អន្តរជាតិ ៖ សារព័ត៌មាន Channel News Asia បានចេញផ្សាយនៅថ្ងៃទី២៤ ខែមិថុនា ឆ្នាំ២០២១ បានឲ្យដឹងថា អតីតប្រធានាធិបតីហ្វីលីពីន លោក​Benigno Aquino III​ ដែលជាកូនប្រុសរបស់អ្នកតំណាងប្រជាធិបតេយ្យនៅអាស៊ីអាគ្នេយ៍ បានទទួលមរណភាព នៅ​ថ្ងៃព្រហស្បតិ៍ នេះ(២៤ មិថុនា) បន្ទាប់ពីបានសម្រាកព្យាបាលនៅមន្ទីរពេទ្យក្នុងទីក្រុងម៉ានីល។

យ៉ាងណាក៏ដោយ នៅមុនសេចក្តីប្រកាសអំពីការស្លាប់របស់លោក Benigno Aquino III សេចក្តីរាយការណ៍មួយផ្សេងទៀតបានអះអាងថា លោកត្រូវបានជួយសង្គ្រោះ នៅក្នុងមន្ទីរពេទ្យកាពីតូល (Capitol Medical Centre) នៅក្នុងទីក្រុងក្វេហ្សុន (Quezon) នៅព្រឹកថ្ងៃព្រហស្បតិ៍នេះ ប៉ុន្តែព័ត៌មានពាក់ព័ន្ធផ្សេងៗទៀត មិនត្រូវបានទម្លាយឲ្យដឹងនោះឡើយ។ ​

ដោយឡែកប្អូនស្រីរបស់ Benigno Aquino III គឺលោកស្រី គ្រីស អាគីណូ (Kris Aquino) ដែលត្រូវជាតារាសម្តែងល្បីឈ្មោះមួយរូបនៅហ្វីលីពីន ក៏បានបង្ហាញមុននៅមន្ទីរពេទ្យទីក្រុងម៉ានីលផងដែរ ប៉ុន្តែលោកស្រីមិនបានថ្លែងអ្វីនោះឡើយ។

សេចក្តីថ្លែងការណ៍របស់តុលាការកំពូលលោក Marvic Leonen ដែលត្រូវបានតែងតាំងដោយលោក Aquino កាលពីឆ្នាំ ២០១២ បាននិយាយថា«​​ពិតជាគួរឱ្យសោកស្តាយណាស់ ដែលខ្ញុំបានដឹងនៅព្រឹកនេះ ពីការទទួលមរណភាពរបស់អតីតប្រធានាធិបតី Benigno Aquino»។

សេចក្តីថ្លែងការណ៍បាននិយាយថា «ជាកិត្តិយសណាស់​ ដែលបានបម្រើជាមួយគាត់»។

គួរបញ្ជាក់ថា លោក Benigno Aquino III បានកាន់់តំណែងជាប្រធានាធិបតីហ្វីលីពីន ចាប់ពីឆ្នាំ២០១០ ដល់ឆ្នាំ២០១៦ ហើយចំពោះការស្លាប់របស់លោកក្នុងវ័យ ៦១ឆ្នាំនេះ គឺមិនទាន់មានប្រភពណាមួយបញ្ជាក់ថា លោកបានជួបបញ្ហា ឬមានជំងឺអ្វីឲ្យប្រាកដឡើយ៕

ប្រភព៖ Channel News Asia ប្រែសម្រួល៖ នង ណារិន