ម៉ូតសក់ថ្មីជាប់ក្បាលក្មេងទំនើង ក្រោយបង្ហោះម៉ូតូអួតគ្នា សម្ញ៉ែងភាពឡូយបង្អួតស្រី!

ខេត្តកំពង់ស្ពឺ ៖ យោងតាមផេកផ្លូវការរបស់ ស្នងការដ្ឋាននគរបាលខេត្តកំពង់ស្ពឺ បានឲ្យដឹងថា នៅថ្ងៃទី៥ ខែមិថុនា ឆ្នាំ២០២៥ វេលាម៉ោង ១៥និង ១៥នាទី កំលាំងនគរបាលព្រហ្មទណ្ឌ បានទទួលព័ត៌មាន ប្រភពពីមហាជនរាយការណ៍ចូលក្នុងផេកផ្លូវការស្នងការដ្ឋាននគរបាលខេត្ដកំពង់ស្ពឺ ប្រតិកម្មរហ័ស ថាមានករណីក្មេងទំនេីងបង្ហោះម៉ូតូ នៅលើផ្លូវបេតុង ភូមិទន្លេកន្ទិល ឃុំត្រពាំងគង ស្រុកសំរោងទង ។

ដោយបានការចង្អុលណែនាំពីលោកឧត្ដមសេនីយ៍ទោ ឃឹម សុកខៃ ស្នងការ នៃស្នងការដ្ឋាននគរបាលខេត្ដកំពង់ស្ពឺ និងការដឹកនាំស្រាវជ្រាវពីលោកឧត្ដមសេនីយ៍ត្រី សម សាក់ និងលោកឧត្ដមសេនីយ៍ត្រី រស់ រដ្ឋា ស្នងការរង ដឹកនាំកំលាំងចុះស្រាវជ្រាវ សហការជាមួយអធិការដ្ឋាននគរបាលស្រុកសំរោងទង ធ្វើការឃាត់បានមុខសញ្ញាក្មេងទំនើងជាអ្នកបើកម៉ូតូបង្ហោះបានម្នាក់ ឈ្មោះស៊ីម វិចិត្រ ភេទប្រុស អាយុ១៦ឆ្នាំ រស់នៅភូមិត្រគៀត ឃុំត្រពាំងគង ស្រុកសំរោងទង ខេត្តកំពង់ស្ពឺ ដកហូត ម៉ូតូម៉ាក Honda Dream C125 ពណ៌ខ្មៅសេរីឆ្នាំ ២០២៥ ស្លាកលេខកំពង់ស្ពឺ 1X-1103 ។

មុខសញ្ញាបានទទួលស្គាល់និងឆ្លើយសារភាពថា ខ្លួននិងបក្ខពួកពិតជាបានធ្វើសកម្មភាពបង្ហោះម៉ូតូនៅលើផ្លូវសាធារណៈ ស្ទើរគ្រប់ទីកន្លែង ជាក់ស្ដែងថៃ្ងនេះខ្លួនបានមកបង្ហោះម៉ូតូជាមួយមិត្ដភ័ក្ភ ចំនួន០២ម៉ូតូ តែចៃដន្យពួកគេបានរត់គេចពេលសមត្ថកិច្ចចុះមកបង្រ្កាប ។

សមត្ថកិច្ចបានអនុវត្ដនីតិវិធី ដោយអញ្ជើញលោកឪពុក អ្នកម្ដាយមកធ្វើកិច្ចសន្យា ទទួលយកប្រុសកូនដើម្បីធ្វើការអប់រំណែនាំប្រដៅកុំឱ្យប្រព្រឹត្ដទង្វើបែបនេះជាលើកទីII ករណីលើកក្រោយអនុវត្តវិធានការច្បាប់ រីឯមធ្យោបាយម៉ូតូរក្សាទុករយៈពេល ៩០ថៃ្ង ជាបណ្ដោះអាសន្ននៅ ស្នងការដ្ឋាននគរបាលខេត្តកំពង់ស្ពឺ ៕ នុច