អន្តរជាតិ៖ ការិយាល័យសិទ្ធិមនុស្សរបស់អង្គការសហប្រជាជាតិ បានចេញ​តួលេខផ្លូវការជាលើកដំបូងរបស់ខ្លួន​គិតចាប់តាំងពីឆ្នាំ២០១៤​​មក​ អង្គការសហប្រជាជាតិបានប្រកាសថា​ មនុស្សយ៉ាងហោចណាស់ចំនួន ៣៥០.២០៩នាក់ ត្រូវបានសម្លាប់នៅក្នុងសង្គ្រាមរយៈពេល​១០ឆ្នាំនៅក្នុងប្រទេសស៊ីរី។

បើ​យោងតាមសារព័ត៌មាន Al Jazeera បានចេញផ្សាយនៅថ្ងៃទី២៦ ខែកញ្ញា ឆ្នាំ២០២១ បានឲ្យដឹងថា ប្រមុខផ្នែកសិទ្ធិមនុស្សរបស់អង្គការសហប្រជាជាតិ​ លោកស្រី មីឆែល​ បាឆេឡេ​ (Michelle Bachelet) បានបញ្ជាក់ថា​ តួលេខនេះគឺតិចជាងចំនួនមនុស្សដែលបានស្លាប់ពិតប្រាកដនៅក្នុងសង្គ្រាមនោះ។

លោកស្រី បាឆេឡេ​ បានឲ្យដឹងថា​ ក្នុងចំណោមអ្នកបាត់បង់ជីវិតទាំងនោះគឺមានស្ត្រីប្រហែល ៨%​ និងកុមារប្រហែល​ ៨%ដែរ។

ក្រុមឃ្លាំមើលអំពើហិង្សាក្នុងប្រទេសស៊ីរីដែលមានមូលដ្ឋាននៅក្នុងប្រទេសអង់គ្លេស កាលពីពេលថ្មីៗនេះបានប៉ាន់ស្មានថា​ ចំនួនអ្នកស្លាប់នៅក្នុងសង្គ្រាមរយៈពេល​១០ឆ្នាំ នៅក្នុងប្រទេសស៊ីរី គឺជាង ៦០ម៉ឺន៦ពាន់នាក់។

អង្គការសហប្រជាជាតិបានបញ្ឈប់ជាផ្លូវការនូវការរាប់ចំនួនអ្នកស្លាប់នៅក្នុងសង្គ្រាមនៅស៊ីរីនៅក្នុងខែមករា​ ឆ្នាំ២០១៤ ដោយបានលើកឡើងថា​ វាមិនអាចទៅរួចទេក្នុងការកត់ត្រាឲ្យបានសុក្រឹតនូវចំនួនអ្នកស្លាប់ ដែលបានកើនឡើងឥតឈប់ឈរនោះ។

គួរបញ្ជាក់ថា ការប្រយុទ្ធគ្នានៅក្នុងប្រទេសស៊ីរី បានចាប់ផ្តើមនៅក្នុងខែមីនា​ ឆ្នាំ២០១១ នៅពេលដែលអ្នកគាំទ្រគណបក្សប្រឆាំងបានក្រោកឈរកាន់អាវុធ បន្ទាប់ពីកងកម្លាំងសន្តិសុខបានបាញ់ទៅលើក្រុមបាតុករ ដែលទាមទារឱ្យមានសេរីភាពបន្ថែមទៀត នៅក្រោមការគ្រប់គ្រងបែបផ្តាច់ការរបស់ប្រធានាធិបតីអាសាដ៕

ប្រភព៖ Al Jazeera