អន្តរជាតិ៖ កងកម្លាំងរុស្ស៊ីដែលប្រមូលផ្តុំនៅតាមបណ្តោយព្រំដែនអ៊ុយក្រែន បានកើនឡើងចំនួនទាហានប្រហែល៧,០០០ នាក់បន្ថែមទៀតក្នុងរយៈពេលប៉ុន្មានថ្ងៃថ្មីៗនេះ ដែលសហរដ្ឋអាមេរិក បានចោទប្រកាន់កាលពី ថ្ងៃពុធ បើទោះបីជាមានការអះអាងពីទីក្រុងម៉ូស្គូថា ខ្លួនកំពុងដកថយក៏ដោយ។ នេះបើយោងតាមការចេញផ្សាយដោយសារព័ត៌មាន CNN នៅថ្ងៃទី១៧ ខែកុម្ភៈ ឆ្នាំ២០២២។
មន្ត្រីរដ្ឋបាលជាន់ខ្ពស់របស់សហរដ្ឋអាមេរិកបាននិយាយថា ការកើនឡើងនេះធ្វើឱ្យការអះអាងរបស់រុស្ស៊ីអំពីការដកខ្លួន «មិនពិត» ហើយបានព្រមានថា ការបើកចំហជាសាធារណៈរបស់ប្រធានាធិបតីវ្ល៉ាឌីមៀ ពូទីន ចំពោះការទូតគឺជាការក្លែងបន្លំ។ មន្ត្រីរូបនេះបាននិយាយថា«រាល់ការចង្អុលបង្ហាញដែលយើងមាននៅពេលនេះ គឺពួកគេចង់តែផ្តល់ជូនជាសាធារណៈដើម្បីពិភាក្សា និងធ្វើការទាមទារអំពីការបន្ធូរបន្ថយការកើនឡើង ខណៈពេលដែលមានការប្រមូលផ្តុំកងទ័ព ដើម្បីធ្វើសង្គ្រាម» ។
យោងតាមការប៉ាន់ប្រមាណរបស់បស្ចិមប្រទេសបានឲ្យដឹងថា ប្រទេសរុស្ស៊ីបានដាក់ពង្រាយកងទ័ពជាង១៥០,០០០នាក់ នៅភាគខាងកើត ខាងជើង និងខាងត្បូងប្រទេសអ៊ុយក្រែន នេះបើតាមប្រធានាធិបតី ចូ បៃដិន ដែលបានលើកឡើងនៅក្នុងសុន្ទរកថាតាមទូរទស្សន៍កាលពីដើមសប្តាហ៍នេះ។ មេដឹកនាំ លោកខាងលិច បាន ស្វាគមន៍ ការ ដកទ័ព របស់ រុស្ស៊ី តែ មាន មន្ទិល សង្ស័យ។
កាលពីថ្ងៃអង្គារ លោក បៃដិន បាននិយាយ ក្នុងអំឡុងសុន្ទរកថា ថា ការដកទ័ពរុស្ស៊ីនឹង«ល្អ» ប៉ុន្តែថា លោក មិនទាន់ឃើញភស្តុតាងណាមួយដែលថា ការដកថយបែបនេះកំពុងដំណើរការនៅឡើយ។
លោក បៃដិន បាន និយាយ ថា ៖ « អ្នក វិភាគ របស់ យើង បង្ហាញ ថា ពួកគេ នៅ តែ ស្ថិត ក្នុង ស្ថានភាព គំរាមកំហែង ខ្លាំង ។ ហើយការពិតនៅតែមាននៅពេលនេះ រុស្ស៊ីមានទាហានជាង ១៥០,០០០ នាក់ឡោមព័ទ្ធអ៊ុយក្រែន និងបេឡារុស្ស និងតាមបណ្តោយព្រំដែនអ៊ុយក្រែន»។
មន្ត្រីជាន់ខ្ពស់រូបនេះបានព្រមានម្តងទៀតថា រុស្ស៊ីអាចប្រើលេសមិនពិត សម្រាប់ការវាយប្រហារ រួមទាំងការអះអាងអំពីសកម្មភាពណាតូ ឬការលុកលុយចូលទឹកដីរុស្ស៊ី ឬការចោទប្រកាន់ថា អំពើឃោរឃៅកំពុងកើតឡើងនៅតំបន់ Donbas ភាគខាងកើត ដែលស្ថិតនៅក្រោមការគ្រប់គ្រងរបស់ពួកផ្តាច់ខ្លួនដែលគាំទ្រដោយរុស្ស៊ី ចាប់តាំងពីឆ្នាំ ២០១៤ ។
គួរបញ្ជាក់ថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានផ្តល់សញ្ញាថា លោកចង់បានផ្លូវសន្តិភាពមួយចេញពីវិបត្តិ ហើយប្រធានាធិបតីសហរដ្ឋអាមេរិក លោក ចូ បៃដិន បានសន្យាថា សហរដ្ឋអាមេរិកនឹងបន្តផ្តល់វិធីការទូត«គ្រប់ឱកាស» ប៉ុន្តែលោកបានបង្ហាញការសង្ស័យអំពីចេតនារបស់ទីក្រុងមូស្គូ។
លោក បៃដិន ក៏បានទទូចផងដែរថា ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួននឹងមិនលះបង់គោលការណ៍ជាមូលដ្ឋាន នៃការគោរពអធិបតេយ្យភាពអ៊ុយក្រែនឡើយ៕
ប្រភព៖ CNN ដោយ៖ នង ណារិន
