ប៉េកាំង៖ ប្រទេសចិនបានរំលឹកកោះតៃវ៉ាន់ថា វត្តមាន និងចេតនារបស់ខ្លួនក្នុងការដណ្តើមយកកោះនេះ នៅតែមានច្រើន បន្ទាប់ពីបានបញ្ជូនយន្តហោះចម្បាំងទៅកាន់តំបន់នោះ។ ការបង្ហាញកម្លាំងនេះបានកើតឡើង ខណៈដែលគណៈប្រតិភូអាមេរិកធ្វើទស្សនកិច្ចលើកោះនេះ ជាការធ្វើដំណើរលើកទីពីរក្នុងខែវិច្ឆិកានេះ។
បើតាមសារព័ត៌មាន Express ចេញផ្សាយនៅថ្ងៃទី២៦ ខែវិច្ឆិកា ឆ្នាំ២០២១ បានឲ្យដឹងថា លោក Shi Yi អ្នកនាំពាក្យនៃបញ្ជាការដ្ឋានភាគខាងកើតកងទ័ពរំដោះប្រជាជនចិន(PLA) បាននិយាយថា ក្រុមនេះបាន «បន្តរៀបចំកងកម្លាំងជើងទឹក និងអាកាស ដើម្បីល្បាតជាមួយនឹងការត្រៀមខ្លួនប្រយុទ្ធនៅច្រកសមុទ្រតៃវ៉ាន់» ដោយបន្ថែមថា«សកម្មភាពបែបនេះគឺចាំបាច់ក្នុងការឆ្លើយតបទៅនឹងច្រកសមុទ្រឆ្លងកាត់ជាមួយស្ថានភាព»។
ប្រទេសចិននិយាយថា កោះតៃវ៉ាន់គឺជាផ្នែកមួយនៃប្រទេសចិន ហើយដើម្បីការពារអធិបតេយ្យភាព និងបូរណភាពទឹកដី គឺជាបេសកកម្មដ៏ពិសិដ្ឋរបស់ PLA និងគោលនយោបាយចិនតែមួយ។
បន្ទាប់ពីជំនួបកំពូលតាមប្រព័ន្ធវីដេអូអនឡាយ ប្រធានាធិបតីចិន និងអាមេរិក ដែលប្រធានាធិបតីអាមេរិក Joe Biden បានសង្កត់ធ្ងន់ថា អាមេរិកមិនគាំទ្រឯករាជ្យរបស់កោះតៃវ៉ាន់នោះទេ សហរដ្ឋអាមេរិក បានបញ្ជូនគណៈប្រតិភូសភាទៅកោះតៃវ៉ាន់ម្តងទៀត នៅថ្ងៃសុក្រសប្តាហ៍ ដើម្បីបំពេញទស្សនកិច្ច។
កោះតៃវ៉ាន់កាលពីថ្ងៃអង្គារសប្តាហ៍មុន បានអនុម័តថវិកាបន្ថែមដែលមានតម្លៃ៦.៤៧ពាន់លានផោន(៨.៦៣ ពាន់លានដុល្លារ) សម្រាប់កងទ័ពជើងទឹក និងទ័ពអាកាសរបស់កោះនេះ ដើម្បីទប់ទល់នឹងទំនើបកម្មយោធារបស់ចិនដីគោក និង«អាកប្បកិរិយាឈ្លានពានកាន់តែខ្លាំងឡើង»។
ទោះបីជាសហរដ្ឋអាមេរិក មិនទទួលស្គាល់កោះនេះជារដ្ឋឯករាជ្យក៏ដោយ ប៉ុន្តែទីក្រុងវ៉ាស៊ីនតោនបានប្តេជ្ញាការពារកោះមួយនេះ។
ប្រធានាធិបតី ស៊ី ជិនពីង នៅក្នុងជំនួបកំពូលជាមួយសមភាគីអាមេរិក លោក ស៊ីបានព្រមានលោក ចូ បៃដិនថា «កុំលេងជាមួយភ្លើង»ជុំវិញកោះតៃវ៉ាន់។
ទោះជាយ៉ាងណាក៏ដោយ លោក បៃដិន បានអះអាងឡើងវិញនូវការគាំទ្ររបស់លោកចំពោះលទ្ធិប្រជាធិបតេយ្យនៅតៃវ៉ាន់។
បន្ថែមពីនេះ លោក Shi បានបន្ថែមថា«កងទ័ពបញ្ជាការនឹងចាត់វិធានការចាំបាច់ ដើម្បីទប់ទល់យ៉ាងម៉ឺងម៉ាត់រាល់ការគំរាមកំហែង និងការបង្កហេតុ ហើយការពារយ៉ាងម៉ឺងម៉ាត់នូវអធិបតេយ្យភាពជាតិ និងបូរណភាពទឹកដី»៕
ប្រភព៖ Express
