វ៉ាស៊ីនតោន៖ ប្រធានាធិបតីអាមរិក លោក ចូ បៃដិន បានធ្វើការការពារដោយកម្លាំង កាលពីថ្ងៃអង្គារ (៣១ សីហា) អំពីការសម្រេចចិត្តរបស់លោក ក្នុងការចាកចេញពីអាហ្វហ្គានីស្ថាន ដោយប្រាប់ជនជាតិអាមេរិកថា លោកបដិសេធមិនបញ្ជូនមនុស្សជំនាន់ផ្សេងទៀតទៅប្រយុទ្ធក្នុង«សង្គ្រាមរហូត»ទៀតនោះឡើយ។ ការ ចាកចេញដ៏តក់ស្លុតពីអាហ្វហ្គានីស្ថាន ដែលបានបញ្ចប់កាលពីថ្ងៃច័ន្ទ បន្ទាប់ពីសង្គ្រាម២០ ឆ្នាំប្រឆាំងពួកតាលីបង់ គឺជាការសម្រេចចិត្តដ៏ឈ្លាសវៃនិងជាការសម្រេចចិត្តដ៏ល្អបំផុតសម្រាប់អាមេរិក។
សារព័ត៌មាន Sputnik បានចេញផ្សាយនៅថ្ងៃទី០១ ខែកញ្ញា ឆ្នាំ២០២១នេះថា លោក ចូ បៃដិន បានថ្លែងសុន្ទរកថាទៅកាន់ប្រជាជាតិអាមេរិក ទាក់ទងនឹងការដកអាមេរិកចេញពីអាហ្វហ្គានីស្ថាន និងការបញ្ចប់សង្គ្រាម២០ឆ្នាំ ដែលក្នុងនោះបុគ្គលិកសេវាកម្មអាមេរិកចំនួន២.៤៤៨នាក់ និងយោធាអាមេរិកចំនួន៣.៨៤៦ នាក់ត្រូវបានសម្លាប់ ហើយដែលធ្វើឱ្យអាមេរិកខាតបង់យ៉ាងតិច ២,៤ទ្រីលានដុល្លារ។
ប្រធានាធិបតីអាមេរិករូបនេះ បានហៅបេសកកម្មជម្លៀសអាមេរិក នៅអាហ្វហ្គានីស្ថានថា ជាជោគជ័យដ៏អស្ចារ្យ ទោះបីជាត្រូវបានរិះគន់យ៉ាងខ្លាំងទាំងដោយគណបក្សប្រជាធិបតេយ្យ និងគណបក្សសាធារណរដ្ឋ ហើយថែមទាំងបង្កឱ្យមានការអំពាវនាវឱ្យលោក Biden និងមេដឹកនាំយោធាអាមេរិកលាលែងពីតំណែង។
លោក បៃដិន បានថ្លែងអំឡុងសុន្ទរកថានៅឯសេតវិមានថា« ខ្ញុំនឹងមិនពង្រីកសង្គ្រាមជារៀងរហូតនេះទៀតនោះទេ ហើយខ្ញុំក៏មិនពង្រីកច្រកចេញជារៀងរហូតដែរ»។ ឥឡូវនេះអ្នកខ្លះនិយាយថាយើងគួរតែចាប់ផ្តើមការជម្លៀសប្រជាជនឱ្យបានឆាប់ ហើយនេះមិនអាចធ្វើទៅបានតាមលំដាប់លំដោយទេ»។ លោក Biden បានគូសបញ្ជាក់ថា«ចំណុចសំខាន់គឺជនជាតិអាមេរិក ៩០ ភាគរយនៅអាហ្វហ្គានីស្ថានដែលចង់ចាកចេញអាចចាកចេញបាន»។
ការជម្លៀសដ៏វឹកវរពីអាហ្វហ្គានីស្ថានក៏ត្រូវបានសម្គាល់ដោយការវាយប្រហារភេរវកម្មនៅតំបន់អាកាសយានដ្ឋានកាប៊ុល ដែលបានឆក់យកជីវិតមនុស្សជិត២០០ នាក់ក្នុងនោះមានទាហានអាមេរិក១៣នាក់។ អាមេរិកបានវាយបកវិញដោយសម្លាប់ដូចដែលមន្ទីរប៉ង់តាហ្គោន បាននិយាយថា គោលដៅសំខាន់គឺក្រុមDaesh។ ទោះយ៉ាងណា ការវាយប្រហារតាមអាកាសក៏បានសម្លាប់ជនស៊ីវិលស្លូតត្រង់រួមទាំងកុមារផងដែរ។
ក្រុមតាលីបង់ ក៏បានរឹបអូស ឧបករណ៍យោធាអាមេរិក ដែលមានតម្លៃរាប់ពាន់លានដុល្លារ ចាប់ពីកាំភ្លើងវាយប្រហាររហូតដល់ឧទ្ធម្ភាគចក្រ Black Hawk ពីការដកថយកម្លាំងសន្តិសុខអាហ្វហ្គានីស្ថាន នៅប៉ុន្មានសប្តាហ៍ មុនការដួលរលំទីក្រុងកាប៊ុលនៅពាក់កណ្តាលខែសីហា។ ក្នុងនោះអតីតប្រធានាធិបតីអាមេរិកលោក ដូណាល់ត្រាំ បានទាមទារឱ្យអាមេរិកទម្លាក់គ្រាប់បែកលើពួកតាលីបង់ ប្រសិនបើពួកគេមិនប្រគល់អាវុធយោធាមកវិញ។
បន្ទាប់ពីអាមេរិកដកខ្លួនចេញពីប្រទេសទាំងស្រុង អ្នកនាំពាក្យតាលីបង់ លោក ម៉ូហាម៉េដ ណាអ៊ីម (Mohammad Naim)បានប្រាប់សារព័ត៌មាន Sputnik ថា« ឥឡូវនេះរដ្ឋរបស់យើង បានក្លាយជាប្រទេសមានសេរីភាពនិងឯករាជ្យ»។ លោកក៏បានបន្ថែមថា សហរដ្ឋអាមេរិក បានបរាជ័យ ហើយមិនបានសម្រេចគោលដៅរបស់ខ្លួន នៅអាហ្វហ្គានីស្ថាន។
សូមរម្លឹកថា កងទ័ពអាមេរិកបានលុកលុយប្រទេសអាហ្វហ្គានីស្ថាន ក្រោមការដឹកនាំរបស់អតីតប្រធានាធិបតីអាមេរិក លោក George W. Bush ក្នុងឆ្នាំ២០០១ ដែលជាផ្នែកមួយនៃ«សង្គ្រាមប្រឆាំងភេរវកម្ម»ដ៏អាក្រក់ បន្ទាប់ពីការវាយប្រហារភេរវកម្ម ថ្ងៃទី១១ ខែកញ្ញា។ ក្រៅពីនោះ កងកម្លាំងសហរដ្ឋអាមេរិកជាង ៤៧.២០០នាក់ និង ជនស៊ីវិលអាហ្វហ្គានីស្ថាន ត្រូវបានសម្លាប់ក្នុងរយៈពេលនៃសង្គ្រាមនេះ៕
ប្រភព៖ Sputnik ប្រែសម្រួល៖ នង ណារិន (I-rin)
