អន្តរជាតិ៖ សារព័ត៌មាន Channel News Asia បានចេញផ្សាយនៅរសៀលថ្ងៃទី១៣ ខែកក្កដា ឆ្នាំ២០២១ បានឲ្យដឹងថា អាជ្ញាធរបាននិយាយនៅថ្ងៃអង្គារទី ១៣ ខែកក្កដានេះថា យ៉ាងហោចណាស់មានមនុស្ស៨ នាក់បានស្លាប់ និង៩នាក់កំពុងបាត់ខ្លួននៅក្នុងការបាក់រលំសណ្ឋាគារមួយនៅទីក្រុងស៊ូចូវ ភាគខាងកើតប្រទេសចិន។
រដ្ឋាភិបាលស៊ូចូវ បាននិយាយថា សណ្ឋាគារ Siji Kaiyuan បានដួលរលំកាលពីរសៀលថ្ងៃច័ន្ទ។ មនុស្សភាគច្រើននៅក្នុងអគារនៅពេលនោះគឺជាភ្ញៀវសណ្ឋាគារ។ មនុស្ស ២២ នាក់បានជាប់នៅក្នុងការបាក់រលំ ហើយ៦នាក់ត្រូវបានជួយសង្គ្រោះ។
មនុស្សជាង៦០០នាក់រួមទាំងក្រុមជួយសង្គ្រោះនិងរថយន្ត១២០គ្រឿង ត្រូវបានចេញប្រតិបត្តិការនេះភ្លាមៗផងដែរ។ ក្រុមអ្នកជួយសង្គ្រោះ បានប្រើឆ្កែស្វែងរកដើម្បីស្វែងរកអ្នករស់រានមានជីវិត។
ពាក់ព័ន្ធជុំវិញនឹងករណីនេះ គេមិនទាន់បានដឹងអំពីមូលហេតុនៃគ្រោះមហន្តរាយនេះនៅឡើយនោះទេ។
សណ្ឋាគារនេះបានបើកដំណើរការកាលពីឆ្នាំ២០១៨ ហើយមានបន្ទប់ភ្ញៀវចំនួន៥៤ នេះបើយោងតាមការចុះបញ្ជីនៅលើគេហទំព័រធ្វើដំណើរCtrip។
ទីក្រុងស៊ូចូវជាទីក្រុងមួយដែលមានចម្ងាយប្រហែល១០០គីឡូម៉ែត្រភាគខាងលិចទីក្រុងសៀងហៃគឺជាទិសដៅដ៏ពេញនិយមសម្រាប់ភ្ញៀវទេសចរដែលបានទាក់ទាញទៅកម្សាន្តកន្លែងដែលមានអាយុកាលរាប់សតវត្សរ៍។
ការដួលរលំនៃសណ្ឋាគារដាច់ដោយឡែកមួយ នៅទីក្រុង Quanzhou ភាគខាងត្បូងប្រទេសចិនកាលពីខែមីនាឆ្នាំមុន បានសម្លាប់មនុស្សចំនួន២៩នាក់៕
ប្រភព៖ Channel News Asia ប្រែសម្រួល៖ នង ណារិន(Irin)
