អន្តរជាតិ៖ នាយករដ្ឋមន្រ្តីឥណ្ឌា ព្រមានប្រឆាំងនឹងការប្រមូលផ្តុំមនុស្សនៅតាមតំបន់ទេសចរណ៍នានា និងអំពាវនាវឱ្យមានការចាក់វ៉ាក់សាំងលឿនជាងមុន ប្រឆាំងនឹងវីរុសកូវីដ១៩។
សារព័ត៌មាន Aljazeera បានចេញផ្សាយនៅថ្ងៃទី១៣ ខែកក្កដា ឆ្នាំ២០២១ បានឲ្យដឹងថា នាយករដ្ឋមន្រ្តីឥណ្ឌា លោក Narendra Modi បានព្រមានប្រឆាំងនឹងការប្រមូលផ្តុំមនុស្សកកកុញ នៅតាមតំបន់ទេសចរណ៍នានា ហើយបានអំពាវនាវឱ្យមានការចាក់វ៉ាក់សាំងលឿនជាងមុនប្រឆាំងនឹងមេរោគនេះ បើទោះបីជាតួលេខផ្លូវការបង្ហាញពីការរាលដាលនៃការឆ្លងថ្មីធ្លាក់ចុះក៏ដោយ។
ស្ថាប័នវេជ្ជបណ្ឌិតកំពូលរបស់ប្រទេសឥណ្ឌាគឺសមាគមវេជ្ជសាស្ត្រឥណ្ឌា (IMA) បាននិយាយកាលពីថ្ងៃច័ន្ទថា ខ្លួនខ្លាចការប្រមូលផ្តុំភ្ញៀវទេសចរនិងអ្នកធ្វើធម្មយាត្រា អាចក្លាយជា« ព្រឹត្តិការណ៍រីកសាយភាយ»ដែលបង្កជារលកទី៣ ដ៏សាហាវនៃការឆ្លងវីរុសកូវីដ១៩។
លោក Modi បាននិយាយនៅក្នុងសេចក្តីអត្ថាធិប្បាយលើបណ្តាញសង្គមធ្វីតធឺថា« ខ្ញុំនឹងនិយាយដោយស្មោះត្រង់ថា វាមិនអីទេ ដែលមានហ្វូងមនុស្សច្រើននៅតាមស្ថានីយ៍ ភ្នំ ផ្សារ ដោយមិនពាក់ម៉ាស់»។
ចំនួនអ្នកឆ្លងវីរុសកូវីដ១៩នៅក្នុងប្រទេសឥណ្ឌា មានចំនួន៣០,៩១លាននាក់ គឺខ្ពស់ជាងគេលំដាប់ទី ២ នៅលើពិភពលោក បន្ទាប់ពីសហរដ្ឋអាមេរិក។ ចំនួនអ្នកស្លាប់សរុបគឺ៤១០.៧៨៤ នាក់ដែលភាគច្រើននៃពួកគេបានឆ្លងរាលដាលនៃរលកឆ្លងដ៏សាហាវលើកទី២ នៅខែមេសានិងឧសភា។
កាលពីថ្ងៃអង្គារម្សិលមិញ អាជ្ញាធរបានរាយការណ៍ករណីថ្មីចំនួន៣២.៩០៦ ករណីដែលជាចំនួនប្រចាំថ្ងៃទាបបំផុត ចាប់តាំងពីពាក់កណ្តាលខែមីនា-បើប្រៀបធៀបនឹង៤០០,០០០ ក្នុងមួយថ្ងៃ នៅក្នុងរលកទី២។
យោងតាមទិន្នន័យរបស់ក្រសួងសុខាភិបាលឥណ្ឌាបានរាយការណ៍ថា ប្រទេសឥណ្ឌាថាមានចំនួនអ្នកស្លាប់ថ្មីៗនៃវីរុសកូវីដ១៩ ចំនួន២.០២០នាក់កាលពីថ្ងៃអង្គារ។
វ៉ារ្យ៉ង់Deltaដែលត្រូវបានរីករាលដាលនៅក្នុងប្រទេសជាច្រើន ត្រូវបានគេរកឃើញដំបូងបង្អស់នៅក្នុងប្រទេសឥណ្ឌា ដែលថ្មីៗនេះក្រុមអ្នកជំនាញបានកំណត់នូវអ្វីដែលពួកគេជឿថា ជាវ៉ារ្យ៉ង់ថ្មីមួយដែលពួកគេបានហៅថា Delta plus។
លោកម៉ូឌីបាននិយាយថា«ដើម្បីប្រយុទ្ធប្រឆាំងនឹងរលកទី៣ យើងត្រូវតែបន្តដំណើរការនៃការចាក់វ៉ាក់សាំងឱ្យបានលឿន»។
កាលពីសប្តាហ៍មុនរដ្ឋាភិបាល បានចាក់វ៉ាក់សាំងតិចជាង ៤ លានក្នុងមួយថ្ងៃ បើប្រៀបធៀបនឹងកំណត់ត្រា៩,១៧ លាននៅថ្ងៃដែលលោកម៉ូឌីចាប់ផ្តើមយុទ្ធនាការ៕
ប្រភព៖ aljazeera ប្រែសម្រួល៖ នង ណារិន(Irin)
