អន្តរជាតិ៖ សារព័ត៌មាន BBC បានចេញផ្សាយនៅព្រឹកថ្ងៃទី៣០ ខែកក្កដា ឆ្នាំ២០២១ បានឲ្យដឹងថា ប្រទេសចិន បានព្រមាន ដល់ចក្រភពអង់គ្លេស ដែលកំពុងបញ្ជូននាវាផ្ទុកយន្តហោះចម្បាំង HMS Queen Elizabeth កុំឲ្យធ្វើសកម្មភាពណាមួយដែលមិនត្រឹមត្រូវ ចំពោះការបើក​ចូលដែនសមុទ្រចិនខាងត្បូង។

សារព័ត៌មាន Global Times ដែលគាំទ្ររដ្ឋាភិបាលនិយាយថា កងទ័ពជើងទឹកកងទ័ពរំដោះប្រជាជន កំពុងស្ថិតក្នុងស្ថានភាពត្រៀមខ្លួនសម្រាប់ប្រយុទ្ធជានិច្ច​។

ប្រទេសចិន បាននិងកំពុងតាមដានយ៉ាងដិតដល់នូវវឌ្នភាព ឆ្ពោះទៅទិសខាងកើត​នៃនាវា ​​Carrier Strike Group ដែលបច្ចុប្បន្នកំពុងធ្វើដំណើរឆ្លងកាត់សមុទ្រចិនខាងត្បូង ឆ្ពោះទៅប្រទេសជប៉ុន ខណៈដែលចិន​បានចោទប្រកាន់អង់គ្លេសថា«កំពុងតែ​ដែនការគ្រប់គ្រងរបស់​ខ្លួន»។

កងនាវាចរបានធ្វើសមយុទ្ធជាមួយកងទ័ពជើងទឹកសិង្ហបុរី ហើយរដ្ឋមន្ត្រីការពារជាតិអង់គ្លេស លោក បេន វ៉លឡេស មិនបានលាក់បាំងពីចេតនាធ្វើសមយុទ្ធដែលគេហៅថា« សេរីភាពនាវាចរណ៍» ឆ្លងកាត់សមុទ្រចិនខាងត្បូងនោះឡើយ។

ផ្ទុយពីសេចក្តីសម្រេចរបស់តុលាការអន្តរជាតិ ឆ្នាំ​២០១៦ ចិន អះអាងថា សមុទ្រភាគច្រើនជាកម្មសិទ្ធិរបស់ខ្លួន ហើយបាននឹងកំពុងសាងសង់កោះ​និងផ្លូវរត់សិប្បនិម្មិត ដែល​ស្ថិតនៅជិតដែនទឹកនៃរដ្ឋជិតខាង។

នាវាចម្បាំងអាមេរិកនិងកងទ័ពជើងទឹកនាពេលថ្មីៗនេះបានជំទាស់នឹងការទាមទាររបស់ចិន ចំពោះអធិបតេយ្យភាពនៅសមុទ្រចិនខាងត្បូង ដោយចេតនាបើកឆ្លងកាត់វានៅទីនោះ។​

លោក Veerle Nouwens អ្នកស្រាវជ្រាវជាន់ខ្ពស់នៅវិទ្យាស្ថាន Royal United Services(Rusi) ដែលជាក្រុមអ្នកវិភាគនៅទីក្រុងឡុងដ៍និយាយថា« ចិន មិនស្វែងរកការប្រឈមមុខដោយផ្ទាល់ជាមួយសម្ព័ន្ធមិត្តអាមេរិក នៅសមុទ្រចិនខាងត្បូងនោះទេ»។

គួរបញ្ជាក់ថា ប្រទេសចិន បាននិងកំពុងធ្វើសមយុទ្ធយោធាយ៉ាងទូលំទូលាយនៅក្នុងតំបន់នៅសប្តាហ៍នេះ ដោយអនុវត្តការវាយលុកតាមឆ្នេរសមុទ្រក្នុងចលនាមួយដែលបានធ្វើឱ្យអ្នកវិភាគមួយចំនួនព្រួយបារម្ភថា ចិនកំពុងរៀបចំខ្លួនដើម្បីឈ្លានពានកោះតៃវ៉ាន់​៕

ប្រភព៖ BBC  ប្រែសម្រួល៖ នង ណារិន