អន្តរជាតិ៖ ប្រព័ន្ធផ្សព្វផ្សាយអង់គ្លេសជាច្រើន កំពុងរាយការណ៍ថា នាយករដ្ឋមន្រ្តីអង់គ្លេស លោក បូរីស ចនសុន នឹងលាលែងពីតំណែងប្រធានគណបក្ស Conservative នៅថ្ងៃព្រហស្បតិ៍នេះ បន្ទាប់ពីរូបលោក បានបាត់បង់សំឡេងគាំទ្រពីសំណាក់គណៈរដ្ឋមន្រ្តី, មន្រ្តី និងសមាជិកសភាជាច្រើនរូប ប៉ុន្តែរូបលោកនឹងនៅបន្តកាន់តំណែងនាយករដ្ឋមន្រ្តី ជាបណ្តោះអាសន្នសិន។ នេះបើតាមការចេញផ្សាយដោយ សារព័ត៌មាន Al Jazeera ​នៅថ្ងៃព្រហស្បតិ៍ ទី៧ ខែកក្កដា ឆ្នាំ២០២២។

សារព័ត៌មាន BBC បានបន្ថែមថា ក្រោយការលាលែងខាងលើ ការប្រកួតប្រជែងជ្រើសរើសប្រធានថ្មី សម្រាប់គណបក្សអភិរក្សនិយម (Conservative) នឹងត្រូវធ្វើឡើងក្នុងពេលខាងមុខ ហើយនាយករដ្ឋមន្រ្តីថ្មី ត្រូវគេរំពឹងថា នឹងចូលកាន់តំណែងរួចរាល់ ជំនួសលោក Johnson ទាន់ពេលសន្និសីទបក្ស ដែលនឹងប្រព្រឹត្តទៅ នាខែតុលា ឆ្នាំ២០២២នេះ។ យ៉ាងណាមិញ មុនដល់ពេលនោះ លោក John នឹងបន្តកាន់តំណែងនាយករដ្ឋមន្រ្តីអង់គ្លេស ជាបណ្តោះអាសន្នសិន។

គួរបញ្ជាក់ថា ដំបូងឡើយ លោក Johnson បានប្តេជ្ញាបន្តពុះពារទៅមុខ ដោយមិនព្រមចុះចេញនោះឡើយ បន្ទាប់ពីការលាលែងពីតួនាទីជាបន្តបន្ទាប់ ដោយមន្រ្តីក្នុងជួររដ្ឋាភិបាល ដើម្បីប្រឆាំងនឹងការដឹកនាំរបស់លោក។ ប៉ុន្តែលោក Johnson ក៏ត្រូវបានក្រុមមន្រ្តីជាន់ខ្ពស់ ក្នុងនោះរួមទាំងរដ្ឋមន្រ្តីហិរញ្ញវត្ថុ ដែលទើបតែងតាំងថ្មីផងដែរ ទទូចឱ្យរូបលោកលាលែងពីតំណែង៕

ប្រភព៖ Al Jazeera ​