អន្តរជាតិ៖ ប្រធានាធិបតីអាមេរិក ប្រាប់សមភាគីអ៊ុយក្រែនថា អាមេរិកនិងសម្ព័ន្ធមិត្តនឹងឆ្លើយតប«យ៉ាងរហ័ស និងនិងយ៉ាងម៉ឺងម៉ាត់»ចំពោះការឈ្លានពានរបស់រុស្ស៊ី។ នេះបើយោងតាមការចេញផ្សាយដោយសារព័ត៌មាន Al Jazeera នៅថ្ងៃទី១៤ ខែកុម្ភៈ ឆ្នាំ២០២២។
ប្រធានាធិបតីអាមេរិក ចូ បៃដិន និងប្រធានាធិបតីអ៊ុយក្រែនលោក Volodymyr Zelenskyy បាន រំលឹកឡើងវិញថា នឹងបន្តការទូត ដើម្បីបន្ធូរបន្ថយភាពតានតឹង ខណៈដែលទីប្រឹក្សាសន្តិសុខជាតិអាមេរិក បានព្រមានថាទីក្រុងម៉ូស្គូ កំពុងស្វែងរក«លេស»សម្រាប់ការវាយប្រហារ។
សេតវិមាន បាននិយាយកាលពីថ្ងៃអាទិត្យថា «លោកប្រធានាធិបតី បៃដិន បានបញ្ជាក់យ៉ាងច្បាស់ថា សហរដ្ឋអាមេរិកនឹងឆ្លើយតបយ៉ាងឆាប់រហ័ស និងយ៉ាងម៉ឺងម៉ាត់ រួមជាមួយនឹងសម្ព័ន្ធមិត្ត និងដៃគូរបស់ខ្លួន ចំពោះការឈ្លានពានបន្ថែមទៀតរបស់រុស្ស៊ីប្រឆាំងនឹងអ៊ុយក្រែន»។
ការិយាល័យរបស់លោក Zelenskyy បាននិយាយថា មេដឹកនាំទាំងពីរបានពិភាក្សាគ្នា អំពីការដាក់ទណ្ឌកម្មសេដ្ឋកិច្ច ដែលមានសក្តានុពលប្រឆាំងនឹងរុស្ស៊ី ប្រសិនបើទីក្រុងមូស្គូឈ្លានពានប្រទេសជិតខាងភាគខាងលិចរបស់ខ្លួន។
ទីប្រឹក្សាសន្តិសុខជាតិលោក Jake Sullivan បានប្រាប់ CBS News ថា ក្នុងរយៈពេល១០ ថ្ងៃកន្លងមកនេះ មាន «ការបង្កើនល្បឿនយ៉ាងខ្លាំង»ក្នុងការកសាងកងកម្លាំងរុស្ស៊ី ហើយថាពួកគេអាច«ចាប់ផ្តើមសកម្មភាពយោធា ជាសំខាន់នៅពេលណាក៏បាន»។
«យើងក៏កំពុងមើលយ៉ាងយកចិត្តទុកដាក់ចំពោះលទ្ធភាព ដែលថា មានលេស ឬប្រតិបត្តិការក្លែងក្លាយ ដើម្បីចាប់ផ្តើមសកម្មភាពរុស្ស៊ី ដែលសេវាចារកម្មរុស្ស៊ី ធ្វើការវាយប្រហារប្រភេទខ្លះលើកងកម្លាំងប្រូកស៊ីរុស្ស៊ី នៅភាគខាងកើតអ៊ុយក្រែន ឬលើពលរដ្ឋរុស្ស៊ី។ នេះបើតាមលោក Sullivan បាននិយាយ។
រុស្សីដែលប្រមូលបានទាហាន១០០.០០០នាក់នៅតាមព្រំដែនអ៊ុយក្រែន និយាយថា ខ្លួនមិនមានគម្រោងប្រតិបត្តិការយោធានោះទេ ប៉ុន្តែបានទាមទារកុំឱ្យអ៊ុយក្រែនត្រូវបានអនុញ្ញាតឱ្យក្លាយជាផ្នែកនៃសម្ព័ន្ធមិត្តយោធាណាតូ។ វិមានក្រឹមឡាំងជឿថា ការពង្រីកណាតូនៅអឺរ៉ុបខាងកើតគំរាមកំហែងដល់សន្តិសុខរបស់ខ្លួន៕
ប្រភព៖ Al Jazeera
