រ៉ូម៖ រដ្ឋមន្ត្រីការបរទេសអាមេរិក លោក អាន់ថូនី ប្លីងគ៊ិន(Antony Blinken) និងរដ្ឋមន្ត្រីការបរទេសចិន លោកវ៉ាង យី(Wang Yi) បានខ្វែងគំនិតគ្នាលើបញ្ហាកោះតៃវ៉ាន់ នៅក្រៅកិច្ចប្រជុំកំពូល G20 នៅថ្ងៃអាទិត្យទី៣១ ខែតុលានេះ។ ប្រមុខការទូតប្រទេសមហាអំណាចទាំងពីរ ក៏មានការព្រមានអំពី ចលនាប្រឆាំងនឹងវិធានការបស់អាមេរិកនិងចិន ដែលអាចបង្កើនភាពតានតឹងនៅទូទាំងច្រកសមុទ្រតៃវ៉ាន់។ នេះបើយោងតាមការចេញផ្សាយដោយសារព័ត៌មាន Channel News Asia នៅថ្ងៃទី០១ ខែវិច្ឆិកា ឆ្នាំ២០២១។ ក្នុងពេលប្រជុំដ៏យូរនៅទីក្រុងរ៉ូម លោក Blinken បានគូសបញ្ជាក់យ៉ាងច្បាស់ថា ទីក្រុងវ៉ាស៊ីនតោន នឹងរារាំងនូវការផ្លាស់ប្ដូរទៅបែបឯកតោភាគីណាមួយដែលប៉ះពាល់កិច្ចការផ្ទៃក្នុងរបស់តៃវ៉ាន់។ នេះបើតាមការបញ្ជាក់របស់មន្ត្រីជាន់ខ្ពស់ក្រសួងមហាផ្ទៃអាមេរិក។
សូមបញ្ជាក់ដែរ ថា ថ្មីៗនេះមានការកើនឡើងនូវសមប្រយុទ្ធរបស់ចិនឈ្លានពានចូលតំបន់កំណត់អត្តសញ្ញាណដែនអាកាសរបស់តៃវ៉ាន់។ ទីក្រុងតៃប៉ិ បានបញ្ជាក់ថា នៅថ្ងៃអាទិត្យនេះដែរមានយន្តហោះ ៨គ្រឿងចូលមកដែនអាកាសតៃវ៉ាន់ហើយនេះអាចចាត់ទុកថាជាទង្វើធ្វើឱ្យតៃវ៉ាន់អាម៉ាស់។
មន្ត្រីជាន់ខ្ពស់ក្រសួងមហាផ្ទៃអាមេរិកបាននិយាយថា ជាមួយគ្នានេះដែរ សហរដ្ឋអាមេរិក មានបំណងចង់គ្រប់គ្រងការប្រកួតប្រជែងដ៏តានតឹងរវាងប្រទេសមហាអំណាចសេដ្ឋកិច្ចធំជាងគេទាំងពីរនេះដោយទំនួលខុសត្រូវ។ មន្ត្រីដដែលបានបន្ថែមថា ភាគីទាំងពីរបានទទួលស្គាល់ថាបណ្តាញទំនាក់ទំនងបើកចំហគឺសំខាន់បំផុត។
លោក វ៉ាង យី បាននិយាយថា«ចិនមានការព្រួយបារម្ភជាខ្លាំងចំពោះបញ្ហាផ្សេងៗដែលភាគីអាមេរិកបានធ្វើ បណ្ដាលឱ្យបាត់បង់ភាពស្របច្បាប់ និងផលប្រយោជន៍ស្របច្បាប់របស់ចិន។ លើសពីនោះលោកបានស្នើឱ្យភាគីអាមេរិកផ្លាស់ប្តូរទិសដៅរបស់ខ្លួន និងជំរុញទំនាក់ទំនងចិន-អាមេរិកឱ្យវិលទៅរកការអភិវឌ្ឍប្រកបដោយផ្លែផ្កាឡើងវិញ។
សេចក្តីថ្លែងការណ៍របស់ចិនបាននិយាយបានសង្កត់ធ្ងន់ថា ការភាន់ច្រឡំរបស់អាមេរិកដែលទម្លាក់កំហុសមកលើចិនជុំវិញការផ្លាស់ប្ដូរស្ថានភាពនៅតៃវ៉ាន់គឺគ្រាន់តែជា«ការយល់ឃើញ»និង«ការគាំទ្រ»របស់សហរដ្ឋអាមេរិកទៅលើកងកម្លាំងគាំទ្រឯករាជ្យនៅតៃវ៉ាន់ប៉ុណ្ណោះ ហើយការគាំទ្រនេះក៏ជាកំហុសមួយផងដែរ។
គួរបញ្ជាក់ផងដែរថា ចិនបានអះអាងថា កោះតៃវ៉ាន់ជាផ្នែកមួយនៃទឹកដីរបស់ខ្លួន ហើយចាត់ទុកទង្វើអន្តរាគមន៍ពីបរទេសលើតៃវ៉ាន់ថាជាការជ្រៀតជ្រែកក្នុងកិច្ចការផ្ទៃក្នុងរបស់ចិន ដោយឡែកការហោះហើរចូលទឹកដីតៃវ៉ាន់គឺជាការហោះហើរក្នុងស្រុកប៉ុណ្ណោះ។
ជំនួបផ្ទាល់មុខលោកប្លីងគីន និងលោកវ៉ាង យីលើកនេះ ជាជំនួបលើកដំបូងបន្ទាប់ពីជំនួបដ៏ឥតន័យនៅរដ្ឋអាឡាស់ស្កា ខែមីនាកន្លងមកនេះ។ មន្ត្រីអាមេរិកបាននិយាយថា កិច្ចប្រជុំក្រៅផ្លូវការកាលពីថ្ងៃអាទិត្យនៅទីក្រុងរ៉ូមគឺមិនមានការរៀបចំច្បាស់លាស់ ប៉ុន្តែមានផលិតភាព ហើយក៏ជួយដល់ការរៀបចំរបៀបវារៈ សម្រាប់កិច្ចប្រជុំកំពូលតាមប្រព័ន្ធវីដេអូរវាងប្រធានាធិបតីអាមេរិក ចូ បៃដិន និងប្រធានាធិបតីចិន ស៊ី ជិនភីង នៅចុងឆ្នាំនេះផងដែរ៕
ប្រភព៖ Channel News Asia
