ខេត្តកណ្តាល ៖ ស៊យហួស! ជនសង្ស័យ២នាក់ ជាមុខសញ្ញាចាស់ មានឈ្មោះក្នុងបញ្ជីគ្រប់គ្រងមុខសញ្ញារបស់ប៉ុស្តិ៍សមត្ថកិច្ច កំពុងជិះម៉ូតូដួលរបួសហូរឈាមហើយ មកជួបនឹងសមត្ថកិច្ចកំពុងល្បាត គ្រាន់តែឃើញសមត្ថកិច្ចប្រញាប់រត់ លុះសមត្ថកិច្ចចាប់បាន ឆែកឆេររកឃើញថ្នាំញៀនជិត១០កញ្ចប់ឯណោះ។
ការបង្ក្រាបនេះធ្វើឡើងនៅវេលាម៉ោង ១៣ និង ០៥ នាទី ថ្ងៃទី ០១ ខែ ឧសភា ឆ្នាំ២០២៥ ចំណុចផ្លូវកៅស៊ូ ភូមិថ្មី ឃុំទួលព្រេជ ស្រុកអង្គស្នួល ខេត្តកណ្ដាល ។
នគរបាលស្រុកអង្គស្នួល បានឲ្យដឹងថា ជនសង្ស័យដែលឃាត់ខ្លួនបានរួមមាន ៖
១-ឈ្មោះ ឈៀង ថាត់ ហៅត្នោត ហៅនិត ភេទប្រុស អាយុ២០ឆ្នាំ មុខរបរមិនពិតប្រាកដ រស់នៅភូមិគោល ឃុំទួលព្រេជស្រុក អង្គស្នួល ខេត្តកណ្តាល (ប្រើប្រាស់ច្រើនលើកប្រហែល១ឆ្នាំ ជួញដូរប្រហែល១ខែ) មានឈ្មោះក្នុងបញ្ជីគ្រប់គ្រងមុខសញ្ញារបស់ប៉ុស្តិ៍ របួសបែកមាត់ រលាត់ចង្កា ម្រាមជើងសងខាង បាតដៃឆ្វេង ស្មាឆ្វេង ។
២-ឈ្មោះ ឡេង ពិសី ហៅសី ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិគោល ឃុំទួលព្រេជស្រុក អង្គស្នួល ខេត្តកណ្តាល (ប្រើប្រាស់និងជួញដូរច្រើនលើកប្រហែល១ខែ) មានឈ្មោះក្នុងបញ្ជីគ្រប់គ្រងមុខសញ្ញារបស់ប៉ុស្តិ៍ របួសបែកមាត់ រលាត់ចង្កា ស្មាស្តាំ កំភួនដៃស្តាំ-ឆ្វេង កដៃ-ខ្នងដៃស្តាំ ជង្គង់ឆ្វេង និងរបួសចាស់ខ្នងជើងស្តាំដេរ៩ថ្នេរ)។ ទាំង២នាក់ មានសារធាតុញៀនក្នុងទឹកនោម(+) ។
ក្នុងនោះសមត្ថកិច្ចដកហូតបាន វត្ថុតាងដកហូត ៖
-ម្សៅក្រាមសថ្លាសង្ស័យជាសារធាតុញៀន(ម៉ាទឹកកក)០៨កញ្ចប់តូច ទម្ងន់=១,៣០ក្រាម។
-ទូរស័ព្ទដៃ១គ្រឿង ម៉ាកoppo ពណ៌បៃតង
-ម៉ូតូ១គ្រឿង ម៉ាកsuzuki smash V ពាក់ផ្លាកលេខកណ្តាល1R 5596 (ចាស់ទ្រុឌទ្រោម)
សមត្ថកិច្ចបានឲ្យដឹងថាទៀតថា មុនពេលកើតហេតុ កម្លាំងកម្លាំងប៉ុស្តិ៍នគរបាលរដ្ឋបាលទួលព្រេជ សហការជាមួយកម្លាំងប្រជាការពារ ចេញល្បាតនៅក្នុងភូមិសាស្ត្រ លុះដល់ចំណុចកើតហេតុ បានជួបជនសង្ស័យទាំង២នាក់កំពុងជិះម៉ូតូដួលមានរបួសរលាត់ពេញដៃជើងនិងដងខ្លួន ។ ពេលនោះកម្លាំងសមត្ថកិច្ចបានសួរនាំស្រាប់តែឈ្មោះ ឈៀង ថាត់ ស្ទុះរត់គេចខ្លួន ទើបកម្លាំងសមត្ថកិច្ចដេញតាមចាប់បានភ្លាមៗ និងឆែករកឃើញម្សៅក្រាមសថ្លាសង្ស័យជាសារធាតុញៀន(ម៉ាទឹកកក)០៨កញ្ចប់តូច ដែលឈ្មោះ ឈៀងថាត់ បោះចោលលើដី រួចបញ្ជូនទៅកាន់អធិការដ្ឋាននគរបាលស្រុកអង្គស្នួល ដើម្បីបន្តនីតិវិធី។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ថ្នាំញៀន៨កញ្ចប់តូចនៅចំពោះមុខនេះ ជារបស់ពួកខ្លួនទិញពីមុខសញ្ញាមិនស្គាល់នៅខេត្តកំង់ស្ពឺ ក្នុងតម្លៃប្រាំបីម៉ឺនរៀល យកមកលក់បន្ត និងប្រើប្រាស់រួមគ្នា ។
ពេលនេះជនសង្ស័យ រួមជាមួយវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុក ដើម្បីសាកសួរបន្ត និងកសាងសំណុំរឿងចាត់ការតាមនីតិវិធីច្បាប់ ៕នុច
