ភូមា៖ ទូរទស្សន៍រដ្ឋរបស់ប្រទេសមីយ៉ាន់ម៉ា នៅថ្ងៃព្រហស្បតិ៍ (ថ្ងៃទី ៣ ខែកុម្ភៈ)បានរាយការណ៍ថា រដ្ឋាភិបាលយោធា បានប្រកាសពីការចោទប្រកាន់ពីបទសូកប៉ាន់ថ្មីមួយប្រឆាំងនឹងមេដឹកនាំស៊ីវិលដែលត្រូវបានទម្លាក់លោកស្រី អ៊ោង សានស៊ូជី(Aung San Suu Kyi)។ នេះបើតាមសារព័ត៌មាន Channel News Asia ចេញផ្សាយនៅថ្ងៃទី០៤ ខែកុម្ភៈ ឆ្នាំ២០២២។
ម្ចាស់ជ័យលាភីណូបែល លោកស្រី អ៊ុងសាន ស៊ូជី វ័យ៧៦ឆ្នាំ កំពុងស្ថិតក្រោមការកាត់ទោសក្នុងសំណុំរឿងជិតដប់មួយ ដែលដាក់បញ្ចូលគ្នានូវទោសអតិបរមា ដាក់ពន្ធនាគារយ៉ាងតិច១៥០ឆ្នាំ។ លោកស្រីត្រូវបានកាត់ទោសឱ្យជាប់ឃុំអស់រយៈពេល៦ឆ្នាំរួចទៅហើយសម្រាប់ករណីផ្សេងទៀត។
អ្នកនាំពាក្យរបស់យោធាមីយ៉ាន់ម៉ា ដែលបានផ្តួលរំលំរដ្ឋាភិបាលលោកស្រី អ៊ុងសាន ស៊ូជី ក្នុងរដ្ឋប្រហារកាលពីខែកុម្ភៈកន្លងទៅ មិនអាចទាក់ទងសុំការអត្ថាធិប្បាយបានទេ។
មេធាវីរបស់លោកស្រី អ៊ុងសាន ស៊ូជី ដែលត្រូវបានរារាំងមិនឱ្យនិយាយអំពីករណីរបស់លោកស្រី ក៏មិនអាចទាក់ទងសុំការអត្ថាធិប្បាយបានដែរ។
គូររម្លឹកថា កាលពីថ្ងៃទី៦ ខែធ្នូឆ្នាំមុន លោកស្រី អ៊ុងសាន ស៊ូជី ត្រូវបានកាត់ទោសឱ្យជាប់ពន្ធនាគាររយៈពេលពីរឆ្នាំ ពីបទញុះញង់ប្រឆាំងនឹងយោធា និងរយៈពេលពីរឆ្នាំទៀត ពីបទបំពានច្បាប់ទាក់ទងនឹងជំងឺកូវីដ-១៩។
ប្រមុខរដ្ឋាភិបាលលោក មីន អ៊ុងឡាំង (Min Aung Hlaing)ក្រោយមក«បានលើកលែងទោស» ការកាត់ទោសឱ្យជាប់គុកពីរឆ្នាំ នេះបើយោងតាមសេចក្តីថ្លែងការណ៍ដែលបានចេញផ្សាយនៅលើទូរទស្សន៍រដ្ឋ។
លើសពីនេះ នៅថ្ងៃទី១០ខែមករា ឆ្នាំ២០២២ លោកស្រីត្រូវបានគេរកឃើញថាមានពិរុទ្ធពីបទចោទប្រកាន់ចំនួនពីរទាក់ទងនឹងការនាំចូលដោយខុសច្បាប់ វិទ្យុទាក់ទងនិងការបំពានច្បាប់នៃមេរោគឆ្លងកូវីដ១៩។
គួរបញ្ជាក់ថា លោកស្រី អ៊ុងសាន ស៊ូជី កំពុងប្រឈមមុខនឹងការប្រព្រឹត្តអំពើពុករលួយជាច្រើន ដែលនីមួយៗត្រូវផ្តន្ទាទោសដាក់ពន្ធនាគារ ១៥ ឆ្នាំ និងរំលោភលើទង្វើសម្ងាត់ផ្លូវការ។ ចាប់តាំងពីរដ្ឋប្រហារមក សម្ព័ន្ធមិត្តនយោបាយជាច្រើនរបស់លោកស្រី ត្រូវបានចាប់ខ្លួន ដោយសមាជិកម្នាក់នៃគណបក្សសម្ព័ន្ធជាតិដើម្បីប្រជាធិបតេយ្យ ដែលត្រូវបានបណ្តេញចេញ ត្រូវបាន កាត់ទោសប្រហារជីវិត ពីបទប្រព្រឹត្តអំពើភេរវកម្ម។ នាយករដ្ឋមន្ត្រីម្នាក់ត្រូវបានកាត់ទោសឱ្យជាប់ពន្ធនាគារ ៧៥ ឆ្នាំ ខណៈខ្លះទៀតកំពុងលាក់ខ្លួន៕
ប្រភព៖ Channel News Asia
