អន្តរជាតិ៖ សារព័ត៌មាន Bangkokpost បានចេញផ្សាយនៅថ្ងៃទី១១ ខែមិថុនា ឆ្នាំ២០២១ បានឲ្យដឹងថា រដ្ឋមន្រ្តីក្រសួងការពារជាតិ លោក Ismail Sabri Yaakob បាននិយាយកាលពីថ្ងៃសុក្រថា ប្រទេសម៉ាឡេស៊ីបានបន្តបិទទ្វារទូទាំងប្រទេសរបស់ខ្លួនចំនួនពីរសប្តាហ៍ទៀត ដោយសារតែចំនួនករណីប្រចាំថ្ងៃ Covid-19 នៅតែកើនឡើង។

រដ្ឋមន្រ្តីបាននិយាយថា ដំណាក់កាលនៃការបិទខ្ទប់ ដែលគ្រោងនឹងបញ្ចប់នៅថ្ងៃទី ១៤ ខែមិថុនា នឹងបន្តរហូតដល់ថ្ងៃទី ២៨ ខែមិថុនា។ លោកបានមានប្រសាសន៍ថា ការសម្រេចចិត្តដើម្បីពន្យារពេលត្រូវបានធ្វើឡើង ខណៈដែលការឆ្លងថ្មីនៅតែមានជាង ៥០០០ នាក់ក្នុងមួយថ្ងៃ។

ប្រទេសម៉ាឡេស៊ីបានវិលត្រឡប់ទៅរកការជាប់គាំងយ៉ាងខ្លាំងនៅក្នុងខែនេះ បន្ទាប់ពីការឆ្លងមេរោគប្រចាំថ្ងៃកើនឡើងដល់ចំនួន ៩,០០០នៅចុងខែឧសភា ដោយធ្វើឱ្យប៉ះពាល់ដល់ធនធានរបស់មន្ទីរពេទ្យរបស់ប្រទេសមួយនេះ។ មានតែវិស័យចាំបាច់ប៉ុណ្ណោះ ដែលអាចដំណើរការបាន ក្រោមការរឹតបន្តឹងជាថ្មី ដែលបានចូលជាធរមាន នៅថ្ងៃទី ១ ខែមិថុនា ។

ទិន្នន័យផ្លូវការ បានបង្ហាញថា អត្រាឆ្លងរបស់ប្រទេសនេះបានធ្លាក់ចុះ ចាប់តាំងពីវិធានការណ៍បានចូលជាធរមាន ហើយនៅសេសសល់ក្រោម ១ .០គិតត្រឹមថ្ងៃព្រហស្បតិ៍។ រដ្ឋមន្រ្តីក្រសួងសុខាភិបាល អាដាមបាបា (Adam Baba)បាននិយាយកាលពីថ្ងៃអង្គារថា ករណីនៅតែមានលើសពីកំរិតប្រចាំថ្ងៃ ៤.០០០ករណី ដែលរដ្ឋាភិបាលបានកំណត់ដើម្បីបញ្ចប់ការបិទខ្ទប់។

មេដឹកនាំរាជវង្សរបស់ប្រទេសនេះនឹងកោះប្រជុំនៅថ្ងៃទី ១៦ខែមិថុនា ដើម្បីពិភាក្សាពីវិធានការណ៍ ដើម្បីដោះស្រាយការផ្ទុះឡើងនៃជំងឺនេះ។ ការប្រជុំនេះ ត្រូវបានធ្វើឡើង បន្ទាប់ពីព្រះមហាក្សត្រកោះហៅមេដឹកនាំគណបក្សរៀងៗខ្លួន ចំពេលមានការខឹងសម្បារជាសាធារណៈជុំវិញការគ្រប់គ្រងរបស់រដ្ឋាភិបាលលើការមេរោគរាតត្បាត។

នៅពេលប្រកាសអំពីការបិទទ្វារនៅថ្ងៃទី ២៩ ខែឧសភា នាយករដ្ឋមន្រ្តីលោក Muhyiddin Yassin បាននិយាយថា រដ្ឋាភិបាលគ្រោងនឹងបើកឡើងវិញ នូវផ្នែកសេដ្ឋកិច្ច ដែលមិនទាក់ទងនឹងហ្វូងមនុស្សច្រើនទេ ប្រសិនបើការឆ្លងបានធ្លាក់ចុះបន្ទាប់ពីពីរសប្តាហ៍។ អ្វីដែលគេហៅថាការបិទខ្ទប់ដំណាក់កាលទី ២ គឺមានរយៈពេល ៤ សប្តាហ៍៕

ប្រភព៖ Bangkokpost ប្រែសម្រួល៖ នង​ ណារិន