ខេត្តកំពង់ស្ពឺ៖ ដោយ អនុវត្តបទបញ្ជាលោកឧត្ដមសេនីយ៍ទោ ឃឹម សុកខៃ ស្នងការ នគរបាលខេត្ដកំពង់ស្ពឺ នៅថ្ងៃអាទិត្យទី២៧ ខែមេសា ឆ្នាំ២០២៥ វេលាម៉ោង១០និង៥០នាទី កម្លាំងអធិការដ្ឋាននគរបាលផ្នែកប្រឆាំងគ្រឿងញៀនស្រុកបសេដ្ឋ បានឃាត់មុខសញ្ញាសង្ស័យពាក់ព័ន្ធគ្រឿងញៀនម្នាក់ឈ្មោះ ឆុន នូ ហៅ រុំ ភេទប្រុស អាយុ៣១ឆ្នាំ រស់នៅភូមិម្រាលត្នោតត្បូង ឃុំពោធិម្រាល ស្រុកបសេដ្ឋ ខេត្តកំពង់ស្ពឺ ត្រួតពិនិត្យរកឃើញវត្ថុតាងមានម្សៅក្រាមសថ្លាសង្ស័យថាជាគ្រឿងញៀន០១កញ្ចប់ រួមជាមួយម៉ូតូ ពណ៌ខ្មៅ ផ្លាកលេខ ភ្នំពេញ1AZ-4553 មួយគ្រឿង ។ នេះបើយោងតាមផេកផ្លូវការរបស់ ស្នងការដ្ឋាននគរបាលខេត្តកំពង់ស្ពឺ ។
សមត្ថកិច្ចបានឲ្យដឹងថា មុខសញ្ញាខាងលើបានបញ្ជាក់ថាថ្នាំញៀនខ្លួនបានមកពីឈ្មោះ ផាន់ ថុន ភេទប្រុសអាយុ៤៥ឆ្នាំរស់នៅភូមិត្រពាំងអណ្តូង ឃុំនិទានស្រុកបសេដ្ឋ ។
លោកវរសេនីយ៍ឯក ចន សុភីត អធិការនគរបាលស្រុកបសេដ្ឋបានអោយដឹងថា ដោយបានការចង្អុលណែនាំពីលោកឧត្ដមសេនីយ៍ទោស្នងការ លោកឧត្ដមសេនីយ៍ត្រីទទួលផែនការងារប្រឆាំងបទល្មើសគ្រឿងញៀន និងបានការសម្របសម្រួលនីតិវិធី ពីឯកឧត្តមព្រះរាជអាជ្ញាអមសាលាដំបូងខេត្តកំពង់ស្ពឺ កំលាំងបានប្រតិបត្តិការធ្វើការឃាត់ខ្លួនមុខសញ្ញា ផាន់ ថុន រួមជាមួយឈ្មោះ ធឿងប៊ុនថា ភេទប្រុស អាយុ៤១ឆ្នាំ និងបន្ដឆែកឆេរដោយចាប់យកនិងដកហូតបានវត្ថុតាងរួមមាន៖
⁃ ម្សៅក្រាមសថ្លាសង្ស័យថាជាគ្រឿងញៀនចំនួន២៨កញ្ចប់។
⁃ ម៉ូតូ គ្មានផ្លាកលេខ០១គ្រឿង។
⁃ នឹងឧបករណ៍សម្រាប់ប្រើប្រាស់គ្រឿងញៀនមួយចំនួន។
បច្ចុប្បន្នកម្លាំងជំនាញបានបញ្ជូនមកអធិការដ្ឋានដើម្បីចំណាត់ការនីតិវិធី កសាងសំណុំរឿងបញ្ចូនទៅកាន់ការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តកំពង់ស្ពឺ ចាត់ការតាមនិតិវិធីបន្ដ៕
