មូស្គូ៖ ប្រធានាធិបតីឥណ្ឌូនេស៊ីលោក ចូកូ វីដូដូ(Joko Widodo)បាននិយាយនៅទីក្រុងមូស្គូកាលពីថ្ងៃព្រហស្បតិ៍ (៣០ មិថុនា) ថា លោកបានផ្ញើសារពីប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលែនស្គី (Volodymyr Zelenskyy) ទៅកាន់មេដឹកនាំរុស្ស៊ីលោក វ៉ា្លឌីមៀរ ពូទីន (Vladimir Putin)។ នេះបើយោងតាមការចេញផ្សាយដោយសារព័ត៌មាន CNA នៅថ្ងៃទី០១ ខែកក្កដា ឆ្នាំ២០២២។
លោក ពូទីន បានធ្វើជាម្ចាស់ផ្ទះក្នុងទទួលជួបលោក វីដូដូ បន្ទាប់ពីអស់រយៈពេលជាង៤ ខែក្នុងការវាយលុករបស់ទីក្រុងមូស្គូក្នុងប្រទេសអ៊ុយក្រែន ខណៈដែលរុស្ស៊ីព្យាយាមងាកទៅរកអាស៊ី និងអាហ្រ្វិក បន្ទាប់ពីការចាប់ផ្តើមនៃទណ្ឌកម្មរបស់លោកខាងលិចដែលមិនធ្លាប់មានពីមុនមក។
ប្រទេសឥណ្ឌូណេស៊ី កាន់តំណែងជាប្រធានប្តូរវេននៃG20 នៅឆ្នាំនេះ ហើយកំពុងរៀបចំធ្វើជាម្ចាស់ផ្ទះកិច្ចប្រជុំកំពូលនៅកោះបាលីក្នុងខែវិច្ឆិកា។ លោក វីដូដូ បាននិយាយបន្ទាប់ពីពិភាក្សាជាមួយប្រមុខវិមានក្រឹមឡាំងក្នុងការអត្ថាធិប្បាយដែលបកប្រែជាភាសារុស្សីថា «ខ្ញុំបានបញ្ជូនសាររបស់ប្រធានាធិបតី ហ្សេលែនស្គី ទៅកាន់ប្រធានាធិបតី ពូទីន»។ លោកក៏បានបង្ហាញពី«ការត្រៀមខ្លួន»របស់លោក ដើម្បីជួយចាប់ផ្តើម«ទំនាក់ទំនង» រវាងមេដឹកនាំទាំងពីរ។ លោកមិនបានផ្តល់ព័ត៌មានលម្អិតបន្ថែមទេ ហើយភាគីទាំងពីរមិនបាននិយាយថាមានអ្វីនៅក្នុងកំណត់ហេតុនោះទេ។
ក្នុងអំឡុងសន្និសីទសារព័ត៌មានមួយជាមួយលោក ពូទីន , លោក វីដូដូ បាននិយាយថា លោកសង្ឃឹមសម្រាប់វឌ្ឍនភាពនៃការធ្វើសមាហរណកម្មឡើងវិញ នូវបណ្តាញផ្គត់ផ្គង់អាហារ និងជីសកល ដែលត្រូវបានរំខានដោយជម្លោះ ហើយបានផ្តល់ជូនជាស្ពានការទូតរវាងប្រទេសទាំងពីរ។
ប្រធានាធិបតីឥណ្ឌូណេស៊ី ដែលត្រូវបានគេស្គាល់ជាទូទៅថា Jokowi បាននិយាយថា «ខ្ញុំពិតជាកោតសរសើរចំពោះប្រធានាធិបតី ពូទីន ដែលបាននិយាយមុននេះថា លោក(ពូទីន)នឹងផ្តល់ការធានាសន្តិសុខសម្រាប់ការផ្គត់ផ្គង់ស្បៀង និងជី ពីរុស្ស៊ី និងអ៊ុយក្រែន។ នេះជាដំណឹងល្អ»។
លោកបាននិយាយថា «សម្រាប់ជាប្រយោជន៍ដល់មនុស្សជាតិ ខ្ញុំក៏គាំទ្រដល់កិច្ចខិតខំប្រឹងប្រែងរបស់អង្គការសហប្រជាជាតិ ក្នុងការរួមបញ្ចូលឡើងវិញ នូវទំនិញម្ហូបអាហារ និងជីរបស់រុស្ស៊ី និងទំនិញស្បៀងអាហាររបស់អ៊ុយក្រែន ដើម្បីចូលទៅក្នុងខ្សែសង្វាក់ផ្គត់ផ្គង់ពិភពលោកឡើងវិញ»។
ជាមួយគ្នានេះ លោក Jokowi បាននិយាយថា លោកបានជំរុញមេដឹកនាំ G7 ក្នុងអំឡុងពេលកិច្ចប្រជុំដែលលោកបានចូលរួមនៅប្រទេសអាឡឺម៉ង់ក្នុងសប្តាហ៍នេះ ដើម្បីធានាថា ទណ្ឌកម្មលើប្រទេសរុស្ស៊ី មិនប៉ះពាល់ដល់ការផ្គត់ផ្គង់ស្បៀងអាហារ និងជី។
គួរបញ្ជាក់ថា សង្រ្គាមនៅអ៊ុយក្រែន បានបង្កឱ្យមានការរំខានយ៉ាងធ្ងន់ធ្ងរដល់ពាណិជ្ជកម្មពិភពលោក ដោយតម្លៃគ្រាប់ធញ្ញជាតិ និងស្រូវសាលីកើនឡើង ចំពេលមានការបិទច្រកសមុទ្រអ៊ុយក្រែន និងការដាក់ទណ្ឌកម្មលើទំនិញរុស្ស៊ី ដូចជា ប្រេង ឧស្ម័ន និងជី។
លើសពីនេះ ថ្លែងជាមួយលោក Jokowi នៅទីក្រុងម៉ូស្គូ លោកប្រធានាធិបតី ពូទីន បានបដិសេធថា រុស្ស៊ីមិនបានរារាំងការនាំចេញគ្រាប់ធញ្ញជាតិរបស់អ៊ុយក្រែននោះទេ។ លោកពូទីន បាននិយាយថា «យោធាអ៊ុយក្រែន បានជីកយកផ្លូវទៅកាន់កំពង់ផែរបស់ពួកគេ» «គ្មាននរណាម្នាក់រារាំងពួកគេពីការបោសសម្អាតមីនទាំងនោះទេ ហើយយើងធានាសុវត្ថិភាពនៃការដឹកជញ្ជូនគ្រាប់ធញ្ញជាតិចេញពីទីនោះ»។
បន្ថែមពីនេះ ក្នុងនាមជាប្រធាន G20 នៅឆ្នាំនេះ លោក Jokowi បានស្វែងរកការបង្រួបបង្រួមពីការបែកបាក់នៅក្នុងក្រុម ដែលប្រឈមមុខដោយសង្រ្គាមនៅអ៊ុយក្រែន និងការគំរាមកំហែងធ្វើពហិការមិនចូលរួមកិច្ចប្រជុំកំពូល ប្រសិនបើរុស្ស៊ីបានចូលរួម ក៏ដូចជាការប្រើប្រាស់ជំហរមិនចូលបក្សសម្ព័ន្ធរបស់ប្រទេសលោក ដើម្បីជំរុញសន្តិភាព។
ជាងនេះទៅទៀត ទីក្រុងហ្សាការតា បានស្ថិតនៅក្រោមសម្ពាធរបស់លោកខាងលិច ក្នុងការដកលោកពូទីនចេញពីការជួបប្រជុំ G20 បន្ទាប់ពីបានប្រកាសអញ្ជើញលោកពូទីនកាលពីខែមេសា៕
ប្រភព៖ CNA
