អន្តរជាតិ៖ ឧត្តមសេនីយ៍ Mark Milley មន្ត្រីយោធាកំពូលរបស់សហរដ្ឋអាមេរិក បានផ្តល់ការបញ្ជាក់ជាផ្លូវការដំបូងរបស់សហរដ្ឋអាមេរិក អំពីការសាកល្បងអាវុធល្បឿនលឿនរបស់ចិន ដែលអ្នកជំនាញយោធានិយាយថា ហាក់ដូចជាបង្ហាញពីការខិតខំប្រឹងប្រែងរបស់ទីក្រុងប៉េកាំងចំពោះប្រព័ន្ធគន្លងផែនដី ដែលត្រូវបានរចនាឡើងដើម្បីគេចពីការការពារមីស៊ីលរបស់អាមេរិក។ នេះបើតាមសារព័ត៌មាន Channel News Asia ចេញផ្សាយនៅថ្ងៃទី២៨ ខែតុលា ឆ្នាំ២០២១។
មន្ទីរបញ្ចកោណមានការព្រួយបារម្ភ ក្នុងការបញ្ជាក់ដោយផ្ទាល់អំពីការធ្វើតេស្តរបស់ចិននៅរដូវក្ដៅនេះដែលត្រូវបានរាយការណ៍ជាលើកដំបូងដោយកាសែត Financial Times ។ ស្របពេលដែល ប្រធានាធិបតីលោក ចូ បៃដិន (Joe Biden) និង មន្ត្រីផ្សេងទៀតបានសម្តែងការព្រួយបារម្ភជាទូទៅអំពីការអភិវឌ្ឍអាវុធល្បឿនលឿនរបស់ចិនក៏ដោយ។
ប៉ុន្តែលោក Milley បានបញ្ជាក់យ៉ាងច្បាស់ពីការសាកល្បងមីស៊ីលរបស់ចិន ហើយបាននិយាយថា វាជិតដល់ពេល «Sputnik» ដោយសំដៅលើការបាញ់បង្ហោះផ្កាយរណបដែលបង្កើតដោយមនុស្សដំបូងបង្អស់នៅឆ្នាំ ១៩៧៥ របស់រុស្ស៊ី ដែលបានធ្វើឱ្យទីក្រុងមូស្គូឈានមុខគេក្នុងការប្រណាំងអវកាសក្នុងសម័យសង្គ្រាមត្រជាក់។
លោក Milley ប្រធានអគ្គសេនាធិការចម្រុះបានប្រាប់ទូរទស្សន៍ Bloomberg នៅក្នុងបទសម្ភាសមួយដែលបានចាក់ផ្សាយកាលពីថ្ងៃពុធទី ២៧ ខែតុលា ថា«អ្វីដែលយើងបានឃើញគឺជាព្រឹត្តិការណ៍ដ៏សំខាន់មួយនៃការសាកល្បងប្រព័ន្ធអាវុធលឿនជាងសំឡេង ហើយវាពិតជាគួរឱ្យព្រួយបារម្ភខ្លាំងណាស់»។
អ្នកជំនាញអាវុធនុយក្លេអ៊ែរបាននិយាយថា ការសាកល្បងអាវុធរបស់ចិនហាក់ដូចជាត្រូវបានបង្កើតឡើង ដើម្បីគេចពីការការពាររបស់សហរដ្ឋអាមេរិកតាមវិធីចំនួន ២ ។ ទីមួយ វាអាចផ្លាស់ទីក្នុងល្បឿនលឿនជាង ៥ ដងនៃល្បឿនសំឡេងឬប្រហែល ៦២០០ គីឡូម៉ែត្រក្នុងមួយម៉ោង ដែលធ្វើឱ្យពិបាកក្នុងការរកឃើញនិងស្ទាក់ចាប់។ ចំណុចទីពីរ ប្រភពប្រាប់សារព័ត៌មានរ៉យទ័រថា សហរដ្ឋអាម៉េរិកជឿថា ការសាកល្បងរបស់ចិនជាប់ពាក់ព័ន្ធនឹងអាវុធដែលមានសមត្ថភាពហោះជុំវិញផែនដីជាលើកដំបូង។ នោះជាអ្វីដែលអ្នកជំនាញយោធានិយាយថាជាគំនិតសង្គ្រាមត្រជាក់ដែលគេស្គាល់ថាជា «ការទម្លាក់គ្រាប់បែកតាមគន្លងប្រភាគ (Fractional Orbital Bombardment)»។
ទន្ទឹមនឹងនេះ កាលពីខែមុន លេខាធិការកងទ័ពអាកាសលោក Frank Kendall បាននិយាយអំពីការព្រួយបារម្ភរបស់លោកអំពីប្រព័ន្ធបែបនេះ ដោយប្រាប់អ្នកសារព័ត៌មានអំពីអាវុធដែលនឹងចូលទៅក្នុងគន្លងមួយ ហើយបន្ទាប់មកធ្លាក់ចុះមកលើគោលដៅមួយ។ លើសពីនេះ ប្រព័ន្ធការពារមីស៊ីលមិនអាចរកឃើញនិងស្ទាក់ចាប់វាបានទេ។
យ៉ាងណាមិញ ក្រសួងការបរទេសចិនបានបដិសេធចំពោះការចោទប្រកាន់របស់អាម៉េរិកថា៖« ចិនមិនបានសាកល្បងអាវុធនោះទេ។ វាមិនមែនជាមីស៊ីលនោះទេ វាគឺជាយានអវកាស»៕
ប្រភព៖ Channel News Asia
