ប្រិយមិត្តបានជ្រាបហើយ ពីគូស្នេហ៍ដែលកំពុងទទួលបានការចាប់អារម្មណ៍ខ្លាំង អូសហ្វេសប៊ុក ពេលណាក៏ឃើញ គឺគូស្នេហ៍ Youtuber ហេង វិសាល និងស្រីនា ដែលបានដឹកដៃគ្នាចូលពិធីភ្ជាប់ពាក្យ មុខចាស់ទុំទាំងសងខាង កក្រើកអ្នកគាំទ្រយ៉ាងខ្លាំង ក្រោយអ្នកទាំង២ បានលាក់បាំង ទំនាក់ទំនងជាមួយគ្នាយ៉ាងជិតឈឹង លុះបង្ហាញ បែរជាបង្ហាញថ្ងៃភ្ជាប់ពាក្យតែម្តង ទាំងដែលបណ្តាអ្នកគាំទ្រកន្លងមក ធ្លាប់លួចរំពឹង ឲ្យអ្នកទាំង២ស្រឡាញ់គ្នាពិតប្រាកដ មិនត្រឹមតែជាដៃគូការងារនោះទេ ។

ក្នុងនោះ សមីខ្លួនក៏បានបង្ហាញថា ពួកគេបានទាក់ទងគ្នា៣ឆ្នាំមកហើយ ត្រូវខ្លួនចង់ស្វែងយកចិត្តគ្នាឲ្យច្រើនជាងនេះ រហូតទាល់តែច្បាស់ថា ខ្លួនច្បាស់លាស់នឹងគ្នា ទើបបង្ហាញឲ្យអ្នកគាំទ្របានដឹង ចៀសវាងប្រកាសហើយ ទាក់ទងគ្នា តែក្រោយមកមានរឿងរ៉ាវផ្សេងទៀតកើតឡើង ដែលមិនអាចនៅជាមួយគ្នាបាន ធ្វើឲ្យប៉ះពាល់ដល់ខាងស្រី ។

ក្រោយភ្ជាប់ពាក្យរួច គេក៏ឃើញមានការទម្លាយវីដេអូចាស់ៗ ដែលក្រុមគ្រួសារបានថតទុក ក្នុងពេលដែលទាក់ទងគ្នាស្ងាត់ៗផងដែរ។ ក្នុងនោះ ក៏មានការផុសនូវវីដេអូមួយ ដែលហេង វិសាល បានសុំ ស្រីនា រៀបការ ទាំងដែលជាការសាមញ្ញធម្មតា និងស្លឹកឈូក ដែលអ្នកម្តាយរបស់ស្រីនា ជាអ្នកថត មើលទៅមានក្តីសុខខ្លាំងណាស់ កំពុងអង្រួនចិត្តអ្នកគាំទ្រ ៕