អន្តរជាតិ៖ សារព័ត៌មាន The Irrawaddy បានចេញផ្សាយនៅថ្ងៃទី៣១ ខែមីនា ឆ្នាំ២០២១បានឲ្យដឹងថា កងទ័ពArakan(AA) និងក្រុមប្រដាប់អាវុធជនជាតិភាគតិច ដែលជាដៃគូរបស់ខ្លួន បាននិយាយថា ពួកគេត្រៀមខ្លួនចូលរួមជាមួយប្រជាជនជនជាតិភាគតិចទាំងអស់ក្នុងការប្រយុទ្ធប្រឆាំងនឹងរបបយោធាមីយ៉ាន់ម៉ា ប្រសិនបើការសម្លាប់ដ៏ឃោរឃៅលើក្រុមអ្នកតវ៉ាប្រឆាំងនឹងរដ្ឋប្រហារនៅតែបន្តកើតមាន។
ក្រុមកងទ័ពសម្ព័ន្ធមិត្តប្រជាធិបតេយ្យជាតិមីយ៉ាន់ម៉ា(MNDAA) , កងទ័ពរំដោះជាតិTa’ang(TNLA) និង កងទ័ពArakan(AA) បានថ្កោលទោសលើរបបយោធាកាលពថ្ងៃច័ន្ទ បន្ទាប់ពីចំនួនជនស៊ីវិលដែលបានស្លាប់ដោយសារការបង្ក្រាបដ៏សាហាវទៅលើក្រុមបាតុករ ប្រឆាំងនឹងរបប នេះបានកើនឡើងដល់យ៉ាងហោចណាស់៥២០នាក់នៅទូទាំងប្រទេស។
ការប្រយុទ្ធដើម្បីស្វ័យភាពកាន់តែខ្លាំងនៅរដ្ឋ រ៉ាក់ឃីន(Rakhine)នៅភាគខាងលិចប្រទេស កងទ័ពArakan(AA)បានក្លាយជាកម្លាំងមួយដ៏រឹងមាំបំផុត ដែលបានកាន់កាប់លើយោធាមីយ៉ាន់ម៉ា ក្នុងរយៈពេល២ ឆ្នាំកន្លងមក។ ការប្រយុទ្ធគ្នារវាងកងព័ទArakan(AA) និងយោធាមីយ៉ាន់ម៉ា កាន់តែខ្លាំងឡើងជាលំដាប់ចាប់ពីខែវិច្ឆិកាឆ្នាំ២០១៨ ដល់ដើមខែវិច្ឆិកាឆ្នាំ២០២០។ ជម្លោះនេះបានបណ្តាលឲ្យស្លាប់ជនស៊ីវិលរាប់រយនាក់ និងធ្វើឲ្យប្រជាជនជាង២០០.០០០នាក់ ត្រូវបានជម្លៀសចេញពីទីលំនៅដ្ឋាន។ ថ្មីៗនេះ របបយោធា បានដកកងទ័ពArakan(AA) ចេញពីបញ្ជីរបស់ក្រុមភេរវកម្ម បន្ទាប់ពីការប្រយុទ្ធគ្នារវាងភាគីទាំងពីរបានធ្វើបទឈប់បាញ់កាលពីខែវិច្ឆិកា។
អ្នកនាំពាក្យកងព័ទArakan(AA) លោក Khaing Thukha បានប្រាប់ សារព័ត៌មានThe Irrawaddy ថា វាដល់ពេលដែលអង្គការជនជាតិភាគតិចត្រូវរួមគ្នា ដើម្បីការពារជនស៊ីវិលដែលត្រូវបានគេជិះជាន់ពីរបបយោធា។ លោកបានមានប្រសាសន៍ថា« យើងត្រូវខិតខំអស់ពីសមត្ថភាព ដើម្បីការពារអាយុជីវិតនិងទ្រព្យសម្បត្តិរបស់ប្រជាជនដែលត្រូវបានគេជិះជាន់»។
លោកក៏បាន ជំរុញឲ្យមេដឹកនាំធ្វើរដ្ឋប្រហារ ចូលកិច្ចពិភាក្សា ដើម្បីដោះស្រាយវិបត្តិដោយមធ្យោបាយនយោបាយ ខណៈដែលប្រជាជននៅទូទាំងប្រទេសបានអំពាវនាវឲ្យបញ្ឈប់ការគ្រប់គ្រងយោធា និងការដោះលែងមេដឹកនាំស៊ីវិលទាំងអស់និងអ្នកជាប់ឃុំដទៃទៀត និងដើម្បីឲ្យរបបនេះទទួលយកលទ្ធផលនៃការបោះឆ្នោតកាលពីឆ្នាំ២០២០។
កងទ័ពArakan(AA), កងទ័ពរំដោះជាតិTa’ang(TNLA) និង កងទ័ពសម្ព័ន្ធមិត្តប្រជាធិបតេយ្យជាតិមីយ៉ាន់ម៉ា(MNDAA)បានព្រមានយោធា ថា ពួកគេនឹងសហការជាមួយ អង្គការប្រដាប់អាវុធជនជាតិភាគតិចដទៃទៀត និងអ្នកគាំទ្រលទ្ធិប្រជាធិបតេយ្យដើម្បីការពារខ្លួនពីការបង្ក្រាបដ៏ឃោរឃៅរបស់របបនេះ ប្រសិនបើអំពើហិង្សានៅតែបន្តកើតមាន។
ទោះបីជាមានការបង្ក្រាបយ៉ាងសាហាវរបស់យោធា ដែលកំពុងបន្តលើក្រុមបាតុករ ប្រឆាំងនឹងរបបនេះក៏ដោយ ក៏ប្រជាជននៅទូទាំងប្រទេសនៅតែបន្តដើរតាមផ្លូវ ដើម្បីប្រឆាំងនឹងការគ្រប់គ្រងរបស់យោធា។ យោងតាមសមាគមជំនួយសម្រាប់អ្នកទោសនយោបាយ (AAPP) បានឲ្យដឹងថា យោធាបានឃុំខ្លួនមនុស្សសរុបចំនួន ២.៥៧៤នាក ក្នុងនោះមានទីប្រឹក្សារដ្ឋមីយ៉ាន់ម៉ា លោកស្រី អ៊ុង សានស៊ូជី , អ្នកនយោបាយដទៃទៀត សកម្មជននិងអ្នកគាំទ្រលទ្ធិប្រជាធិបតេយ្យ។
គួរបញ្ជាក់ថា កងទ័ពឯករាជ្យកាឈិន(KIA) បានធ្វើការវាយលុកទីតាំងយោធានិងប៉ូលីសនៅរដ្ឋកាឈិននិងរដ្ឋសានភាគខាងជើង ចាប់តាំងពីថ្ងៃទី១១ ខែមីនា ដោយនិយាយថា ខ្លួនឈរជាមួយប្រជាជន។ ការវាយលុយនេះបានកើតឡើងបន្ទាប់ពីជនស៊ីវិល២នាក់ត្រូវបានបាញ់សម្លាប់នៅក្នុងការបង្ក្រាបមួយដោយកម្លាំងសន្តិសុខទៅលើក្រុមបាតុករប្រឆាំងនឹងរបបយោធា នៅរដ្ឋMyitkyinaនៃរដ្ឋកាឈិន កាលពីថ្ងៃទី ៨ ខែមីនា៕ ប្រភព៖ The Irrawaddy
