សេអ៊ូល៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃពុធទី ២០ខែតុលានេះថា ប្រទេសកូរ៉េខាងជើង បាននិយាយថា ខ្លួនបានបាញ់សាកល្បងមីស៊ីលផ្លោងថ្មីចេញពីនាវាមុជទឹកមួយថ្ងៃ បន្ទាប់ពីអាជ្ញាធរកូរ៉េខាងត្បូងនិងជប៉ុន បានរកឃើញការធ្វើតេស្តអាវុធជាក់ស្តែង។

បើតាមសារព័ត៌មាន Channel News Asia ចេញផ្សាយនៅថ្ងៃ ពុធ ទី២០ ខែតុលា ឆ្នាំ២០២១នេះថា យោធាកូរ៉េខាងត្បូង បានរាយការណ៍នៅថ្ងៃអង្គារ ថា ខ្លួនជឿជាក់ថា កូរ៉េខាងជើងបាន បាញ់មីស៊ីលផ្លោងបាញ់ចេញពីនាវាមុជទឹក ចេញពីឆ្នេរសមុទ្រខាងកើតរបស់ខ្លួន ដែលជាការសាកល្បងមីស៊ីលរបស់កូរ៉េខាងជើង។

ទីភ្នាក់ងារសារព័ត៌មានរដ្ឋកូរ៉េខាងជើង KCNA បាននិយាយថា«ប្រភេទថ្មី SLBM» ត្រូវបានបាញ់ចេញពីនាវាមុជទឹកដូចគ្នា ដែលបានចូលរួមក្នុងការសាកល្បង SLBM ចាស់ ឆ្នាំ ២០១៦ ។

ក្រុមអ្នកវិភាគបានកត់សម្គាល់ថា រូបថតដែលចេញដោយ KCNA ហាក់ដូចជា បង្ហាញពីមីស៊ីលដែលស្តើងជាងមីស៊ីល SLBM មុន ៗរបស់កូរ៉េខាងជើង ហើយអាចជាគំរូដែលមិនធ្លាប់មានពីមុនមក ដែលបានបង្ហាញជាលើកដំបូងនៅឯពិព័រណ៍ការពារជាតិនៅទីក្រុងព្យុងយ៉ាងកាលពីសប្តាហ៍មុន។

គួរបញ្ជាក់ថា ប្រទេសកូរ៉េខាងជើង បានធ្វើតេស្តជាច្រើនក្នុងរយៈពេលប៉ុន្មានឆ្នាំចុងក្រោយនេះ ជាមួយមីស៊ីលផ្លោងរយៈចម្ងាយខ្លី ដែលក្រុមអ្នកវិភាគនិយាយថា ត្រូវបានរចនាឡើងដើម្បីគេចចេញពីប្រព័ន្ធការពារមីស៊ីលនៅកូរ៉េខាងត្បូង។

មេដឹកនាំកូរ៉េខាងជើងគីមជុងអ៊ុន មិនត្រូវបានគេរាយការណ៍ថា បានចូលរួមក្នុងការសាកល្បងកាលពីថ្ងៃអង្គារឡើយ។

មីស៊ីលនេះត្រូវបានបាញ់ចេញពីសមុទ្រនៅជិតតំបន់ស៊ីនប៉ូដែលកូរ៉េខាងជើងរក្សានាវាមុជទឹកក៏ដូចជាឧបករណ៍សម្រាប់បាញ់សាកល្បង SLBM នេះបើយោងតាមអគ្គសេនាធិការចម្រុះកូរ៉េខាងត្បូងបាននិយាយកាលពីថ្ងៃអង្គារ៕

ប្រភព៖ Channel News Asia