ញូវដែលី៖ រុស្ស៊ី និងឥណ្ឌាបានចុះហត្ថលេខាលើកិច្ចព្រមព្រៀងពាណិជ្ជកម្ម និងសព្វាវុធទំនើប ក្នុងអំឡុងដំណើរទស្សនកិច្ចរបស់ប្រធានាធិបតីរុស្សីលោក វ្ល៉ាឌីមៀ ពូទីន ទៅកាន់ទីក្រុងញូវដែលី ដើម្បីពិភាក្សាជាមួយនាយករដ្ឋមន្ត្រីឥណ្ឌាលោក ណារេនដ្រា ម៉ូឌី នៅថ្ងៃចន្ទទី ៦ ខែធ្នូ រួមទាំងគម្រោងមួយដែលនឹងឃើញឥណ្ឌាផលិតកាំភ្លើងAK-203 ជាង៦០០,០០០ដើម។ នេះបើយោងតាមការចេញផ្សាយដោយសារព័ត៌មាន Channel News Asia នៅថ្ងៃទី០៧ ខែធ្នូ ឆ្នាំ២០២១។
លោក ពូទីន បានធ្វើដំណើរទៅកាន់ប្រទេសឥណ្ឌា ជាមួយរដ្ឋមន្ត្រីការពារជាតិ និងរដ្ឋមន្ត្រីការបរទេសរបស់រុស្ស៊ី ក្នុងដំណើរទស្សនកិច្ចមួយ ដែលឃើញប្រទេសទាំងពីរ ពង្រឹងទំនាក់ទំនងរបស់ពួកគេ ជាមួយនឹងកតិកាសញ្ញាសហប្រតិបត្តិការយោធា និងបច្ចេកទេស រហូតដល់ឆ្នាំ ២០៣១ និងការសន្យាជំរុញពាណិជ្ជកម្មប្រចាំឆ្នាំដល់ ៣០ ពាន់លានដុល្លារនៅឆ្នាំ ២០២៥ ។
ប្រធានាធិបតីរុស្ស៊ី កំពុងបំពេញទស្សនកិច្ចនៅប្រទេសឥណ្ឌា ចំពេលទំនាក់ទំនងកាន់តែតានតឹងរវាងរុស្ស៊ី និងសហរដ្ឋអាមេរិក ដែលជាសម្ព័ន្ធមិត្តដ៏សំខាន់របស់ឥណ្ឌា ដែលបានបង្ហាញអំពីកិច្ចសហប្រតិបត្តិការយោធាដែលកំពុងកើនឡើងរវាងទីក្រុងមូស្គូ និងញូវដេលី។
សេចក្តីថ្លែងការណ៍រួមដែលបានចេញផ្សាយបន្ទាប់ពីកិច្ចពិភាក្សាបានបង្ហាញថា៖«រុស្ស៊ី និងឥណ្ឌាបានបញ្ជាក់ជាថ្មីអំពីចេតនារបស់ពួកគេក្នុងការពង្រឹងកិច្ចសហប្រតិបត្តិការលើវិស័យការពារជាតិ រួមទាំងក្នុងការអភិវឌ្ឍរួមគ្នានៃការផលិតឧបករណ៍យោធា»។
បន្ថែមពីលើកិច្ចព្រមព្រៀងសម្រាប់ឥណ្ឌាក្នុងការផលិតកាំភ្លើង AK-203 រុស្ស៊ីបាននិយាយថា ខ្លួនចាប់អារម្មណ៍ក្នុងការបន្តផ្តល់ប្រព័ន្ធមីស៊ីលការពារដែនអាកាស S-400 ។
រដ្ឋមន្ត្រីការបរទេសឥណ្ឌាលោក Harsh Vardhan Shringla បាននិយាយថា ប្រទេសទាំងពីរបានចុះហត្ថលេខាលើកិច្ចព្រមព្រៀងវិនិយោគចំនួន ២៨ រួមទាំងកិច្ចព្រមព្រៀងលើដែកថែប ការកសាងនាវា ធ្យូងថ្ម និងថាមពល។
លើសពីនេះ កិច្ចសន្យាឆ្នាំ ២០១៨ សម្រាប់ប្រព័ន្ធមីស៊ីល S-400 បច្ចុប្បន្នកំពុងត្រូវបានអនុវត្ត។ លោកបានបន្តថា ការផ្គត់ផ្គង់បានចាប់ផ្តើមក្នុងខែនេះ ហើយនឹងបន្តកើតឡើង ដោយសំដៅទៅលើ S-400 ។
គួរបញ្ជាក់ថា កិច្ចព្រមព្រៀងជាមួយទីក្រុងមូស្គូធ្វើឱ្យឥណ្ឌាប្រឈមមុខនឹងការដាក់ទណ្ឌកម្មពីសហរដ្ឋអាម៉េរិកនៅក្រោមច្បាប់របស់សហរដ្ឋអាម៉េរិកឆ្នាំ ២០១៧ ដែលមានគោលបំណងរារាំងប្រទេសនានាពីការទិញសព្វាវុធពីរុស្ស៊ី៕
ប្រភព៖ Channel News Asia
