អន្តរជាតិ៖ សារព័ត៌មាន Channel News Asia បានចេញផ្សាយនៅថ្ងៃទី៣០ ខែមីនា ឆ្នាំ២០២១ បានឲ្យដឹងថា ប្រភពការទូត បាននិយាយកាលពីថ្ងៃច័ន្ទ ថា ប្រទេសអង់គ្លេស បានអំពាវនាវឱ្យមានការប្រជុំក្រុមប្រឹក្សាសន្តិសុខអង្គការសហប្រជាជាតិជាបន្ទាន់ ស្តីពីស្ថានភាពនៅប្រទេសមីយ៉ាន់ម៉ា ដែលក្រុមបាតុករប្រឆាំងរដ្ឋប្រហារត្រូវបានសម្លាប់កាលពីចុងសប្តាហ៍។

ប្រភពដដែលបាននិយាយថា សមាជិកក្រុមប្រឹក្សាសន្តិសុខ ចំនួន ១៥នាក់ នឹងចាប់ផ្តើមបើកកិច្ចប្រជុំនៅថ្ងៃពុធស្អែកនេះ ជាមួយនឹងការធ្វើសេចក្តីរាយការណ៍សង្ខេបស្តីពីស្ថានការណ៍ ដោយប្រេសិតពិសេសរបស់អង្គការសហប្រជាជាតិស្តីពីមីយ៉ាន់ម៉ា គឺលោកស្រីChristine Schraner Burgener។

ទោះបីជាយ៉ាងណា វាមិនច្បាស់ទេថា ក្រុមប្រឹក្សាសន្តិសុខនឹងអាចយល់ព្រមលើសេចក្តីប្រកាសថ្មីមួយនៅចុងបញ្ចប់នៃកិច្ចប្រជុំនេះ ដែលជាអ្វីដែលតម្រូវឱ្យមានការឯកភាពគ្នាក្នុងចំណោមសមាជិកដែលរួមមានរុស្ស៊ីនិងចិន។

នៅថ្ងៃទី ១០ ខែមីនា ក្រុមប្រឹក្សាសន្តិសុខជាលើកដំបូងបានចេញសេចក្តីប្រកាស ថ្កោលទោសយ៉ាងខ្លាំងចំពោះ« ការប្រើប្រាស់អំពើហិង្សាប្រឆាំងនឹងក្រុមអ្នកតវ៉ាដោយសន្តិវិធី» ដែលរួមមានទាំងស្ត្រីនិងកុមារផងដែរ។

ការប្រកាសនេះត្រូវបានដឹកនាំដោយអតីតមហាអំណាចអាណានិគមអង់គ្លេស ប៉ុន្តែក្រុមប្រឹក្សាសន្តិសុខនឹងមិនយល់ព្រមដើម្បីយោងទៅលើ« រដ្ឋប្រហារ» ឬលទ្ធភាពនៃការដាក់ទណ្ឌកម្មអន្តរជាតិ ប្រសិនបើយោធាមីយ៉ាន់ម៉ានៅតែបន្តវាយប្រហារទៅលើក្រុមបាតុករ។

បញ្ហានេះភាគច្រើនបណ្តាលមកពីការប្រឆាំងពីចិននិងរុស្ស៊ី ប៉ុន្តែក៏មកពីសមាជិកក្រុមប្រឹក្សាអាស៊ីផ្សេងទៀតដូចជាឥណ្ឌានិងវៀតណាមដែរផង។

កាលពីថ្ងៃទី៤ខែកុម្ភៈ ក្រុមប្រឹក្សាសន្តិសុខ បានសម្តែងការព្រួយបារម្ភយ៉ាងខ្លាំង ចំពោះរដ្ឋប្រហារយោធានៅក្នុងប្រទេសមីយ៉ាន់ម៉ា និងបានអំពាវនាវឱ្យមានការដោះលែងអ្នកជាប់ឃុំទាំងអស់ រួមទាំងលោកស្រី អ៊ុង សានស៊ូជី ផងដែរ។

អង្គការសហប្រជាជាតិ បាននិយាយថា យ៉ាងហោចណាស់មនុស្ស ១០៧ នាក់ ក្នុងនោះមានកុមារ ៧ នាក់ត្រូវបានសម្លាប់កាលពីថ្ងៃសៅរ៍៕  ប្រភព៖ Channel News Asia