វ៉ាស៊ីនតោន៖ សហរដ្ឋអាមេរិក និងសហភាពអឺរ៉ុបនៅថ្ងៃព្រហស្បតិ៍ (០២ ធ្នូ) បានសម្តែងការព្រួយបារម្ភយ៉ាងខ្លាំងចំពោះ «សកម្មភាពដែលបង្កឲ្យមានបញ្ហា និងឯកតោភាគី» របស់ចិននៅក្នុងសមុទ្រចិនខាងត្បូង ហើយបានសង្កត់ធ្ងន់លើតម្រូវការសម្រាប់ទំនាក់ទំនងជិតស្និទ្ធដើម្បីគ្រប់គ្រង«ការប្រកួតប្រជែង និងការប្រកួតប្រជែងជាប្រព័ន្ធ»ជាមួយទីក្រុងប៉េកាំង។ សេចក្តីថ្លែងការណ៍រួមនេះបានធ្វើឡើង បន្ទាប់ពីកិច្ចពិភាក្សានៅទីក្រុងវ៉ាស៊ីនតោន រវាងអនុរដ្ឋមន្ត្រីការបរទេសសហរដ្ឋអាមេរិក លោកស្រី Wendy Sherman និងអគ្គលេខាធិការនៃសេវាកម្មសកម្មភាពខាងក្រៅអឺរ៉ុបលោក Stefano Sannino ។ នេះបើយោងតាមការចេញផ្សាយដោយសារព័ត៌មាន Channel News Asia នៅថ្ងៃទី០៣ ខែធ្នូ ឆ្នាំ២០២១។
បើតាមសេចក្តីថ្លែងការណ៍រួមនេះ «បានសង្កត់ធ្ងន់លើសារៈសំខាន់នៃសហរដ្ឋអាមេរិក និងសហភាពអឺរ៉ុប ក្នុងការរក្សាទំនាក់ទំនងជាបន្ត និងជិតស្និទ្ធលើវិធីសាស្រ្តរៀងៗខ្លួន នៅពេលដែលយើងវិនិយោគ និងធ្វើឱ្យសេដ្ឋកិច្ចរបស់យើងរីកចម្រើន សហការជាមួយប្រទេសចិន តាមដែលអាចធ្វើបាន និងគ្រប់គ្រងការប្រកួតប្រជែង និងការប្រជែងជាប្រព័ន្ធរបស់យើងជាមួយប្រទេសចិនប្រកបដោយការទទួលខុសត្រូវ»។
សេចក្តីថ្លែងការណ៍ក៏បាននិយាយផងដែរថា ភាគីទាំងពីរបានពិភាក្សាអំពីការរំលោភសិទ្ធិនៅក្នុងប្រទេសចិន រួមទាំងការគាបសង្កត់លើជនជាតិភាគតិចសាសនានៅស៊ីនជាំង និងទីបេ និងការលុបបំបាត់ស្វ័យភាពនៅហុងកុង។ ពួកគេបានបង្ហាញពីការត្រៀមខ្លួន ដើម្បីធ្វើឱ្យស៊ីជម្រៅ ការចែករំលែកព័ត៌មាន របស់សហរដ្ឋអាមេរិក និងសហភាពអឺរ៉ុប លើព័ត៌មានមិនពិតដែលឧបត្ថម្ភឬគាំទ្រដោយប្រទេសចិន។
«ពួកគេបានសម្តែងការព្រួយបារម្ភយ៉ាងខ្លាំង ចំពោះសកម្មភាពដែលមានបញ្ហា និងជាឯកតោភាគីរបស់ចិន នៅក្នុងសមុទ្រចិនខាងត្បូង និងខាងកើត និងច្រកសមុទ្រតៃវ៉ាន់ ដែលបំផ្លាញសន្តិភាព និងសន្តិសុខក្នុងតំបន់ ហើយមានផលប៉ះពាល់ផ្ទាល់ដល់សន្តិសុខ និងវិបុលភាពនៃទាំងសហរដ្ឋអាមេរិក និងសហភាពអឺរ៉ុប»។ សេចក្តីថ្លែងការណ៍បានបន្ថែម។
សេចក្តីថ្លែងការណ៍នេះបានធ្វើឡើងបន្ទាប់ពីកិច្ចប្រជុំលើកទីពីរនៃកិច្ចសន្ទនារវាងសហរដ្ឋអាមេរិក និងសហភាពអឺរ៉ុប ស្តីពីប្រទេសចិន ដែលបានបង្កើតឡើងនៅឆ្នាំនេះ។ លោកស្រីSherman និងលោក Sannino នឹងត្រូវបន្តការពិភាក្សាទាក់ទងនឹងប្រទេសចិន ជាមួយនឹងការពិគ្រោះយោបល់កម្រិតខ្ពស់នៅឥណ្ឌូប៉ាស៊ីហ្វិកនៅថ្ងៃសុក្រនេះ។
បន្ថែមពីនេះ ប្រធានាធិបតីអាមេរិកលោក ចូ បៃដិន (Joe Biden) បានសង្កត់ធ្ងន់លើសារៈសំខាន់ នៃការធ្វើការយ៉ាងជិតស្និទ្ធជាមួយសម្ព័ន្ធមិត្ត ក្នុងការរុញច្រានប្រឆាំងនឹងអំណាច ដែលកំពុងកើនឡើងរបស់ប្រទេសចិន និងអាកប្បកិរិយាអះអាងកាន់តែខ្លាំងឡើងនៅទូទាំងពិភពលោក៕
ប្រភព៖ Channel News Asia
