អន្តរជាតិ៖ ភ្លៀងធ្លាក់ខ្លាំងជាច្រើនថ្ងៃ បានបណ្តាលឱ្យមានទឹកជំនន់យ៉ាងខ្លាំងនៅក្នុងទីក្រុងដ៏ធំបំផុតរបស់ប្រទេសអូស្ត្រាលី ដោយទំនប់និងផ្លូវទឹកបានបាក់ច្រាំងទន្លេ និងហូរហៀរ។ អាកាសធាតុធ្ងន់ធ្ងរ បានជំរុញឱ្យមានគ្រោះទឹកជំនន់លើកទីបួន ក្នុងទីក្រុងក្នុងគ្រាអាសន្នក្នុងរយៈពេល១៦ខែ ហើយពេលនេះមន្ត្រីទីក្រុង កំពុងបង្កើន ចំនួនប្រជាជនដែលត្រូវការជម្លៀសចេញ។ នេះបើយោងតាមការចេញផ្សាយដោយសារព័ត៌មាន Sputnik នៅថ្ងៃទី០៦ ខែកក្កដា ឆ្នាំ២០២២។
រដ្ឋាភិបាលសហព័ន្ធរបស់ប្រទេសអូស្ត្រាលី បានប្រកាសពីគ្រោះមហន្តរាយធម្មជាតិនៅក្នុងតំបន់លិចទឹកចំនួន២៣នៃរដ្ឋ New South Wales ដែលនឹងគាំទ្រជំនួយសម្រាប់មូលនិធិសង្គ្រោះបន្ទាន់។ នាយករដ្ឋមន្ត្រីអូស្ត្រាលី លោក Anthony Albanese បានប្រកាសថា លោកនឹងទៅទស្សនាតំបន់ ដែលរងការខូចខាតដោយទឹកជំនន់ រួមជាមួយនឹងនាយករដ្ឋមន្ត្រី New South Wales លោក Dominic Perrottet នៅថ្ងៃពុធនេះ។
យ៉ាងហោចណាស់មនុស្ស ៥០,០០០ ត្រូវបានព្រមានថា ពួកគេប្រហែលជាត្រូវបោះបង់ចោលផ្ទះរបស់ពួកគេ នៅថ្ងៃអង្គារ បន្ទាប់ពីមនុស្ស ៣២,០០០នាក់ដំបូងត្រូវបានព្រមានពីការជម្លៀសកាលពីថ្ងៃចន្ទ នេះបើយោងតាមលោក Perrottet។
ការិយាល័យឧតុនិយម (BoM) បានរាយការណ៍ថា ព្យុះបានកើនឡើងឥទ្ធិពលវាយប្រហារ និងការធ្លាក់ភ្លៀង ខ្លាំងក្នុងរយៈពេលបីថ្ងៃ នៅក្នុងតំបន់នៃទីក្រុងស៊ីដនី។ ការិយាល័យឧតុនិយម (BoM)ក៏បានព្យាករណ៍ថា ព្យុះនេះនឹងផ្លាស់ទីទៅភាគខាងជើងបន្ទាប់ពីថ្ងៃអង្គារ ហើយហានិភ័យនៃទឹកជំនន់បន្តអាចនៅតែមានជាធរមាន។
ខណៈពេលដែល ប្រទេសអូស្ត្រាលី តែងតែជួបប្រទះនឹងអាកាសធាតុធ្ងន់ធ្ងរ ជាមួយនឹងរដូវក្តៅក្តៅខ្លាំង និងក្រោមតំបន់ត្រជាក់នៅក្នុងតំបន់ខ្ពស់ ដែលពេលនេះ ប្រទេសនេះកំពុងជួបប្រទះវិបត្តិអាកាសធាតុ ដែលបណ្តាលឱ្យមានភ្លើងឆេះព្រៃ ភ្លៀងធ្លាក់ខ្លាំង រលកកំដៅ និងការបាត់បង់បន្លែ និងសត្វព្រៃ៕
ប្រភព៖ Sputnik
