ការប្រកួតដណ្តើមមកុដ Miss Grand International 2022 នឹងឈានដល់ការប្រកួតវគ្គផ្តាច់ព្រ័ត នៅថ្ងៃទី២៥ តុលា ឆ្នាំ២០២២ ខាងមុខនេះ ខណៈបណ្តា Miss Grand មកពីប្រទេសនានាជាច្រើន បានធ្វើដំណើរទៅកាន់ប្រទេសឥណ្ឌូនេស៊ី ត្រៀមលក្ខណៈប្រកួត និងតម្រូវឲ្យមានការចាប់គូបវរកញ្ញា ២រូប មកពីប្រទេសផ្សេងៗគ្នា ឲ្យស្នាក់នៅបន្ទប់ជាមួយគ្នា ។
អ្វីដែលមហាជនកំពុងផ្ទុះការចាប់អារម្មណ៍នោះ សង្គ្រាមរុស្ស៊ី និងអ៊ុយក្រែន បាននិងតែកំពុងផ្ទុះឡើងអស់រយៈពេល ជិត៨មកហើយនោះ នៅមិនទាន់បញ្ចប់នៅឡើយ ស្រាប់តែ ស្ថាប័ន Miss Grand បានរៀបចំឲ្យ បវរកញ្ញារបស់ប្រទេសទាំង២ ត្រូវសម្រាកស្នាក់នៅបន្ទប់ជាមួយគ្នាទៅវិញ ដែលធ្វើឲ្យបវរកញ្ញា អ៊ុយក្រែន ស្រក់ទឹកភ្នែកឈឺចាប់ ស្ទើរតែមិនអាចទទួលយកបាន និងបានបង្ហោះពាក្យទាំងនេះ នៅលើ អ៊ីនស្តាក្រាមរបស់ខ្លួន ។
ក្នុងនោះ Miss Grand អ៊ុយក្រែន បានសរសេរដោយមានខ្លឹមសារថា «ខ្ញុំគឺជាមនុស្សដែលធំដឹងក្ដីមកជាមួយគំនិត និងទស្សនៈផ្ទាល់ខ្លួន។ នេះមិនមែនជាអ្វីដែលចារ ឬក៏ដកស្រង់ចេញពីទំព័រសៀវភៅ ហើយប្រឌិតវាឡើងនោះទេ។ នេះគឺជាខ្ញុំ! នេះគឺជាអារម្មណ៍ពិត, អតីតកាល, ចំណេះដឹង, សមត្ថភាព, ហើយក៏ជាសាច់រឿងរបស់ខ្ញុំ។ ហើយគ្មាននរណាម្នាក់ក្នុងលោកនេះមានសិទ្ធយកវាចេញពីខ្ញុំ ឬមានមន្ទិលពីវានោះឡើយ។ គំនិតរបស់ខ្ញុំគឺវាសំខាន់ណាស់! ហើយសាច់រឿង និងអារម្មណ៍របស់ខ្ញុំក៏វាសំខាន់ដូចគ្នា! ថ្ងៃនេះ សាច់រឿងរបស់ខ្ញុំគឺ៖ អំឡុងពេលខ្ញុំកំពុងធ្វើដំណើរដ៏វែងឆ្ងាយទៅចូលរួមប្រកួតកម្មវិធី Miss Grand International ដែលជាគោលដៅ, គោលបំណង និងបេសកកម្មសំខាន់បំផុតសម្រាប់ខ្ញុំ គឺដើម្បីប្រាប់ពិភពលោកពីប្រទេសរបស់ខ្ញុំ ហើយក៏ដើម្បីបង្ហាញពីស្មារតីរបស់ប្រជាជនអ៊ុយក្រែន ពីភាពស្រស់ស្អាត ការតស៊ូ និងអ្វីដែលយើងកំពុងតែហែលឆ្លងនាពេលបច្ចុប្បន្ន។ ខ្ញុំទទួលបានសំបុត្រមួយដែលធ្វើឱ្យអារម្មណ៍ខ្ញុំពុះកញ្ជ្រោល ហើយមានភាពឈឺចាប់ជាខ្លាំង នោះគឺការរៀបចំឱ្យខ្ញុំស្នាក់នៅបន្ទប់ជាមួយដៃគូប្រកួតដែលមកពីប្រទេសភេវករ ប្រទេសដែលបាត់អស់ច្បាប់ទម្លាប់ និងសណ្ដាប់ធ្នាប់ ប្រទេសដែលគួរឱ្យស្អប់ខ្ពើម និងបន្សល់តែស្លាកស្នាមនៅលើដងខ្លួនដ៏ស្រស់ស្អាតរបស់ភពផែនដី នោះគឺរុស្ស៊ី ជូនចំពោះលោក Nawat សុំលោកជឿខ្ញុំ ខ្ញុំផ្ទាល់ក៏ស្វែងរកសន្តិភាព ក្តីស្រឡាញ់ មិត្តភាព និងការគាំទ្រ ប៉ុន្តែមិនមែនពីអ្នកដែលមិនអាចលើកលែងទោសឱ្យបាន មិនមែនពីអ្នកដែលធ្វើទារុណកម្មបងប្អូនខ្ញុំ មិនមែនពីឃាតកដែលឆក់យកជីវិតប្រជាជនអ៊ុយក្រែនជាច្រើននាក់។ ខ្ញុំគឺសំខាន់ គំនិតខ្ញុំក៏សំខាន់ អារម្មណ៍ខ្ញុំ និងប្រទេសអ៊ុយក្រែនខ្ញុំសុទ្ធសឹងតែសំខាន់! សូមឱ្យអ៊ុយក្រែនមានសិរីសួស្ដី! ខ្ញុំសូមឱ្យអ្នករាល់គ្នាចែករំលែករឿងនេះ និងសូមផ្ញើសារទៅលោក Nawat ដែលជាអ្នករៀបចំការប្រកួតជាមួយ Hastag ថា #cancelrussianculture, #russiaterroriststate» ៕
