ចាប់ឃាត់ខ្លួនស្ត្រីម្នាក់ ពាក់ព័ន្ធករណីឆបោកប្រាក់ ២៦,២០០ដុល្លារ រឿងរត់ការចូលក្របខណ្ឌនគរបាលជាតិ

ចាប់ឃាត់ខ្លួនស្ត្រីម្នាក់ ពាក់ព័ន្ធករណីឆបោកប្រាក់ ២៦,២០០ដុល្លារ រឿងរត់ការចូលក្របខណ្ឌនគរបាលជាតិ

ខេត្តបាត់ដំបង ៖ យោងតាមផេកផ្លូវការរបស់ បញ្ជាការដ្ឋានកងរាជអាវុធហត្ថខេត្ដបាត់ដំបង បានឲ្យដឹងថា អាវុធហត្ថខេត្តបាត់ដំបង បានធ្វើការចាប់ឃាត់ខ្លួនស្ត្រីម្នាក់ ពាក់ព័ន្ធករណីឆបោកប្រាក់ ២៦,២០០ដុល្លារ រឿងរត់ការចូលក្របខណ្ឌនគរបាលជាតិ ។

សូមបញ្ជាក់ថា កាលពីវេលាម៉ោង ១០ និង ១០ នាទី ថ្ងៃទី ១៤ ខែឧសភា ឆ្នាំ ២០២៥ ចំណុចបុរីរំចេក ភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង កម្លាំងការិយាល័យជំនាញបានឃាត់ខ្លួនជនសង្ស័យម្នាក់ ឈ្មោះ សុង សោភ័ណ្ឌ ភេទ ស្រី អាយុ ៤៧ ឆ្នាំ មុខរបរ លក់ដូរ ស្នាក់នៅចំណុចខាងលើ ពីបទ ឆបោក (ប្រាក់) តាមបណ្តឹងរបស់ជនរងគ្រោះ ឈ្មោះ ឈឿន ឈុំ ភេទប្រុស អាយុ ៥៧ ឆ្នាំ មុខរបរ ធ្វើស្រែ ស្នាក់នៅភូមិអំពិល ឃុំអំពិលប្រាំដើម ស្រុកបរវេល ខេត្តបាត់ដំបង ប្រព្រឹត្តកាលពីថ្ងៃទី០៦ ខែឧសភា ឆ្នាំ២០២៥ និង ថ្ងៃទី១៤ ខែឧសភា ឆ្នាំ២០២៥ នៅចំណុចខាងលើ ដោយជនសង្ស័យបានយកប្រាក់ពីជនរងគ្រោះចំនួន ២៦២០ ដុល្លារ ដើម្បីរត់ការយកឈ្មោះកូនរបស់ជនរងគ្រោះចូលក្របខ័ណ្ឌមន្រ្តីនគរបាលជាតិក្នុងឆ្នាំ ២០២៥ បាន ដោយមិនចាំបាច់ប្រលងចូល ទាំងដែលក្រសួងមហាផ្ទៃមិនមានជ្រើសរើសមន្ត្រីនគរបាលជាតិថ្មីក្នុងឆ្នាំ ២០២៥ ឡើយ ។

ក្នុងនោះសមត្ថកិច្ចដកហូត វត្ថុតាងរួមមាន ៖

១.បញ្ជីរាយនាមបេក្ខជនប្រឡងជាប់ក្របខណ្ឌមន្រ្តីនគបាល ឆ្នាំ២០២៥ ចំនួន ០២ សន្លឹក

២.លិខិតស្នើសុំចូលក្របខណ្ឌមន្រ្តីនគបាលជាតិចំនួន ០១ សន្លឹក

៣.លិខិតធានាឪពុក ម្តាយ ឬ អាណាព្យាបាល ចំនួន ០៣ សន្លឹក

៤.ពាក្យស្នើសុំចំនួន ០៨ សន្លឹក

៥.ពាក្យសុំចូលបម្រើការងារក្នុងក្រសួងមហាផ្ទៃចំនួន ០១ សន្លឹក

៦.លិខិតធានា ចំនួន ០១ សន្លឹក

៧.លិខិតបញ្ជាក់ចំនួន ០១ សន្លឹក

៨.លិខិតបញ្ជាក់កិរិយាមាយាទចំនួន ០១ សន្លឹក

៩.វិញ្ញាប័ណ្ណបត្របណ្តោះអាសន្នមធ្យមសិក្សាទុតិយភូមិ ចំនួន ០១ សន្លឹក

១០. អត្តសញ្ញាណប័ណ្ណ កូពី ចំនួន ០១ សន្លឹក

១១.សៀវភៅគ្រួសារ កូពី ចំនួន ០១ សន្លឹក