អន្តរជាតិ៖ សារព័ត៌មាន NHK បានរាយការណ៍នៅព្រឹកថ្ងៃសុក្រ ទី០៨ ខែកក្កដា​ ឆ្នាំ២០២២នេះ ដោយដកស្រង់ប្រភពពីនាយកដ្ឋានពន្លត់អគ្គិភ័យជប៉ុនថា អតីតនាយករដ្ឋមន្ត្រីជប៉ុនលោក Shinzo Abe កំពុងស្ថិតក្នុងស្ថានភាពធ្ងន់ធ្ងរ ដោយសារតែបាត់បង់សញ្ញាជីវិតទៅហើយ ក្រោយរកការបាញ់ប្រហារពីខ្មាន់កាំភ្លើងមិនស្គាល់អត្តសញ្ញាណ ។

អតីតនាយករដ្ឋមន្ត្រីជប៉ុលោក Shinzo Abe ត្រូវបានខ្មាន់កាំភ្លើងបាញ់ប្រហារ ខណៈលោកកំពុងថ្លែងសុន្ទរកថាលើដងផ្លូវនៅព្រឹកថ្ងៃសុក្រនេះក្នុងខេត្ត Nara ភាគខាងលិចប្រទេសជប៉ុន ។

ប្រភពពីគណបក្សប្រជាធិបតេយ្យសេរីដែលស្និទ្ធនឹងលោក Abe និយាយថា អតីតនាយករដ្ឋមន្ត្រីវ័យ ៦៧ ឆ្នាំរូបនេះត្រូវបានខ្មាន់កាំភ្លើងបាញ់ចំដើមទ្រូង ហើយត្រូវបានបញ្ជូនទៅមន្ទីរពេទ្យភ្លាមៗ ក្រោយហូរឈាមខ្លាំងពេក បន្ទាប់ពីដួលសន្លប់ ។

ទូរទស្សន៍ NHK បានរាយការណ៍ថា សំឡេងគ្រាប់កាំភ្លើងត្រូវបានឮនៅពេលនោះ ហើយជនសង្ស័យភេទប្រុសម្នាក់ត្រូវបានឃាត់ខ្លួននៅកន្លែងកើតហេតុ ហើយអ្នកយកព័ត៌មាន NHK ម្នាក់ដែលនៅកន្លែងកើតហេតុបាននិយាយថា ពួកគេបានឮស្នូរបាញ់កាំភ្លើងចំនួន ២ គ្រាប់ជាប់ៗគ្នា ក្នុងអំឡុងពេលសុន្ទរកថារបស់លោក Abe ៕