ខេត្តបាត់ដំបង៖ នៅថ្ងៃទី០៨ ខែកុម្ភៈ ឆ្នាំ២០២៥ វេលាម៉ោង១៥និង១០នាទី នៅលើផ្លូវកៅស៊ូ ចំណុចក្រុមទី០២ ភូមិអូរដា ឃុំផ្លូវមាស ស្រុករតនមណ្ឌល ខេត្តបាត់ដំបង មានករណីគ្រោះថ្នាក់ចរាចរណ៍មួយកើតឡើងរវាងរថយន្តសណ្តោងរ៉ឺម៉ក និងម៉ូតូ បណ្តាលឲ្យស្លាប់ម្នាក់ និងរងរបួស០២នាក់ ។ លោកវរសេនីយ៍ឯក សន និល អធិការនគរបាលស្រុករតនមណ្ឌល បានរាយការណ៍ឲ្យដឹងថា ៖ គ្រោះថ្នាក់ចរាចរណ៍នេះ មានរថយន្តម៉ាកអុីស៊ុយៗ ពណ៍ប៉ៃតងខ្ចី ពាក់ស្លាកលេខក្បាលរថយន្ត ស្លាកលេខថៃ 70-2728 និងរ៉ឺម៉កលេខ 70-2729 អ្នកបើកបររថយន្តមិនស្គាល់អត្តសញ្ញាណ បើកបររថយន្តទិសដៅពីលិចទៅកើត បានបុកម៉ូតូ០១គ្រឿង បើកបរពីកើតមកលិច ដោយធ្វើដំណើរមានគ្នា០៣នាក់ បើកបរម៉ូតូម៉ាកឃ្លីក ពណ៌ខ្មៅ សេរីឆ្នាំ២០១៨ ពាក់ស្លាកលេខ កំពង់ឆ្នាំង 1J-2905 អ្នកបើកបរឈ្មោះ ណាង ស្រីនីត ភេទស្រី អាយុ២១ឆ្នាំ ស្នាក់នៅបណ្តោះអាសន្នភូមិស្រែជីពៅ ឃុំមានជ័យ ស្រុកសំឡូត ខេត្តបាត់ដំបង (ស្លាប់នៅកន្លែងកើតហេតុ), អ្នករួមដំណើរ១.ឈ្មោះ សឹម ស្រីយ៉ា ភេទស្រី អាយុ២០ ឆ្នាំ (របួសមធ្យម) និង២.ឈ្មោះ បារាំង ស្រីណាន ភេទស្រី អាយុ១៥ឆ្នាំ (របួសស្រាល) ទាំងពីរនាក់រស់នៅបណ្តោះអាសន្នភូមិស្រែជីពៅ ឃុំមានជ័យ ស្រុកសំឡូត ខេត្តបាត់ដំបង ។

តាមការពិនិត្យកន្លែងកើតហេតុ កម្លាំងនគរបាលជំនាញ នៃអធិការដ្ឋាននគរបាលស្រុករតនមណ្ឌល បានបញ្ជាក់ដឹងថា៖ គ្រោះថ្នាក់ចរាចរណ៍នេះរថយន្តសណ្តោងរ៉ឺម៉កបានបុកជាមួយម៉ូតូ ក្នុងទិសដៅ បញ្ច្រាសទិសគ្នា បណ្ដោលអោយភាគីខាងម៉ូតូ ស្លាប់នៅកន្លែងកើតហេតុស្លាប់ចំនួនម្នាក់ នឹងរងរបួសចំនួន ០២នាក់ ។ ក្រោយពេលកើតហេតុរួចចំពោះរថយន្ត បានបើកមកទុកក្នុងសៃទ្បូមួយកន្លែង រួចម្ចាស់រថយន្តបានរត់គេចខ្លួនបាត់ ។

បច្ចុប្បន្ន នគរបាលស្រុករតនមណ្ឌល កំពុងស្វែងរកជនបង្ក និងវត្ថុតាងបានយកទៅរក្សាទុកនៅការិយាល័យចរាចរណ៍ខេត្ត ដើម្បីដោះស្រាយតាមនីតីវិធី ។ ចំណែកឯសាកសពជនរងគ្រោះ សមត្ថកិច្ចបានធ្វើកំណត់ហេតុ និងប្រគល់ទៅក្រុមគ្រួសារសាច់ញាតិយកទៅធ្វើបុណ្យតាមប្រពៃណី៕