លោក ព្រហ្មម៉ាញ គឺជាសិល្បករអាយ៉ៃជើងចាស់មួយរូប ដែលមានឈ្មោះបោះសំឡេងយ៉ាងខ្លាំងក្នុងប្រទេសកម្ពុជា ដៃគូចម្រៀងអាយ៉ៃ ដ៏ស័ក្តិសមរបស់លោកគ្រូ គឺអ្នកស្រី នួន សារី ហៅ យាយយ៉យ ។ លោកគ្រូ ព្រហ្ម ម៉ាញ បានចាប់ផ្តើមចូលវិស័យសិល្បៈតាំងពីឆ្នាំ ១៩៧០ មកម្ល៉េះ ដោយកាលណោះលោកទើបតែមានអាយុ ២០ ឆ្នាំប៉ុណ្ណោះ ដែលគិតមកដល់ឆ្នាំ ២០២០ នេះ លោក ព្រហ្មម៉ាញ បានប្រឡូកក្នុងសិល្បៈប្រមាណជា ៥០ ឆ្នាំមកហើយ ដោយសារតែការស្រឡាញ់វិស័យសិល្បៈអាយ៉ៃ លោកគ្រូ ក៏បានបង្កើតសាលាបង្រៀនអាយ៉ៃ ដោយមិនយកលុយសូម្បីតែមួយកាក់ មួយសេន ពីក្មេងៗជំនាន់ក្រោយផងដែរ ។

យោងតាមព្រះរាជក្រឹត្យចុះថ្ងៃទី០៩ ខែមេសា ឆ្នាំ២០២២ សម្តេចវិបុលសេនាភក្តី សាយ ឈុំ ប្រមុខរដ្ឋស្តីទីនៃព្រះរាជាណាចក្រកម្ពុជា បានចេញព្រះរាជក្រឹត្យ ត្រាស់បង្គាប់ផ្តល់គោរមងារកិត្តិយស នៃរាជបណ្ឌិត្យសភាកម្ពុជាជូនលោក ព្រហ្ម ម៉ាញ ជា «កិត្តិឧទ្ទេសបណ្ឌិត» ។ សូមចូលរួមអបអរសាទរផងលោកគ្រូ ៕