សៀងហៃ៖ ក្រសួងការបរទេសចិន បានកោះហៅឯកអគ្គរដ្ឋទូតជប៉ុននៅទីក្រុងប៉េកាំង សម្រាប់កិច្ចប្រជុំបន្ទាន់នៅល្ងាចថ្ងៃពុធទី ១ ខែធ្នូ បន្ទាប់ពីអតីតនាយករដ្ឋមន្ត្រីជប៉ុនលោក ស៊ីនហ្សូ អាបេ (Shinzo Abe) បាននិយាយថា ប្រទេសរបស់លោកនិងសហរដ្ឋអាមេរិក មិនអាចឈរស្ងៀមបានទេ ប្រសិនបើប្រទេសចិនវាយប្រហារកោះតៃវ៉ាន់។ នេះបើយោងតាមការចេញផ្សាយដោយសារព័ត៌មាន channel news asia នៅថ្ងៃទី០២ ខែធ្នូ ឆ្នាំ២០២១។
ជំនួយការរបស់រដ្ឋមន្ត្រីការបរទេសចិនលោកស្រី Hua Chunying បានហៅការអត្ថាធិប្បាយរបស់លោក អាបេ ថា ខុសឆ្គងនិងការរំលោភលើបទដ្ឋានជាមូលដ្ឋាននៃទំនាក់ទំនងរវាងចិននិងជប៉ុន នៅក្នុងជំនួបជាមួយឯកអគ្គរដ្ឋទូតជប៉ុនលោក Shui Hideo នេះបើយោងតាមសេចក្តីថ្លែងការណ៍របស់ក្រសួងការបរទេសចិន។
ការអត្ថាធិប្បាយរបស់លោក អាបេ «បានជំទាស់ដោយបើកចំហចំពោះអធិបតេយ្យភាពរបស់ប្រទេសចិន និងបានផ្តល់ការគាំទ្រយ៉ាងមុតមាំដល់កងកម្លាំងឯករាជ្យតៃវ៉ាន់»វាបានដកស្រង់សម្តីលោកស្រី Hua ។
យោងតាមសេចក្តីថ្លែងការណ៍របស់ក្រសួងការបរទេសចិន បាននិយាយថា «ប្រទេសចិនមានការប្រឆាំងយ៉ាងដាច់អហង្ការចំពោះរឿងនេះ»។
គួរបញ្ជាក់ថា កាលពីថ្ងៃពុធ ថ្លែងតាមរយៈប្រព័ន្ធវីដេអូ ទៅកាន់វេទិកាថ្នាក់តំបន់មួយ រៀបចំឡើងដោយវិទ្យាស្ថាននយោបាយរបស់តៃវ៉ាន់ លោក អាបេ បាននិយាយថា ការលុកលុយដោយប្រដាប់អាវុធលើកោះតៃវ៉ាន់នឹងបង្កគ្រោះថ្នាក់យ៉ាងធ្ងន់ធ្ងរដល់ប្រទេសជប៉ុន៕
ប្រភព៖ channel news asia
