ខេត្តកំពង់ចាម ៖ មានការភ្ញាក់ផ្អើលខ្លាំង ខណៈជនមិនស្គាល់មុខបានប្រើគ្រាប់បែកដៃមួយគ្រាប់គប់ចូលស្ថានីយលក់ប្រេងឥន្ធនៈមួយកន្លែងសាវីមិច សំណាងល្អគ្មាននរណាម្នាក់ កើតអ្វីនោះទេ លុះសមត្ថកិច្ចបើកការស្រាវជ្រាវកំណត់មុខសញ្ញា និងឈានទៅដល់ការឃាត់ខ្លួនបានជនសង្ស័យជាប្អូន របស់ម្ចាស់ស្ថានីយលក់ប្រេងឥន្ធនៈខាងលើ ។
ហេតុការណ៍នេះបានកើតឡើងនៅវេលាម៉ោង ១និង១៥នាទីរំលងអធ្រាត ថ្ងៃទី២៥ ខែមេសា ឆ្នាំ២០២៥ នៅភូមិបឹងស្នាយ សង្កាត់សំបួរមាស ក្រុងកំពង់ចាម។
សូមបញ្ជាក់ថា ក្រោយមានព័ត៌មាន គប់គ្រាប់បែកចូលស្ថានីយ៍ប្រេងឥន្ទនៈនេះភ្លាម ក្រោមបទបញ្ជាពីលោកឧត្តមសេនីយ៍ស្នងការនគរបាលខេត្ត ក៏ដូចជាឯកឧត្តមអភិបាលខេត្ត បានឱ្យកម្លាំងជំនាញយកចិត្តទុកដាក់បន្តស្រាវជ្រាវរកជនសង្ស័យខាងលើ ខណៈក្នុងករណីផ្ទុះនេះ ធ្វើអោយខូតចបំណែកទៅប៉ះជញ្ជាំងផ្ទះនិងកញ្ចក់ផ្ទះ និងមិនមានមនុស្ស និង សត្វគ្រោះថ្នាក់ឡើយ ។
រហូតដល់ម៉ោង៨ព្រឹកថ្ងៃទី២៦មេសា ២០២៥ កម្លាំងសមត្ថកិច្ច បានប្រទះឃើញគ្រាប់បែកមួយគ្រាប់បែក១ទៀតនៅចំណុចខាងជើងការ៉ាសាំង ជិតបង្គោលភ្លើងចំងាយពីការាស់សាំង១០ម៉ែត្រ មានចងបង្កៃជាប់នឹងឈើជ្រុងស៊ាតក្នុងគុម្ពដើមពុទ្រា រហូតសមត្ថកិច្ចសហការជាមួយកម្លាំងនាយកដ្ឋានព្រហ្មទណ្ឌក្រសួងមហាផ្ទៃ ធ្វើការស្រាវជ្រាវឈានកំណត់អត្តសញ្ញាណជនសង្ស័យម្នាក់នឹងបានហៅ មកសួរនាំនៅអធិការដ្ឋាននគរបាលក្រុងកំពង់ចាម។
ជនសង្ស័យរូបនោះមានឈ្មោះឈុំ ដារ៉ែន ភេទប្រុស អាយុ២២ឆ្នាំ នៅភូមិបឹងស្នាយ សង្កាត់សំបួរមាស ក្រុងកំពង់ចាម ខេត្តកំពង់ចាមមុខ របរអ្នកបើកឡានទឹកស្រោចថ្នល់ បានឆ្លើយសារភាពថា ខ្លួនពិតជាបានបោកគ្រាប់បែកមួយគ្រាប់ចូលក្នុងស្ថានីយ៍លក់ប្រេងសាវីមិច និងបង្កៃគ្រាប់បែកមួយគ្រាប់ទៀតនៅខាងជើងការ៉ាស់សាំងស្ថិតនៅភូមិបឹងស្នាយសង្កាត់សំបួរមាស ក្រុងកំពង់ចាម ខេត្តកំពង់ចាម ពិតប្រាកដមែន ក្រោយរើសនៅកន្លែងចាក់ទឹកចូលរថយន្ត នៅភូមិព្រែកចាន់ សង្កាត់សំបួរមាស ក្រុងកំពង់ចាម ខេត្តកំពង់ចាម ដោយពេលនោះរើសបានចំនួន៥ ខ្លួនបានយកទៅបោកត្រីមួយគ្រាប់តែមិនផ្ទុះ និងបានប្រគល់ឱ្យសមត្ថកិច្ចចំនួន២គ្រាប់ សល់២គ្រាប់បានយកធ្វើ សកម្មភាពខាងលើ ដែលជាកន្លែងបងប្រុសបង្កើតរបស់ខ្លួនស្នាក់នៅ ដោយសារខឹងបងប្រុសបង្កើតស្ដីបន្ទោសឲ្យកុំឲ្យដើរលេងជាមួយមនុស្សខូច ទើបមានគំនុំឈានដល់យកគ្រាប់បែកគប់ចូលកន្លែងបងស្នាក់នៅដើម្បីបងដាច់ជីវិត តែសំណាងល្អគ្រាប់បែកនេះបានផ្ទុះឡើងបណ្ដាលឱ្យខូចខាតបេតុងជញ្ជាំងនិងកញ្ចក់។ ចំណែកបងប្រុសនិងប្រពន្ធដែលដេកក្នុងបន្ទប់ថ្នាក់នៅនោះមិនគ្រោះថ្នាក់នោះទេ សូម្បីតែសុនកនៅទីនេះមានច្រើនក្បាលត្រូវគេលួចបំពុលងាប់អស់។
បច្ចុប្បន្នជនសង្ស័យខាងលើ ត្រូវបានសមត្ថកិច្ចកសាងសំណុំរឿងចាត់ការបន្តតាមនីតិវិធីច្បាប់ ៕
