រថភ្លើងខំស៊ីផ្លេរ កង់បីឥណ្ឌាមិនព្រមបន្ថយល្បឿន បុកអូសជាងជាង៥០ម៉ែត្រក្រឡាប់ជាច្រើនជុំគាបជាប់គ្នាស្លា..ប់ម្នាក់យ៉ាងរ...ន្ធ.ត់

រាជធានីភ្នំពេញ ៖ ហេតុការណ៍ដ៍រន្ធត់មួយបានកើតឡើង ដោយបុរសម្នាក់ បានបើកកង់បីឥណ្ឌាមួយគ្រឿង ឆ្លងកាត់ផ្លូវរថភ្លើង ដោយមិនប្រយ័ត្ន និងពុំមានបារ៉ាស់បិទបើក គាប់ជួនរថភ្លើងមកដល់ បុកអូសពេញទំហឹង ប្រមាណជាង៥០ម៉ែត្រក្រឡាប់ជាច្រើនត្រឡប់ បណ្តាលឲ្យអ្នកបើកកង់បីស្លាប់យ៉ាងអាណោចអាធ័ម ។

ហេតុការណ៍នេះបានកើតឡើងកាលពីវេលាម៉ោង ១០និង៣០នាទីយប់ថ្ងៃទី៨ ខែមេសា ឆ្នាំ២០២៥ នៅតាមផ្លូវដែកខ្សែរាជធានីភ្នំពេញ-ខេត្តបាត់ដំបង ត្រង់ចំណុចផ្លូវឆ្លងកាត់ដែលពុំមានបារ៉ាស់បិទបើក ស្ថិតនៅក្នុងភូមិតាអិន សង្កាត់ស្នោ ខណ្ឌកំបូល រាជធានីភ្នំពេញ ។

តាមប្រភពព័ត៌មាន បានឲ្យដឹងថា មុនពេលកើតហេតុ បុរសខាងលើ បានបើកកង់បីមួយគ្រឿងពណ៌ស ពាក់ស្លាកលេខ ភ្នំពេញ 1HF-7628 បានមកលេងផ្ទះបងប្អូននៅបុរីវីល្លៀម ស្ថិតនៅក្នុងភូមិរំដួល សង្កាត់ស្នោ ខណ្ឌកំបូល ចេញពីផ្ទះបងប្អូនក្នុងទិសដៅពីត្បូងទៅជើងដោយល្បឿនលឿន ដល់ចំណុចកើតហេតុ ក៏បើកឆ្លងកាត់ផ្លូវដែក ស្រាប់តែមានរថភ្លើងរាជធានីភ្នំពេញ-ខេត្តបាត់ដំបង ១ខ្សែដឹកអ្នកដំណើរ បើកពីលិចទៅកើត ប្រសព្វគ្នាក៏បុកអូសប្រមាណជាង៥០ម៉ែត្រ រុញក្រឡាប់រមៀលជាច្រើនត្រឡប់ជាប់គ្នា ស្លាប់អ្នកបើកកង់បីភ្លាមៗតែម្តង ។

បើតាមកាមេរ៉ាសុវត្ថិភាពដែលបំពាក់នៅលើរថភ្លើងខាងលើ មុនពេលដល់ចំណុចកើតហេតុ ដែលជាចំណុចផ្លូវដែកឆ្លងកាត់នោះ រថភ្លើងបានចុចស៊ីផ្លេរយ៉ាងរន្ថើន ដើម្បីឲ្យអ្នកដំណើរឆ្លងកាត់បានដឹង និងឈប់ តែមិនដឹងថាជនរងគ្រោះមិនឮ ឬបែបណានោះទេ ទើបគាត់មិនបន្ថយល្បឿន ឬឈប់ម៉ូតូកង់បីឡើយ គាត់នៅតែបើកលឿនស្លេវឆ្លងកាត់ផ្លូវដែក នោះហើយក៏ត្រូវរថភ្លើងបុកពេញទំហឹងតែម្ដង ។

ក្រោយកើតហេតុ រថភ្លើងបានបើកបន្តដំណើរចូលរាជធានីភ្នំពេញបាត់ បន្ទាប់មកនគរបាលខណ្ឌកំបូល បានចុះធ្វើការវាស់វែងនាំយកម៉ូតូកង់បីទៅរក្សាទុក និងប្រគល់សាកសពជូនក្រុមគ្រួសារយកទៅធ្វើបុណ្យតាមប្រពៃណី ដោយមិនទាន់ដឹងថា ដោះស្រាយគ្នាបែបណានៅឡើយទេ ៕