អន្តរជាតិ៖ ឧទ្ធម្ភាគចក្រជាង ១០០ គ្រឿងផលិតនៅរុស្ស៊ី បានធ្លាក់ក្នុងកណ្តាប់ដៃពួកតាលីបង់ នេះបើយោងតាមប្រធានក្រុមហ៊ុននាំចេញអាវុធរដ្ឋរុស្ស៊ី។ ក្រុមជីហាដ បានធ្វើឱ្យពិភពលោកភ្ញាក់ផ្អើល ដោយល្បឿនដែលពួកគេបានគ្រប់គ្រង ដើម្បីដណ្តើមយកអាហ្វហ្គានីស្ថានមកវិញ។ នេះបើយោងតាមការចេញផ្សាយដោយសារព័ត៌មាន Express នៅថ្ងៃទី២៦ ខែសីហា ឆ្នាំ២០២១។
ក្រុមសកម្មប្រយុទ្ធអ៊ីស្លាម បានប្រយុទ្ធនិងកងទ័ពរបស់អតីតប្រធានាធិបតី Ashraf Ghani ដោយពួកគេបានវាយលុកប្រទេសនិងចូលទីក្រុងកាប៊ុល ដើម្បីដណ្តើមអំណាចមកវិញ។ ក្រុម តាលីបង់ បានទទួលជ័យជម្នះជាប្រវត្តិសាស្ត្ររបស់ពួកគេ បើទោះបីជាប្រឈមមុខនឹងសត្រូវរហូតដល់ ៣០០.០០០ នាក់ និងបំពាក់ឧបករណ៍ជាច្រើនពាន់លានដុល្លារក៏ដោយ។
ស្របពេលដែលក្រុម តាលីបង់ បានវាយលុកនឹងកងទ័ពអាហ្វហ្គានីស្ថាននោះ ក្រុមនេះបានកាន់កាប់ឃ្លាំងអាវុធ និងយានយន្តធំៗ រួមទាំងរឹបអូសឧទ្ធម្ភាគចក្រ Mi-17 Hip យ៉ាងតិច១០០គ្រឿង ដែលជាយន្តហោះដឹកជញ្ជូនដែលផលិតដោយរុស្ស៊ី ដែលអាមេរិកបានទិញសម្រាប់កងកម្លាំងប្រដាប់អាវុធអាហ្វហ្គានីស្ថាន។
យោងតាមទីភ្នាក់ងារព័ត៌មាន អ៊ីនធឺហ្វេក លោក អាឡិចសាន់ឌឺ មីឃីវ ប្រធានក្រុមហ៊ុននាំចេញរបស់រុស្ស៊ី បាននិយាយថា« ឧទ្ធម្ភាគចក្រនៅទីនោះមានជាង ១០០ ប្រភេទផ្សេងៗគ្នា»។ របាយការណ៍កាលពីខែកក្កដា ពីអគ្គអធិការពិសេសអាមេរិក សម្រាប់ការស្ថាបនាឡើងវិញនៅអាហ្វហ្គានីស្ថាន បាន និយាយថា យោធាអាហ្វហ្គានីស្ថាន មានឧទ្ធម្ភាគចក្រ Mi-17 ចំនួន៥៦គ្រឿង ដែលក្នុងនោះមានតែ ៣២ គ្រឿង ប៉ុណ្ណោះ ដែលអាចប្រើបាននៅក្នុងប្រទេស។
សូមជម្រាបថា ប្រទេសរុស្ស៊ី នៅថ្ងៃពុធនេះបានប្រកាសថា ខ្លួននឹងចាប់ផ្តើមជម្លៀសពលរដ្ឋរបស់ខ្លួនយ៉ាងតិច ៥០០ នាក់ចេញពីអាហ្វហ្គានីស្ថាន តាមយន្តហោះដឹកជញ្ជូនចំនួន៤គ្រឿង។ ក្រសួងការបរទេសរុស្ស៊ី បាននិយាយថា ខ្លួននឹងមិនបិទស្ថានទូតរបស់ខ្លួននៅក្នុងប្រទេសអាហ្វហ្គានីស្ថាននោះទេ ហើយនឹងធ្វើការពិគ្រោះយោបល់ផ្នែកសន្តិសុខជាមួយមន្រ្តីតាលីបង់ ចាប់តាំងពីការដួលរលំទីក្រុងកាប៊ុល កាលពីសប្តាហ៍មុន។
ទន្ទឹមនឹងនេះដែរ ការិយាល័យការបរទេសអង់គ្លេស បានព្រមានជនជាតិអង់គ្លេសដែលព្យាយាមភៀសខ្លួនចេញពីអាហ្វហ្គានីស្ថាន ចៀសវាងការធ្វើដំណើរទៅកាន់អាកាសយានដ្ឋានអន្តរជាតិកាប៊ុល ដោយសារតែ« ការគំរាមកំហែងជាបន្តបន្ទាប់ នៃការវាយប្រហារភេរវកម្ម»។ ការព្រមាននេះកើតមានឡើង ខណៈដែលជនស៊ីវិលរាប់ពាន់នាក់ បន្តធ្វើដំណើរទៅកាន់អាកាសយានដ្ឋាន បន្ទាប់ពីការវាយលុករបស់ក្រុមតាលីបង់នៅអាហ្វហ្កានីស្ថាន។
ក្នុងនោះ ប្រមុខចារកម្មជឿជាក់ថា មានហានិភ័យខ្ពស់ដែលក្រុមជ្រុលនិយមមកពី Isis-K ជាក្រុមដែលមានទំនាក់ទំនងជាមួយរដ្ឋអ៊ីស្លាម កំពុងរៀបចំផែនការវាយប្រហារសម្លាប់មនុស្ស៕
ប្រភព៖ Express ប្រែសម្រួល៖ នង ណារិន
