រាជធានីភ្នំពេញ ៖ គ្រោះថ្នាក់ចរាចរណ៍មួយកើតឡើង ដោយបុរសម្នាក់ បានជិះម៉ូតូក្នុងល្បឿនលឿន ទៅបុកសួនច្បារ នៅត្រង់ចំណុចលើផ្លូវបេតុង៥០ម៉ែត្រ ផ្លោងបោកក្បាលស្លាប់ក្នុងថ្លុកឈាមយ៉ាងរន្ធត់ ។​

ហេតុការណ៍នេះបានកើតឡើងកាលពីវេលាម៉ោង​ ៧ និង៣០នាទី ថ្ងៃទី៣០ ខែមិថុនា ឆ្នាំ២០២៤  ត្រង់ចំណុចលើផ្លូវបេតុង៥០ម៉ែត្រ ក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។

តាមរបាយការណ៍ពីសមត្ថកិច្ចបានឲ្យដឹងថា មុនពេលកើតហេតុ គេបានឃើញ ជនរងគ្រោះពុំស្គាល់អត្តសញ្ញាណ ភេទប្រុស  បានជិះម៉ូតូមួយគ្រឿង  ម៉ាក HONDA SCOOPY ពណ៌ស ពាក់ផ្លាកលេខ ភ្នំពេញ 1CY 6909 (មិនពាក់មួកសុវត្តិភាព) ក្នុងទិសដៅ ពីត្បូងទៅជើង មកដល់ចំណុចកើតហេតុ ម៉ូតូបានទៅបុកសួនច្បារពេញមួយទំហឹង តែម្តង  ផ្លោងបោកក្បាលស្លាប់ក្នុងថ្លុកឈាមយ៉ាងរន្ធត់  ។

ក្រោយកើតហេតុ សមត្ថកិច្ចជំនាញចរាចរណ៍ខណ្ឌដង្កោ បានធ្វើការវាស់វែង យកម៉ូតូទៅទុកនៅអធិការដ្ឋាននគរបាលខណ្ឌដង្កោ រង់ចាំស្រាវជ្រាវបន្ត និងយកសព ទៅតម្កល់ទុកនៅវត្តសំបួរ ស្រាវជ្រាវរកក្រុមគ្រួសារ មកទទួលយកទៅធ្វើបុណ្យតាមប្រពៃណី ៕ អែល វិចិត្រ