អន្តរជាតិ៖ សារព័ត៌មាន The Irrawaddy បានចេញផ្សាយនៅព្រឹកថ្ងៃទី៣០ ខែមីនា ឆ្នាំ២០២១ បានឲ្យដឹងថា កុមារប្រហែល ១២ នាក់ ស្ថិតក្នុងចំណោមយ៉ាងហោច ១២៧នាក់ ត្រូវបានសម្លាប់ នៅទូទាំងប្រទេសមីយ៉ាន់ម៉ា ដោយកងកម្លាំងរបស់របបយោធាកាលពីចុងសប្តាហ៍នេះ ដែលនាំឱ្យចំនួនកុមារដែលត្រូវបានសម្លាប់មានច្រើនជាង ៣០ នាក់ ចាប់តាំងពីថ្ងៃទី ១ ខែកុម្ភៈ។

ចំនួនកុមារដែល ស្លាប់ បានកើនឡើងដល់ជាង ២០ នាក់កាលពីសប្តាហ៍មុន ដោយក្មេងស្រីម្នាក់មានអាយុ ៣ ខែ ក្មេងស្រីអាយុ ៦ ឆ្នាំ និងក្មេងប្រុសអាយុ ១៤ ឆ្នាំម្នាក់ ត្រូវបានសម្លាប់នៅទីក្រុង Mandalay ។ ចំនួនកុមារដែលត្រូវបានសម្លាប់អាចកើនឡើងខ្ពស់ដោយសារអាយុជនរងគ្រោះជាច្រើនមិនអាចត្រូវបានគេបញ្ជាក់។

នៅក្នុងការបង្ក្រាបដ៏ឃោរឃៅមួយទៅលើក្រុមអ្នកតវ៉ាលទ្ធិប្រជាធិបតេយ្យកាលពីថ្ងៃសៅរ៍ ក្មេងតូចៗចំនួន ១១ នាក់ត្រូវបានបាញ់សម្លាប់ ភាគច្រើននៃពួកគេពេលកំពុងលេងនៅខាងក្នុងឬនៅមុខផ្ទះរបស់ពួកគេ។ ថ្ងៃសៅរ៍គឺជាថ្ងៃបង្ហូរឈាមបំផុតចាប់តាំងពីរដ្ឋប្រហារ ត្រូវបានចាប់ផ្តើម ដោយមានមនុស្សជាង ១០០ នាក់បានស្លាប់ក្នុងរយៈពេល ២៤ ម៉ោង។

អ្នកស្លាប់ម្នាក់ក្នុងចំណោមអ្នកដែលត្រូវគេសម្លាប់នោះ គឺជាក្មេងស្រីតូចម្នាក់ ដែលកំពុងលេងនៅមុខផ្ទះរបស់នាងក្នុងទីក្រុងMawlamyine នាងត្រូវគេបាញ់ចំក្បាល ។

យ៉ាងហោចណាស់មានកុមារចំនួន ៣ នាក់ត្រូវបានសម្លាប់នៅក្នុងតំបន់ម៉ាន់ដាឡាយ រួមមានក្មេងអាយុ ១៤ ឆ្នាំនៅMyingyan អាយុ ១៤ ឆ្នាំនៅ Meikhtila និង អាយុ ១៦ ឆ្នាំ នៅAmarapura។

សេចក្តីថ្លែងការណ៍ផ្លូវការមួយកាលពីថ្ងៃទី ២៣ ខែមីនា បានឲ្យដឹងថា កុមារនៅតែបន្តស្ថិតក្នុងចំណោមគោលដៅនៃការវាយប្រហារដ៏សាហាវទាំងនេះទៅលើក្រុមអ្នកតវ៉ាដោយសន្តិវិធីដែលគួរឱ្យរន្ធត់។ « ការស្លាប់របស់កុមារទាំងនេះ ត្រូវបានគេយកចិត្តទុកដាក់ជាពិសេស ដោយសារតែពួកគេត្រូវបានគេរាយការណ៍ថា បានស្លាប់ពេលកំពុងនៅផ្ទះដែលពួកគេគួរតែមានសុវត្ថិភាពពីគ្រោះថ្នាក់។ ការដែលកុមារជាច្រើនត្រូវបានសម្លាប់ស្ទើរតែរាល់ថ្ងៃ ពេលនេះបានបង្ហាញពីការមិនយកចិត្តទុកដាក់ចំពោះអាយុជីវិតរបស់ពលរដ្ឋ ដោយកងកម្លាំងសន្តិសុខ»។

គិតត្រឹមថ្ងៃអាទិត្យសប្តាហ៍មុន មនុស្សប្រហែល ៥០០ នាក់ ត្រូវបានសម្លាប់ដោយកងកម្លាំងរបបយោធា ហើយមនុស្សជាង ២៥០០ នាក់ត្រូវបានចាប់ខ្លួន៕ ប្រភព៖ The Irrawaddy