អន្តរជាតិ៖ ទីភ្នាក់ងារអង្គការសុខភាពពិភពលោក អំពាវនាវឱ្យមានវិធានការបន្ទាន់ ដើម្បីដោះស្រាយការគំរាមកំហែងបរិស្ថានដ៏ធំបំផុតមួយ ចំពោះសុខភាពមនុស្សដោយអាស៊ីអាគ្នេយ៍ គឺជាតំបន់ដែលរងផលប៉ះពាល់ធ្ងន់ធ្ងរបំផុត។
បើតាមការចេញផ្សាយដោយសារព័ត៌មាន Al Jazeera នៅថ្ងៃទី២៤ ខែកញ្ញា ឆ្នាំ២០២១ បានឲ្យដឹងថា អង្គការសុខភាពពិភពលោក(WHO) បានរឹតបន្តឹងគោលការណ៍ណែនាំ គុណភាពខ្យល់របស់ខ្លួន ជាលើកដំបូង ចាប់តាំងពីឆ្នាំ ២០០៥ ដោយព្រមានថា ការបំពុលបរិយាកាស គឺជាការគំរាមកំហែងបរិស្ថានដ៏ធំបំផុតមួយ ចំពោះសុខភាពមនុស្ស ដែលបណ្តាលឱ្យមនុស្សស្លាប់៧លាននាក់ក្នុងមួយឆ្នាំ។
គោលការណ៍ណែនាំថ្មីនេះ ត្រូវបានរៀបចំឡើងសម្រាប់កិច្ចប្រជុំកំពូលអាកាសធាតុពិភពលោក COP26 ដែលបានរៀបចំឡើងនៅទីក្រុង Glasgow ចាប់ពីថ្ងៃទី៣១ ខែតុលាដល់ថ្ងៃទី១២ ខែវិច្ឆិកា។
ទីភ្នាក់ងារសុខភាពរបស់អង្គការសហប្រជាជាតិបាននិយាយកាលពីថ្ងៃពុធសប្តាហ៍នេះថា «ចំណាត់ការបន្ទាន់គឺត្រូវការជាចាំបាច់ ដើម្បីកាត់បន្ថយការប៉ះពាល់នឹងការបំពុលបរិយាកាស ដោយចាត់ថ្នាក់បន្ទុកជំងឺដោយសារខ្យល់ពុលដូចគ្នានឹងការជក់បារី និង ការទទួលទានអាហារគ្មានសុខភាព»។
ជាមួយគ្នានេះផងដែរ អង្គការសុខភាពពិភពលោកបានកែសម្រួលកម្រិតការណែនាំគុណភាពខ្យល់ស្ទើរតែទាំងអស់ ដោយព្រមានថា កម្រិតបំពុលខ្យល់ដែលលើសពីគោលការណ៍នឹងហានិភ័យយ៉ាងសំខាន់ចំពោះសុខភាព។
ក្នុងនោះ លោក Tedros Adhanom Ghebreyesus ប្រធានអង្គការសុខភាពពិភពលោក បានមានប្រសាសន៍ថា« ការបំពុលបរិយាកាសគឺជាការគំរាមកំហែងដល់សុខភាព នៅក្នុងប្រទេសទាំងអស់ ប៉ុន្តែវាប៉ះពាល់ដល់ប្រជាជននៅក្នុងប្រទេសដែលមានចំណូលទាបនិងមធ្យមខ្លាំងបំផុត»។
អង្គការសុខភាពពិភពលោក បាននិយាយថា ខណៈដែលគុណភាពខ្យល់មានភាពប្រសើរឡើង គួរឱ្យកត់សម្គាល់ ចាប់តាំងពីទសវត្សរ៍ឆ្នាំ១៩៩០ នៅក្នុងប្រទេសដែលមានប្រាក់ចំណូលខ្ពស់ ចំនួនមនុស្សស្លាប់ និងបាត់បង់ជីវិតដោយមានសុខភាពល្អនៅលើពិភពលោក ស្ទើរតែធ្លាក់ចុះបន្តិច ដោយសារតែគុណភាពខ្យល់បានធ្លាក់ចុះ ជាទូទៅនៅក្នុងប្រទេសដទៃទៀតស្របតាមសេដ្ឋកិច្ចរបស់ពួកគេ។
គួរបញ្ជាក់ថា ទីភ្នាក់ងារសុខភាពរបស់អង្គការសហប្រជាជាតិបានចេញសេចក្តីណែនាំចុងក្រោយស្តីពីគុណភាពខ្យល់ឬ AQGs ក្នុងឆ្នាំ ២០០៥ ដែលជះឥទ្ធិពលយ៉ាងខ្លាំង ដល់គោលនយោបាយកាត់បន្ថយ ការបំពុលបរិស្ថានទូទាំងពិភពលោក៕
ប្រភព៖ Al Jazeera
