាត់ម្រាមដៃមានឈ្មោះ រស់ គីមជា ភេទប្រុស អាយុ ១៦ ឆ្នាំ ជាព្រះសង្ឃគង់នៅវត្តទួលអង្គុញ និងមានទីលំនៅក្នុងភូមិទួលអង្គុញ ឃុំព្នៅ១ ស្រុកស៊ីធរកណ្ដាល ខេត្តព្រៃវែង រងគ្រោះដាច់ម្រាមកូនដៃខាងស្ដាំ និងមានឈ្មោះ សុខ លាភ ភេទប្រុស អាយុ ១៦ ឆ្នាំ ជាក្មេងកំព្រា រស់នៅក្នុងវត្តទួលអង្គុញ រងរបួសដាច់ម្រាមកូនដៃខាងស្ដាំដូចគ្នា។

ក្រោយពីសមត្តកិច្ចធ្វើការឃាត់ខ្លួនព្រះសង្ឃនាម ម៉ៅ វិបុល បានឆ្លើយសារភាពថា ជនរងគ្រោះទាំងពីរនាក់ ( កូននេននិងក្មេងវត្ត ) ធ្លាប់បានធ្វើសកម្មភាពលួចទ្រព្យ សម្បត្តិក្នុងវត្តដូចជា អង្ករ មី ត្រីខ និងបច្ច័យក្នុងវត្ត ជាច្រើនដង ហើយរូបខ្លួនជាព្រះគ្រូចៅអធិការវត្ត ក៏បានស្ដីប្រដៅអប់រំណែនាំជាច្រើនដងមកហើយដែរ ប៉ុន្តែអ្នកទាំងពីរនៅតែមិនរាងចាលសោះ រហូតមកដល់យប់ថ្ងៃទី ១៣ ខែមករា ឆ្នាំ ២០២៥ អ្នកទាំងពីរបានលួចទ្រព្យសម្បត្តិក្នុងវត្តម្តងទៀត ទើបរូបខ្លួនជាចៅអធិការវត្តខឹងខ្លាំង និងចាប់កាត់ម្រាមដៃចោល ដើម្បីឱ្យរាងចាលតែម្ដង។

គួរបញ្ជាក់ផងដែរថា ក្រោយពីត្រូវព្រះគ្រូចៅ អធិការវត្ត ចាប់ធ្វើទារុណកម្មដោយកាត់ម្រាមដៃចោលរួចហើយ ទាំងកូននេននិងកូនសិស្សលោកបាននាំគ្នាចាកចេញពីវត្ត ដោយពុំមានការប្ដឹងផ្ដល់អ្វីនោះទេ ( កូនសិស្សលោកជាក្មេងកំព្រាគ្មានឪពុកម្ដាយ ចំណែកកូននេនមានឪពុកម្ដាយ ធ្វើជាគណៈកម្មការវត្ត ហើយបានចរចាត្រូវរ៉ូវគ្នាជាមួយចៅអធិការវត្ត ឲ្យបិទរឿងមិនឲ្យបែកធ្លាយ ) គឺរហូតមកដល់ថ្ងៃទី ១៦ ខែមករា ស្រាប់តែបែកធ្លាយដឹងដល់ប្រជាពលរដ្ឋក្នុងភូមិ ទើបធ្វើឱ្យព័ត៌មាននេះបែកធ្លាយដឹងដល់សមត្ថកិច្ច រហូតឈានទៅដល់ការចុះនាំខ្លួនព្រះគ្រូចៅអធិការវត្តទួលអង្គុញ យកទៅធ្វើការសាកសួរនៅអធិការដ្ឋាននគរបាលស្រុកស៊ីធរកណ្ដាល បន្ទាប់មកក៏ធ្វើបែបបទទៅតាមនិតិវិធី ដោយចាប់ផ្សឹកសង្ឃអង្គនេះ រួចកសាងសំណុំរឿងបញ្ជូនទៅកាន់សាលាដំបូងខេត្តចាត់ការបន្ត ក្រោយពីបញ្ចប់ការស៊ើបសួ ជនសង្ស័យដែលជាចៅអធិការវត្ត ត្រូវបានសមត្ថកិច្ចបញ្ជូនទៅឃុំខ្លួននៅក្នុងពន្ធនាគារខេត្តព្រៃវែងកាលពីរសៀលថ្ងៃទី 20 មករា ឆ្នាំ២០២៥ ៕ដោយ៖លីណា