កូឡុំបូ៖ អាជ្ញាធរស្រីលង្កាកាលពីថ្ងៃសុក្របានប្រកាសបិទការិយាល័យរដ្ឋាភិបាល និងសាលារៀនរយៈពេលពីរសប្តាហ៍ ខណៈដែលការដឹកជញ្ជូនសាធារណៈស្ទើរតែទាំងស្រុងត្រូវផ្អាក ដោយសារតែការខ្វះខាតប្រាក់ដុល្លារ សម្រាប់ចំណាយលើប្រេងឥន្ធនៈដែលបាននាំចូល។ នេះបើយោងតាមការចេញផ្សាយដោយសារព័ត៌មាន Bangkok Post នៅថ្ងៃទី១៨ ខែមិថុនា ឆ្នាំ២០២២។
ក្រសួងរដ្ឋបាលសាធារណៈ បានបញ្ជាឱ្យគ្រប់នាយកដ្ឋាន ស្ថាប័នសាធារណៈ និងក្រុមប្រឹក្សាមូលដ្ឋានរក្សាសេវាគ្រោងឆ្អឹងចាប់ពីថ្ងៃចន្ទនេះតទៅ ដើម្បីឆ្លើយតបនឹងកង្វះខាតប្រេងឥន្ធនៈ និងម៉ាស៊ូត។ បទបញ្ជារបស់ក្រសួងបាននិយាយថា «ដោយសារតែការដឹកជញ្ជូនសាធារណៈខ្វះខាត ក៏ដូចជាអសមត្ថភាពក្នុងការរៀបចំយានយន្តឯកជន វាត្រូវបានគេសម្រេចចិត្តកាត់បន្ថយចំនួនបុគ្គលិកដែលរាយការណ៍មកធ្វើការយ៉ាងខ្លាំង»។
គួរបញ្ជាក់ថា ប្រទេសស្រីលង្កា កំពុងប្រឈមមុខនឹងវិបត្តិសេដ្ឋកិច្ចដ៏អាក្រក់បំផុតរបស់ខ្លួន ចាប់តាំងពីទទួលបានឯករាជ្យនៅឆ្នាំ ១៩៤៨ ហើយមិនអាចផ្តល់ហិរញ្ញប្បទានដល់ការនាំចូលសម្ភារៈចាំបាច់ ដូចជាអាហារ ថ្នាំពេទ្យ និងប្រេងឥន្ធនៈចាប់តាំងពីចុងឆ្នាំមុន។
ប្រទេសនេះក៏កំពុងប្រឈមមុខនឹងអតិផរណាខ្ពស់ និងការដាច់ចរន្តអគ្គិសនីរយៈពេលវែង ដែលទាំងអស់នេះបានរួមចំណែកដល់ការតវ៉ាជាច្រើនខែ ដែលមានអំពើហិង្សា ដោយអំពាវនាវឱ្យប្រធានាធិបតី លោក Gotabaya Rajapaksa ចុះចេញពីដំណែង។
កាលពីដើមសប្តាហ៍នេះ អាជ្ញាធរបានប្រកាសថ្ងៃសុក្រជាថ្ងៃឈប់សម្រាកផងដែរ ក្នុងគោលបំណងដើម្បីសន្សំសំចៃប្រេង។ ថ្វីបើមានចលនានោះក៏ដោយ ក៏គេឃើញមានជួរវែងៗនៅខាងក្រៅស្ថានីយ៍កាលពីថ្ងៃសុក្រ ដោយអ្នកបើកបររថយន្តជាច្រើនបាននិយាយថា ពួកគេបានរង់ចាំជាច្រើនថ្ងៃដើម្បីបញ្ចូលប្រេងធុងរបស់ពួកគេ។
ជាមួយនេះគ្នា ក្រសួងអប់រំបាននិយាយថា សាលារៀនទាំងអស់ត្រូវបានស្នើសុំឱ្យបន្តបិទរយៈពេលពីរសប្តាហ៍ ចាប់ពីថ្ងៃច័ន្ទ និងដើម្បីធានាការបង្រៀនតាមអ៊ីនធឺណិត ប្រសិនបើសិស្ស និងគ្រូមានអគ្គិសនីប្រើប្រាស់។
បន្ថែមពីនេះ បទបញ្ជាបិទនេះបានកើតឡើងមួយថ្ងៃ បន្ទាប់ពីអង្គការសហប្រជាជាតិ បានចាប់ផ្តើមការឆ្លើយតបជាបន្ទាន់របស់ខ្លួន ចំពោះវិបត្តិសេដ្ឋកិច្ច ដែលមិនធ្លាប់មានពីមុនមករបស់កោះនេះ ដោយផ្តល់អាហារដល់ស្ត្រីមានផ្ទៃពោះរាប់ពាន់នាក់ ដែលកំពុងប្រឈមនឹងការខ្វះខាតស្បៀងអាហារ។
ជាងនេះទៅទៀត ប្រទេសស្រីលង្កា បានជំពាក់បំណុលបរទេសចំនួន ៥១ពាន់លានដុល្លាររបស់ខ្លួន នៅក្នុងខែមេសា ហើយកំពុងពិភាក្សាជាមួយមូលនិធិរូបិយវត្ថុអន្តរជាតិសម្រាប់ការសង្គ្រោះ៕
ប្រភព៖ Bangkok Post
